🌺عبق ياسمين 🌺 (طور التنزيل )

part70

🥀 عبق الياسمين 🥀
🖋️ نور آية 🖋️
بارت...70🍂
اذن المغرب و بداو اقرب المقربين كيوصلو مستقبلاهم فالباب ثورية بقفطانها و ذهبها و العينين مكحلين و الوجه منور باين زين بناتها منين جايبينو.... حداها مصطفى حتى هو بالكوستيم و مازال شاد فراسو.... و الزوهرة هازا مريشة فيها الزهر....
اذن العشا و تعلمو بيلا عائلة العريس وصلات و غيمشيو يجيبو ياسمين اللي كانت واجدة بتكشيطة خضرة ديال الحنا مع مجوهرات ذهبية و مكياج خفيف برز ملامح وجهها و شعرها مجموع نص جمعة كانت كيف عادتها آية فالجمال كل من جات عينو عليها كيصلي على النبي و يسبح لخالق هاد اللوحة...
گالسين كيضحكو حتى تسمع صوت الكلاكصون ديال الطوموبيلات قفزااات و هزاااتها الرعدة و التوتر مناش الله اعلم اللي عارفة انها حاسة بالتوتر..... بقات جالسة حتى دخلات عليها سميرة و احلام لابسين حتى هوما قفاطن راقيين و ذهب لعلك ترضى و الماكياج تحلف عليهم حتى خواتات.....
سماو الله و شكروهاااا و تغزلو بجمالها الفتان..... حتى وقفت الحياة عندهم و سهاو فعيون بعضهم كأن مكاين حد من غيرهم...... رغم ان المسافة كانت قليلة بيناتهم لكن كانو كيحسو بيها طويلة و باغيين غير فوقاش يوصلو عند بعضهم.....
بابتسامة عريضة و عيون لامعة كيلمح محبوبتو مزينة باجود الألبسة و المجوهرات لكن المميز انها هي اللي زادتهم جمال و ماشي العكس....❤️
قرب ليها حتى خدا يدها قبلها مبتاسم فعينيها و قال بصوت حنين دخل مع مسامعها بحال شي نغمة هادية ريحات اعصابها....
محمد: سبحان من خلقك الله يحجبك (ضحكات بحشمة فحين هو طبع قبلة سخونة على جبينها) اخيرا غنتجمعو وياك فبيت واحد و مغتفرقنا غير الموت...
ياسمين:(عندها بزاااف الهضرة تقولها لكن الشجاعة الكافية مكيناش فاكتفت بكلمة لخصت كولشي) كنبغيك
ابتاسم ليها محمد برضى و عاود قبل جبهتها..... خرجو ليد فاليد و الكل كيشوفو و يصورو فرحانين ليهم.... ركبو فطوموبيلتهم اللي فضل انه يسوق هو و يمشيو بزوج عاد تبعوهم لوخرين بالكلاكسونات محيحين...
محمد:(سايق و كل مرة يدور يشوف فيها حتى خدا يدها اللي حمقاتو بالحنة باسها و شمها بعمق) جاتك زوينة بزاااف
ياسمين: اللي كنعرف الرجال مكيحملوهاش نتا معندكش مشكل؟
محمد: بالعكس ديما كانت الواليدة و عمتي و جدة كيديروها مولف ديما فييديهم و مكانش عندي معاها لكن نتي حاجة خرااا (غمزها حتى حشمات تاني) هانا على الحشمة اليوم تحد لوالديك...
ياسمين:(بتذمر) وا صافي حشوما
محمد: هههههه حشومة دابا تشوفي حشومة ديال بصح غا صبري على خبزتك احبيبة...
كملو طريقهم مرة ضاحكين مرة محشمها حتى وصلو لدارهم فين كانو الدقايقية ملقين ليهم طلعو فالدروج و الكاميرامان كيصور.... حتى دخلو و تلقاو ليها بالميدة (العمارية اللي كتكون فاللبسة ديال الحنة) طلعوها فيها وهي فرحانة بحيت برغم من انها مبغاتش العرس و كذا لكن تتبقا ليلة مهمة فحياة كل بنت و ميمكنش دوز هكاك سكوتية.....
تتشوف فناسها و حبابها فرحانين لفرحتها بجمعتها مع الشخص اللي بغاه قلبها شنو غتبغي مازال..... نزلوها بالصلاة على النبي و تمشات حتى جلسات فالبرزة مع محمد اللي كانت الضحكة واصلة ليه تال وذنيه رغم انه معزيزش عليه هاد التجمعات هكا بزاااف لكن هاد المرة كانت غير هاد المرة الناس متجمعين باش يشهدو على بداية جديدة فحياتو....
بداية علاقة غتكون اسرة مكونة منو و منها و عاد ثمرات حبهم اللي غيجيو فالطريق...... بدات العائلة كتجي تصور بداية مع سميرة و حسن اللي باركو ليهم و تصورو معاهم حتى جبدات سميرة بواط مخملية حمرة ديال الذهب فيها سرتلة ديال 7 متكونة من دمليج عادي و دمليج مفتول شكل تقليدي لكن مكيقدامش ركباتو ليها دمليج بدمليج و ياسمين فرحانة..... علاش لا وهي كتشوف فحماتها مكبرة بيها قدام الناس و دايرا ليها الوجه....
اكيد اي وحدة منا غتبغي تحط فنفس الموقف..... ناضت سميرة و جات ثورية و مصطفى حتى هوما باركو ليهم و تصورو و جبد باها بواط بحال ديال سميرة حلها كانت عبارة على سنسلة طويلة ديال الذهب مفتولة بالعلاقة ديالها اللي كانت عبارة على مصحف كبير و وازن..... رغم انها عارفة هادشي قليل فين غديرو لكن حاجة بسيطة تفرحك فمابالك يكبرو بيك قدام الناس و العائلة.....
تبعاتهم احلام و حكيمة و الجدة كلثوم اللي جبدات براصلي كبير ديال عصير الصابون لبساتو ليها و لوخرى باست راسها بالضحكة و الصواب..... و كملو العائلة تصوار و كل واحد كيلغي بلغاه....
شي كيقول كاين اللي عطاتو و كاين اللي زواتو.... وشي كيقول فقيهها صحيح و باينا شلح صويري.... و شي كيقول سبع ايام ديال المشماش تحيد و تفدي داك الذهب.... وشي كيقول تستاهل حتى هي بنت الناس.... و شكون فينا اللي ساكت و مكيقول والو.... كلنا كنقولو و النفس بنت الحرام امارة بالسوء يستحيل تسكتهاااا..... حتى ايلا ماگلتيها خايبة فهادي راك تعيب فهادي..... و بنادم مستحيل تسكتو او ترضيه.... واخا تحشي ليه لويزة فكل تمرة ياكلها و يقول يخ على سقرام حاط وحدة مالو مايدير جوج......
تعشا بنادم فالنشاط و الحيحة و عاد ناضت بدلات عليها بتكشيطة بيضة ديال العريسات كلها منبتة هي باش غتروح بدلات معاها ليزاكسيسوار اللي كانو عبارة على لونسوبل اللي جاب ليها محمد تماشيا مع التكشيطة..... خرجات بصلاة و سلام شطحات مع محمد و العائلة دارو حقهم و نشطو مع حبابهم و جا وقت الوداع..... اصعب وقيتة فحياة البنت.... كتودع المكان او العرين اللي احتواها حياتها كاملة....
اللي دوزت فيه اهم لحظات حياتها..... من الولادة.... لأول خطوة..... لأول كلمة.....لأول يوم فالمدرسة..... لبلوغ البنت.... لخطبتها للزواجهاااا...... المكان اللي دوزت فيه طفولتها و شبابها..... اللي تقاسمت فيه الحلوة و المرة مع عائلتها الصغيرة..... العائلة اللي فراقهم اصعب.....
كيفاش تفرق باها الحنين..... اللي عمرو دخل عليها بيدو خاويين..... اول حب فحياتها..... اول و اكثر شخص بغاهاااا و غيبغيهااااا..... اللي عمرو بخل عليها او تردد فانه يبين ليهت حبو و عطفو و حنانو..... كان ليها نعم الأب كيفما كانت ليه نعم الإبنة اللي عمرها طيحات براسو للأرض بل العكس من ديما كان رافع راسو ببناتو و مفتاخر بيهم.... و امها اللي رغم علاقتهم اللي مكانتش قريبة و داك الوجه القاصح اللي كتعطيها.... لكنها كانت عارفة و متأكدة انه من مور داك الوجه الحديدي كاين اطيب و احن قلب قلب الأم.....
الواليدين هوما اكثر شخص كيبغيك و يخاف عليك و يدير المستحيل باش يرضيك و باش يشوفك فاحسن المستويات و المراتب...... الأم و الأب مكيرضاو حتى واحد يكون حسن منهم ولو يكون خوهم ميرضاوهش يكون حسن منهم الا ولادهم ديما كيتمناو ليهم الأحسن فكل حاجة..... الواليدين هوما الوحيدين اللي كيبغيوك حب صافي طاهر..... حب مامشروط بحتى حاجة..... كيبغيوك كيف خايب كيف زوين.....
ثورية فالكوزينة كتبكي و تعطي لقلبها..... البكا اللي بكاتو فهاد اللحظة مبكاتوش على دعاء..... ماشي حيت مكتبغيهاش و انما حيت عارفة ان دعاء تربية يديها متخافش عليها حقها تاخدو بسنانها و متفرطش فيه..... عكس ياسمين الحنينة الدرويشة المسالمة..... يقدر يحكرها الواحد و باش تجنب الصداع تسمح فحقها ليه..... تحرك خوفها عليهاااا..... وحتى الندم على داكشي اللي معلماتهاش و ماوراتهاااش.....
دعاء معاها فالبيت كتلبسها سلهامها و الدمعة واقفة فطرف عينيها..... حتى هي مساخياش بتوأم روحهااا و بنتهاااا..... بالرغم من فارق السن اللي كان صغير لكن كانت كتحس بيها بنتهاااا..... حنات فيها وهي صغيرة..... حيدات الحاجة من راسها و عطاتهاااا ليها.... و ملي كبرت لقات فيها رفيقة الروح اللي كانت مستعدة تسمع ليها منين تكون محتاجة تهضر..... تنصحها منين تكون محتاجة النصيحة..... تعاونها و ماعمرها بخلات عليهاااا..... و نفس الشيء بالنسبة لياسمين اللي دارت عندها خدودها مالينهم الدموع و تلاحت عنقاتها بكل قوتهاااا كتشهق...
ياسمين: غنتوحشك اختي بزااااف بزاااف
دعاء:(نزلو دموعها حتى هي و عنقاتها بقوة) حتى انا احبيبتي غتخلي بلاصتك عليا
ياسمين: سمحي ليا (كتشهق) ايلا شي نهار قلقتك او درت شي حاجة غضباتك سمحي ليا
دعت:(خدات وجهها بين يديها كتبكي و تحرك راسها يمين و شمال) ابدااااا اختي ياريت يكونو گااااع الخواتات بحالك نتي راك بنتي (باستها بحرارة) اي حاجك احتاجيتيها او بغيتي نصيحة فيها غتلقايني معاك غنبقى ديماااا فجنبك...
تعانقو و بكاو فحظن بعضهم حتى رجعو كل وحدة عينيها جمرات و منفخين.... خرجات و تبعاتها دعاء بفاليز صغيرة لقاو محمد جالس مع باها اللي كان وصاه ملي دخلووو....
مصطفى:(جلس حدا محمد اللي كان كيتسنى ياسمين تخرج) ولدي محمد سمعني بغيت نهضر معاك شوية
محمد: اه تفضل مرحبا
مصطفى: هو فالحقيقة بغيت نوصيك على واحد الأمانة (شاف فيه محمد باستغراب) بغيت نوصيك على ياسمين... ياسمين راه قطعة من قلبي غنحيدها و نعطيها لك.... راه مهما قلت لك مغنوصفش لك بلاصتها فقلبي قداااش فراااقها كبييير و قاصح عليا بزاااف و كثر ما تصور.... ياسمين بنتي راه ماتلقى معاها حتى موشكيلة حنينة و كتحشم بزاااف ماطلب منك والو باغيك غي تصونها و تخاف عليها بحال شي جوهرة نادرة اولدي..
محمد: سمعت لهضرتك كاملة اعمي و انا كنواعدك عمر بنتك مايوصلها الشر ولا السوء معايا غنديرها فعينيا و عمري نقلقها..
مصطفى: ثايق فيك اولدي و عارفك ولد الناس الله يكملك بعقلك و يكمل عليكم بالخير....
#تصبحن على خير
ايييه دار البناااات خاوية 😕😭 توقعاااتكم للاحداث اللي جاية و نساو عليكم الدخلة حتى تجي وقتها راه القصة ممبنياش على الدخلة ولا العلاقة الجنسية 🔥 عيييشو مع الاحداث و حسووو بمشاعرهم و غوسو معاهم فيها 😍