🌺عبق ياسمين 🌺 (طور التنزيل )

part55

عبق الياسمين 🥀
🖋️ نور آية 🖋️
بارت...55🍂
قطعو الزي بعدما صهل فيهم و دار فيهم.... يقدر بزااااف منكم مغيفهمش شخصية سعيد.... ولكن كنأكد ليكم بيلا فكل عائلة كاين شي واحد بحال سعيد.....
يا عمك يا خالك يا خوك يا باك..... شخصية مركبة..... بصح طماع و عزيز عليه الفلوس.... ايلا عطيتيه الفلوس راك خوه و حبيبو..... و ايلا حيدتيهم ليه متسناهش يوقرك.... لكن كيبقا حقاني و معقول.... كيفهم و يعرف الظالم من المظلوم....
هكاااا سعيد عزيز عليه الفلوس روحو فيهم و لكن فداخلو راه مزيان و حقاني.... من اللول كان رافض يجيبهم لكن اصرو عليه و مالقا غير انو يخضع ليهم.... حط راسو بلاصة محمد و تفهم موقفو... اكيد من حقو يتعصب و يدير اللي دار ليه كل الحق.... عارف مو و ختو و حتى مراة خوه.... ميخفاوش عليه فعايلهم و شرهم... و شاف و عرف حتى طينة ياسمين و عرف انها مغتعرف ليهم و لا معاملتهم و لكن عارف محمد قدها و قدود و الى اقتدى الأمر يوقف معاه لكن الجانب الطماع منو كيخليه كاره محمد اللي كيما كيقول جمع حب و تبن...
فيرمة و محل و النص فالمحل ديال باه.... كانو مصبرينو دوك الفلوس اللي كان كيمشي ياخد و ديك الساعة كان خوه و حبيبوو لكن ملي قطع عليه الما و ضو رجع ممزيانش.... الحاصول سعيد شخصية متناقضة مع راسها و صعيب تفهم.....
خرج الكوبل ديالنا شادين الطريق للمراكش الحمرة.... مدينة النخيل و الخضورة..... مدينة البهجة و النشاط..... مستحيل تدخل ليها و مضحكش.... ناسها و جوها الدافي و خضوريتها و كلها كتفتح النفس..... توجهو لجامع الفنا اللي كان عااامر هااا النصارى... ها الآسياويين... من كل بلاد جاو ليها.... ماخلاو حلاقي تفرجو فيهم.... ماخلاو قرودة ولا حناش تصورو معاهم....
عطاها محمد الخاطر اللي مافوق منو خاطر.... و حتى هو كان فرحان لفرحتها و عجبو كيفاش بدات كتطلق معاه و كيزيدو يتعرفو على بعض.... ياسمين كانت بالنسبة ليه كتاب محلول.... ساهل عليه يقراه و يقلب صفحااااتو.... على عكسو هو اللي كان غامض بعض الشيء بالنسبة ليها..... مكانتش قادرة تتعرف على شخصيتوووو كاملة بحيت معاها ضااااحك و ضارب الدنيا بركلة.... لكن ملي شافت ردة فعلو ملي جاو حفيظة و بنتها و كيفاش تقلبات ديك الشخصية المبهجة لأعصاب و غوااات....
مقدراتش تفهم تركيييبتو و خلات كولشي للوقت المهم انه معاها ضاحك و ناشط و ممخلي حتى حاجة تنغصها عليهم..... شي حاجة اخرى مكتهمش.... كلات الببوش... شربات الحريرة.... شربات العصير..... خدات هدايا لدارهم و دار محمد.... من گنادر و بلاغي و محمد غير كيخلص..... كلاو لحم الراس او غير هو اللي كلاه هي معندهاش معاه.... المهم داقت من كولشي و محمد غي خايف تقلب ليها معدتها.... بقاو حتى للزوج ديال الليل عاد رجعو للدار مخليين الدنيا مازال عامرة بالناس..... وصلو مطحطحين كل واحد بدل و نعسو فاحظان بعضهم..... ❤️
وصلو لخزيبيات للرياض فين كان حسن كيتسنى فيهم على احر من الجمر.... كانت الوقيتة فين كيكونو مجموعين كلهم باستثناء امين و حياة و ولادهم اللي كانو سافرو يدوزو العطلة الصيفية.... مجموعين فالباحة ديال الرياض و حسن غادي جاي فوق ريوسهم معصب و معاجبو حال....
حسن غادي جاي فوق ريوسهم معصب و معاجبو حال.... طالع ليه الدم و كون كانو قدامو يتيري فيهم... من جيهة ضربو بكلامو الحيط و قللو منو و حسسوه انو والو كانو رجل كرسي.... و من جيهة ثقبو الوراق مع محمد اللي ماشي يديفولا حتى بعثو معاه و هادي مايقبلها لا ربي لا عبدو.....
هادشي مكانش فخبار سميرة حتى دوا معاه محمد و عرفات.... تعصبات بدورها و غوتات حتى ما قدات و معجبهاش تصرفهم و قررات انها مغتسكتش ليهم هاد المرة.... حتى حكيمة و الحاجة كلثوم و حتى هوما معجبهمش التصرف اساسا اللي سمعها مكيعجبوش الحال لانها مجات لا فصواب ولا ادب ولا والو.....
دخلو حادرات الراس حتى وقف فوجههم حسن و صرخ بصوت عالي خلا الكل يقفز و هوما من كثرة الخلعة تراجعو ببعض خطوات اللور....
حسن:تبارك الله على عيالات الرجالة ملقيتو اللي يحكمكم
حفيظة:(تتحاول تبرد و تهدن الوضع) غااا ببشوية الحاج
حسن:(قرب ليها و صاح فوجهها بصوت اقوى من الاول) مكاين لا حاج ولا هم يحزنون.... خليتيي فيها شي حاج ادااااارعةة... سبتي و مالقيتي اللي يحكمك رديتي الحاج ولية قدامك
سعيد:(معجبوش الحال يشوف مو كتعاير قدام بنادم ولكن فقرارة نفسو عارف انها دارتها لراسها) الواليد بلاما تعصب را (قاطعو باه صارخ عليه تا هو)
حسن: زم نتااااا حييييت مازااااااال نوبتك ارويجل (دار عند شيماء) دوي الالة الفاهيييييم هااادشي لاش طلقتي من داك ولد الناس على التشطين و الدرعة
شيماء:(هزات فيه راسها بجرأة و دوات كأنها مدايرا والو و فعلا هي بالنسبة ليها مغالطة فوالو هوما اللي غالطين و هي اللي خاصها تغوت على فعلة محمد) علاش الوالييييد مالي شنو درت فملك الله (نغزاتها مها بالجهد كتقرص فيها و لوخرين غير كيشوفو فقصوحية وجهها)
حسن:(قرب تال عندها و جبدها من يدها بالجهد حتى نفضها و قال بصوت قاصح) مازااااااال عند وااااالدييييك الوجه بااااااش تجاوبي معاااااياااااا نعلة الله واعليييييك يااااا المسخووووطة يا بيضتي الخامجة
شيماء:(بالرغم من انها مقصحة الا انها محشماتش و شافت فيه بلا ما يرف ليها اي جفن و قالت) هاد الهضرة قولها لولدك اللي جاري علينا من رزق الجدي اللي دمر فيه اما هو داها باردة...و من الفوق المعيور و التنفاخ علاااااش جاتوووو
سميرة:(مكانتش باغا دخل ولكن ملي جبدات محمد مقدراتش تصبر خصوصا انها كتهضر عليه بالخايب) حدك تم ا شيماااء ولدي فوتيييييه علك اش داكم لعندو اصللااا
حسن:(صهل فالكل و طلع ليه الطونسيو بالأعصاب) سكاااااااات مانسمع حتى كلمة...
#يتبع🔥🔥
ولعت يا بناااات 👀