🌺عبق ياسمين 🌺 (طور التنزيل )

part85

عبق الياسمين 🥀
🖋️ نور آية 🖋️
بارت...85🍂
عند حنان اللي كانت سالات داكشي باش كلفتها سميرة لكن قلبها بقا ضارها من هضرة شيماء و معاملتها ليها غير سالات داكشي طلعات لسطح بالزربة ما لقات حتى واحد فيه خدات راحتها و دارت لواحد البلاصة مخبية.....
مدات يدها لشعرها حيدات المقبط حتى طاح على ظهرها مسبسب فلون اسود لامع...... عينيها غرغرو و شريط حياتها داز قدامها..... من النهار اللي وعات على راسها فالخيرية.... للمعاملة اللي كانو كيتعاملو بيها تما..... لحياتها مع خالتها..... للفترة ديال علاقتها مع ايوب و الحب المزيف اللي كان معيشها فيها.....
دموعها هنا طاحو بغزارة و شداتها الشهقة مع البرد ديال العشية اللي كيطير شعرها..... كتبان فحال شي لوحة..... دازت قدام عينيها حياتها الزوجية مع محمد و العذاب اللي عاشتو لكن اللقطة اللي خلاتها تشهق بصوت عالي و تبكي بحرقة هي ذكريات حملها و ولدها اللي مكتابش انه يشوف الدنيا.....
من جهة حمدات الله و شكراتو اللي شاف من حالها و من حال داك الوليد و مخلاهش يجي لدنيا و يعيش الحكرة و الظلم اللي عاشتو مو..... و من جهة تمنات كون عاش و و تزاد و هزاتو بين يديها و تشوف عويناتو باش يهونو عليها احزانهاااا.....
طالع للسطح بعدما كثر عليه اللغا ديال العيالات و سخن عليه راسو طالع يتبرد..... دخل مبان ليه حتى حد حتى جا يدور و هو يبان ليه جسد ديال بنت شعرها مطلوق كطل من فوق الصور و شعرها كيطيرو البرد.... من لبستها عرفها حنان لكنو نتابه لذاتها اللي كتقفز كل مرة و من حركاتها عرفها كتبكي و كتشهق.....
عقد حواجبو بانزعاج ظناً منو انها كتبكي على الفلاش ديال شيماء..... معارفش بيلا هداك الموقف ماهو الا نقطة فبحر احزانها و مشاكلها...... توجه لجيهتها و مد يدو لكتفها قاسها حتى قفزات و بعد شوية حتى دارت عندو مخلوعة.....
هنا تصدم ملي شاف وجهها..... عينيها حمرين بالدموع و التزنيكة طالعاها بلا شنايفها اللي حووومر بحال حبات الكرز..... و مع شعرها اللي كيجي على وجهها بالبرد..... بانت ليه فحال شي قمر مكتمل فأوج جمالوووو..... بكثرة ماااا بقات فيه و شفاتو حالتهاااا..... لكن جمالها فات الحدود و مخلاش ليه الوقت فين يفكر فشي اخرى من غير هاد الوجه البريئ المفعم بالجمال اللي قدامو.....
عجبااااتو بزااااف و قلبو ضرب بعنف..... رجعو لارض الواقع بجوج بيهم و كل واحد عاق براسو هي مدات يدها لشعرها كتجمعو بالزربة و هو بعد نظرو عليها و يدو كتحك فعنقو بحرج.....
يوسف: حنان علاش جالسة بوحدك و كتبكي
حنان: لا لا ماشي كنبكي غي حرقوني عينيا بالبرد
يوسف:(ضحك بسخرية) واش بنت لك كنرضع صبعي ولا راك باينا باكية غي من دوك العينين اللي هلكتي
حنان:(حدرات راسها للأرض ما عرفات ماتقول و مازال البرد كيطير ليها زغيبات على وجهها)
يوسف: واش كتبكي بسباب الهضرة ديال شيماء هاديك ضربيها على حسابي و الله ما تبقى فيها..
حنان: لا لا واللهما على داكشي انا نسيتو عفاك متقوليها والو منبغيش نكون سبابكم الله يخليك..
يوسف:(ابتاسم بلاما يبين ليها على الطريقة باش كطلب فيه) صافي الالة منقول ليها والو ولكن بشرط غتعاودي ليا علاش كنتي كتبكي
حنان:(حناكها تزنكو) منقدرش عفاك غادي غي نزيد عليك بهمي حتى هو...
يوسف: الالة انا عزيز عليا الهم و الغم غتعاودي يعني غتعاودي اجي نجلسو بعدا (زاد قدامها و تبعاتو بلا حيلة جلسات مبعدة عليه شوية) يلاه بداي...
حنان: احم..... (بدات كتعاود ليه قصتها من الاول للآخر)
نخليوها تعاود ليه قصة حياتها و نهبطو عند ياسمين اللي كانت لبسات قميصها مع بليغة و جمعات شعرها نص جمعة مخليا النص لتحتاني مطلوق.... مع اكسسواراتها الذهبية و زينت عيونها الخضراء بكحل حر اسود و مسكرة و عكر خفيف......
محمد حتى هو لبس حوايجو و هبط لتحت يستقبل مع باه الناس اللي بداو كيجيو..... يله بدات كترش الريحة حتى سمعات دقات فالباب.....سمحات للي كيدق باش يذخل حتى لقاتها سميرة لابسة حتى هي قفيطين ابيض مع مضيمة ديال الذهب و شال ابيض مكحلة عويناتها كتبان مبشورة و مسرارة و مازال زينة و صغيرة.....
داخلة هازة فيدها بواط حمرا مخملية متوسطة الحجم مبتاسمة..... سمات الله ملي شافت ياسمين و قربات حظناتها بحب كأنها وحدة من بناتها.....
سميرة: بسم الله ما شاء الله عليك ابنتي قمر ربي يحجبك من العين
ياسمين: لهلا يخطيك اخالتي حتى نتي تبارك الله كتحمقي
سميرة: عويناتك الحبيبة ديالي قولي لي كيف بقيتي شوية محاسة بوالو ياك ابنتي
ياسمين: اجي جلسي بعدا (جلسو فوق الفوطوي) لا اخالتي بيخير الحمد لله
سميرة: الحمد لله ابنتي (مدات ليها ديك البواط حتى حلاتها و لقات فيها سنسلة ديال الذهب طويلة و ثقيلة مع علاق ديال اللوزة كتبان زوينة و تقيلة) هادي ابنتي بغيتك ديريها اليوم و تخليها امانة عندك حتى لنهار تولدي شي وليد و يتزوج و تعطيها لمراتو
ياسمين:(خداتها بابتسامة كتقلب فيها عجباتها) زوينة بزاااف اخالتي ولكن بزاف هكا يكفي الكادوات اللي كتجيبي كل مرة..
سميرة: حتى حاجة متغلى عليك ابنتي ولا على ولدي محمد راه الغالي و حتى نتي دابا معزتك من معزتو..
عنقاتها ياسمين بحب و باست ليها راسها عاد عطاتها تركبها ليها جاتها واصلة لكرشها فوق القميص كتبان تقييلة نيت و غالية.... دارت ريحة و سدات الباب و نزلات معاها ضاحكين لقات النسا گاع فالصالة سلمات على اللي جاو شي كتعرفو و شي و العنين گاع عليها كيطلعو و يهبطو شي عجباتو و شي محملهاش و شي حسدها و شي مداهاش فيها گاع.....
جلسات حدا الحاجة كلثوم اللي كانو جالسين معاها شي نسا فتقادة ديال سميرة و حكيمة..... داوين و ياسمين غير كتسمع و تبتاسم حتى دوات وحدة من دوك النسا اللي كانت بنت خت الحاجة كلثوم سميتها سعاد...
سعاد: ايوا اخالتي هادي هي مرات محمد
الحاجة كلثوم: اييه هادي بنتي ياسمين مرات محمد
سعاد:(طلعات و هبطات فيها مزيان و معنات الشوفة فيها) زيييينة الحق يتقال غير هي ضعيفة شوية (هزات فيها ياسمين بالزربة عينها و نزلاتها)
ح. كلثوم: الله يابنتي مازال صغيرة و مشا ليك الشوف ايلا بانت لك هادي ضعيفة كيف داير الزين عندك تبارك الله كاملة مكمولة من كولشي
سعاد:(بتمياق) ايوا اه مقلناشاي ولكن شوية الغلض زين بحال بنتي سناء تبارك الله شوفي على فورمة عندها ما خلا شكون خطبهاااا..
هنا هزات ياسمين عينيها فواحد الرباعة ديال البنات تتقلب على هاد سناء حتى استقر نظرها على وحدة فيهم عرفاتهاااا غتكون غا هي..... و كيدايرا هاد سناء الشعر كحل مطلوق مصاوب لكن باينا فيه محروق و واكل الدق..... الوجه بحال الرويضة الحناك فايضين و الحجبان مطراسيين بالكحل مع مكياج صارخ بحالا عندها سهرة فجلسات وناسة......
لابسة جلابة زوينة لكن مزيرة عليييها بزاااف مبينة تفاصل جسدها اللي فايض بهاد المعنى...... لا خصر باين ولا جناب جاية طاي وحدة بحال الوصلة و الشواكل خارجين و الفخاض ملاسقين..... الحاصول فورمة ديال الله يحسن العوان..... حبساتها الضحكة و بزز باش حبساتهاااا..... ما نقذها من الموقف غير دارهم اللي دخلو..... ناضت بالزربة سلمات على مها بحرارة و دازت لدعاء حتى سلمات عليها.....
دعاء اللي حتى هي ملي دخلات عرفوها ختها و بداااا تبرگيگ..... ولكن ملقاو منين يعيبوها..... اللون خمري كيسكر و الشعر مسبسب كحل..... العوينات كحلين غرين و زادتهم التكحيلة زين على زين..... جلابة مخزانية مخدومة بالحجر و العقيق خفيف مع ذهيبات خفافيييين و الصويك صغير فالجنب مع ظفيرات مقادين..... شافو حتى عياو و قالو ثورية والدة الزين..... و حتى هي مسلماتش من نظراتهم بحيت تتبان بحال ختهم الكبيرة تحلف عليها ما مهم.....
جلسو شوية حتى تمات داخلة سميرة سلمات عليهم بحرارة حتى هي و تبعوها البنات و دارو جليسة كيتحثو......
نرجعو لور شوية عند حنان و يوسف اللي عاودات ليه قصتها كاملة حتى لموقف ديال شيماء...... حسات بجبل كان فوق ظهرها و حيد ملي خوات قلبها لكن هو كان عندو احساس اخر.....
تصدم و تبهض و ما عرف ما يقول..... كان كيقول مكاينش اللي عاش مشكيلتو و مكاينش اللي عندو شي مشكل كبر من ديالو لكن تصدم..... و عرف بيلا المقارنة بين مشكيلتو هو و مشااااكل حنان مستحيييلة..... مشكيلتو ماهي الا قطرة مقرنة مع محيط مشاكل حنان.....
بقات فيه بزااااف و ضرو خاطرو عليييها..... كيفاش بنت مازال ما فاتت حتى 25 سنة عاشت هاد المشاكل و الضغوط كاملة..... بوحدها لا حنين لا رحيم يحس بيها و يواسيها..... لا فلوس ولا دخل يعاونها شوية و يهز عليها شوية..... و الاهم كيفاش باقا واقفة و منهارتش.....
ايلا كان هو راجل و بدارهم بفلوسو و مشكيلة بسيطة قدام مشاكلها خلاتو ينهار و يكره راسو و يسهر الليالي و يكره الناس و الحياة...... هي اللي غير انثى لا حول لها ولا قوة اشنو غديييير..... احترامها فداااااخلو و احتارم قوتهااااا و كراااامتهاااا و كبريااااءها اللي مخلاهاش تمد يدها لحتى واحد و تخدم بذراعها.....
احترم شرفهااااا و احترامها لذاتها اللي مخالاهاش تسلك الطريق الساهلة و تعيش بيخير بل اختارت الطريق الصعيبة اللي عامرة بالحفاري و العقباااات..... عامرة بالظلم و الحكرة..... عامرة بالاحتقار و الاستفزاز...... لكن شريفة و راضي عليها الله و مكمل عليها..... عاطيها الخير فداك الدخل الصغير و البركة......
سكت حتى عيا و ماعرف او ما لقا حتى كلمة باش يواسيها ولا يخفف عليها ولا....
يوسف: الصراحة صدمتيني ماظنيتش تكوني مدوزة هادشي كامل الصراحة بزاف على بنت فسنك كيف قدرتي تبقاي واقفة
حنان: القدرة ديال الله بوحدها اللي خلاتني نبقى مازال واقفة على رجليا (وعات على راسها بيلا تعطلات جمعت الوقفة بالزربة) تعطلت بزاااف غنمشي دابا
يوسف: ولكن بلاتي اجي (عيط حتى عيا ولكن كانت مشات....)
هبطت حنان و خلات يوسف موراها كيفكر فيها و فحياتها و كيفاش هي غير بنت و قدرات تجاوز مشاكلها و تكمل حياتها وهو اللي راجل مازال حابس راسو فالماضي و داير حد لحياتو..... بقا مدة لا بأس بها كيفكر و يخمم حتى استغفر الله و نزل.....
طاح الظلام و الناس گاع جاو..... اتاي و الحلاوي كيتسرباو للناس..... النسا فصالة و الرجال فصالة..... جاو صحاب محمد و اختارو يجلسو فالمريح ديال الرياض بغاو ياخدو راحتهم..... واحد اللحظة ناض محمد يتكلم لباه..... و فنفس اللحظة خرجات ياسمين مع ولد ختها غاديا بيه للطواليط......
مرداتش لبال لشكون جالس دازت حادرة راسها لكن هوما كاملين ردو معاهت البال و گاع وجهو انظارهم متسنينها تخرج..... فعلا قدا اويس حاجتو و خرجاتو..... شوية تحنات كتعقد ليه سيور السبرديلة و هوما گاااااع حاضينها عجباتهم كاملين..... زادت كملاتها منين قالها اويس شي حاجة و ضحكات بجهد حتى دوا واحد بلاما يحس...
الشاب1: اميمتييييي على الضحكة اش هاد العسل
الشاب2: هاد الزين اخويا معرت فين كينبت تكون خت محمد نخطبها ليوم قبل غدا
الشاب1: اهدى عليا اخويا باغي دي هاد الفريزة كاملة بوحدك شوف غا اللوين و الشعير...
#يتبع ❤️❤️
اررررررعد 😐😐