🌺عبق ياسمين 🌺 (طور التنزيل )

part86

عبق الياسمين 🥀
🖋️ نور آية 🖋️
بارت...86🍂
بقاو هوما كيتغزلو و ياسمين دازت دخلات تاني..... لكن اللي ماردوش ليه البال هو محمد اللي حضر للموقف كامل واقف موراهم عينيه حمرييين و ذاتو كترعد بالاعصاب..... زاد شوية حتى وقف على وحد من لور و هز يدو خبطو فظهرو حتى قفز لاخر و قال بصوت معصب.....
محمد:لقيتو الدار عامرة و الهضرة ماشي هنااااا اماااا نفرج فيكم امة محمد اشمايت
الشاب1: امالك اخاي محمد على هاد الهضرة
محمد:غتنوضو تقودو دابا قلت ليكم الهضرة ماشي هنا هاديك اللي كنتو تتزلو عليها راه مراتي ا زو****
الشاب2: ولكن سمحلينا والله ما عرفناهااااا مرتك غلطنا اخويااااا
محمد:هضرت دابااااا غت**قودو من هناااااا و الهضرة من بعد...
ناضو الدراري ندمانين حتى ماقدو مخليييينو كيترعد بالاعصاب مكرهش يشدهم يفرشخهم و لا معرت شنو يدير باش يبرد شوية..... بانت ليه نسرين دايزا غوت عليها تا قفزها...
محمد: نسرييييييين اجي لهناااا (جات عندو تفرغع ليها فوجهها) غاتبقاو خيطي بيطي هناااا ولا شنووووو دخلي كوني حدا مك و كلمي ياسمين (يله بغات تهضر صهل فيها) منعاودش هضرتييييييي..
مشات مسكينة مصدومة عيطات على ياسمين..... خارجة عندو كضحك على نيتها فرحانة و راشقة ليها لقاتو حدا الباب فواحد الكوان مدرق..... مع هزات فيه عينيها لقاتو عاقد واحد التخنزيرة طيح الزرزور من فوق السور.....
تلاشات ضحكتهاااا و عقدات حواجبها باستفهام.....يله حطات يدها على ذراعو و بغات تسولو اش بيه هو ينتر ليها يدها بجهد و دوا بصوت معصب.....
محمد: كنقسم لك بربي و ما اعبد و نلقااااك خارجة ولا معتبة قدام الصالة حتى نقطع لك العصب ديال رجليييك
ياسمين:(تصدمات و للحظة ظناتو كيضحك معاهاااا ابتاسمت بزز منها و قالت) اويلي مالك هههه كضحك معايا
محمد:(استفزاتو ضحكتها ماحس تا شدها من ذراعها تا حسات بالدم تزير فيها) مكنضحكش معاك غتق**ودي تكوني حدا مك و لا غنجرك لدارك و العالم الله اش غندير فيك (نترها وزاد مخليها موراه مصدرمة)..
فهاد اللحظة بالضبط ياسمين مكانتش عارفا باش حاسة..... كانت فصدمة... بعدما كانت ناشطة و المورال طالع..... جا محمد بهضرتو و فعلتو و هبطها لسابع ارض.....
تصدمت و ماعرفت باش تبلات..... علاش و كيفاش و شنو مافهمااااتش علاش و مالو تقلب.....عينيها غرغرو و قلبها ضرها و بزز باش حبست دموعها و رسمت ضحكة صفرة..... دخلات للصالون و الارض كدور بيهااا.... مع هزات عينها فدعاء عاقت دعاء بشي حاجة خصوصا ان وجهها كان صفر مسقوط من الدم.....
أشارت ليها ياسمين بوالو غير راسها و جلساات و عقلها مسافر كيخمم و يفكر و يحاول يلقى ليه سبب علاش عاملها هكاك لكن مالقات والو....
فكرات تا عيات ولقات راسها ما غلطات فوالو باش يعاملها هكاك..... مودها تبدل و الضيم طاح عليها..... ما بطا عليها غي وقتاش يسالي هادشي و تمشي خلاص لبيتها..... تمنات كون كانت فدارها تسد عليها و تبقى تبكي حتى تفش قلبها.....
جاتها صعيبة تحبس البكية و تبقى محافظة على ضحكتها واخا قلبها كيبكي.....حسات بيها دعاء ماشي على برجها لكن خلاتها على خاطرها..... تسربا للناس العشا و عاد تحط اتاي و الفاكية..... ياسمين ملقا العشا منين يدوز ليييها والو..... غصة فقلبها غادة و كتكبر..... مرضاتش يتصرف معاها هكاك بعدما ولفها معاملة زوينة......
جالسين حتى نقزات مرة تكون فالتقادة ديال سميرة..... حروفها كحلين و وجهها مبشور كيبان فيهاااا السر و الطيبة...
نعيمة: اختي حفيظة العشا و تعشيناه الله يخلف ندخلو دابا للمعقول
حفيظة: ايه مرحبا الحبيبة
نعيمة: ايلا قبلتو علينااا ناويين نتناسبو معاكم ان شاء الله
حفيظة: الله ياودي على حنااا نلقاو حسن منك ولا لا اامي الحاجة
كلثوم: ايه ابنيتي بنت خو الحاج و منا و فينا و حتى وليداتك الله يعمرها دار غير هو شكون فالبنات ناوية تخطبي
نعيمة: ربي يخليك اعمتي... ماكرهتش تيسير لولدي الكبير ياسر تبارك الله عليها زينة و قارية و حادكة تمناها اي ام لولدها..
حفيظة: ربي يخليك اختي حتى ولدك تبارك الله بعقلو و بخدمتو
نعيمة: لهلا يحاشمنااا اختي
حفيظة: ندوي مع باها و يكون خير...
بدلو الموضوع و بقاو هضرة تجبد هضرة حتى تناص الليل و بداو الناس كيمشيو..... حلفووو على دار ياسمين مايمشيو و فعلا بقاو نيت سوقان الليل خايب..... تفرتكات الجقلة و كل واحد قصد بيتو و حتى ياسمين مشات لبيتها..... مع حلاتو ضربات فيها ريحة ديال الگارو مجهدة حتى خنقاتها.....
شعلات الضو لقات محمد جالس و الطفاية حداه عامرة باينا كماااا و عطا لقلبو حتى ما قد و هادي كانت اول مرة تشوفو هكاك..... دخلات فالسكات مدواتش معاه حيدات البلغة و دازت تتحيد فذهبها و تردو..... يله بدات كتفسخ شعرها حتى سمعاتو وراها داوي دارت لقاتو تيلبس بسبرديلتو....
محمد:(دوا بصوت قاصح) متسناينيش نقدر نتعطل
ياسمين: ولكن فين غادي فهاد الليل
محمد:(طلع فيها عينو مخنزر) كيفاش فين غادي خاصني نقولك فين غادي و فين جاي ولا كيفاش امدام...
ياسمين: لا غير زعما الليل هدا و نتا يدك داراك و عمرك خرجتي فهاد الوقت
محمد: طالع ليا الدم و تخنقت بغيت نبدل الجو
ياسمين:(دخلو كلماتو بحال السم لقلبها عينيها غرغرو و البكية حبساتها قالت بصوت مخنوق) مالك امحمد كتعامل معايا هكا شنو درت لك
محمد:(ضراتو نبرتها فخاطرو ولكن الغضب اللي حاس بيه كثر من اي حاجة تمشى تال الباب و قال) ماشي وقت هاد الهضرة (خرج و خبط الباب).....
مع الخبطة ديال الباب نزلو دموعها كيجرييييو..... طاحت للأرض كتبكي و تعطي لقلبهاااا بواحد الطريقة تخلي اللي شافها يبكي معاهاااا..... فديك اللحظة بالضبط كتحس براسها بوحدها و ماعندها تا حد.....
كيفاش و علاش و شنو دارت معارفاش ولكن علاش يعاملها هكاك..... علاش بين ليلة و ضحاها يتبدل عليهاااا و هي دايرا المستحيل باش ترضيه..... كانت اول مرة من نهار اللي تزوجو غيتخاصمو هكاااا و يتعاملو مع بعضهم بهاد الطريقة.....
بكات و بكات حتى حرقها راسها... ناضت بزز حيدات القميص و غسلات وجهها و رجعات تلاحت فسريرها تكمل موجة بكاهاااا..... العينين تنفخو و الوجه رجع تيشعل......الوحدة.... الجوج.... الثلاثة مازال فايقا تتبكي و تتسنى فيه...
مولفاتش تنعس بلا بيه..... بقات على ديك الحال حتى غلبها النعاس و غابت.....
نمشيو عند محمد اللي كان داير مع يوسف باش يمشيو لشقة ديالو يسهرو فيها..... وصلو حطو اتاي و المكسرات و داكشي باش تحلا الجلسة و محمد غييير حادر راسو و ساهي...
يوسف: مالك اصاحبي ساهي و مكره اش عندك
محمد: اودي والله حتى المشاكل حاس براسي خورتها ولكن راه طالع ليا الدم ديال بصح
يوس: اش عندك اصاحبي
محمد:(عاود ليه الموقف من اللول حتى الهضرة اللي دارت بينو و بين ياسمين منين خرج)
يوسف:شتي نتااااا برب حتى غا كتخور واش اصاحبييي هي شنو دارت تا تعاملها هكاك
محمد: راه داكشي اللي بقا فيا مدارت والو لكن تعصبت اصاحبي و بقات فيا مسكينة واخا هكاك بقات تدوي بشوية
يوسف: عاطيك الله بلارة اصاحبي و باغي تقودها معاها برب كون وحدة اخرى ما تصبر لك
محمد: راك مشفتيش اصاحبي دوك الشمايت كيفاش كانو داويين راه بزز باش شديت راسي عليهم بالحق برب ماتخرج ليهم طريفة
يوسف: ولكن مرتك مدارت لك والو و نتا غلطتي معاها دونك تحمل اش غيوقع لك و دعي الله تطلع بنت الناس كثر من هكا....
نقا ليه يوسف وذنيه مزيان حتى عاق بخطؤو.... شربو كاس ديال اتاي و قررو ينعسو ديك الليلة تمااا مقرر الصباح يمشي يداخل عليها و يطلب السماااحة....
عند ياسمين مسكينة اللي بقات كل مرة كتفيق مكتلقاهش كتزيد تبكي...
صبح عليها الحال كيف الجرتيلة العينين حمرييين و منفوخين و الوجه حالتو.... اول حاجة دارتها جبدات ساك صغير دارت فيه تبديلة و برودوياتها و وراقها و داكشي ديالها.... لبسات جلابة سخونة و لاحت شال على راسها و دارت نظاظر ديال الشمش ما عندها خاطر لوالو.....
يله بغات تخرج دخل محمد حادر راسووووو ندمان و الندم تياكل فيه..... هز راسو لقاها لابسا حوايجها عقد حواجبو باستغراب و دوا بصوت هادي....
محمد: علاش لابسة حوايجك فين غادة
ياسمين:(مشافتش جيهتو) غادة للدار
محمد:(تصدم و قرب ليها) كيفاش علاش اياسمين غتمشي للدار
ياسمين: بغيت نمشي مع الدار توحشتهم
محمد: ولكن صبري غير نشرح ليك..
ياسمين:(حيدات النظاظر حتى بانو عينيه منفوخين و هزات فيه الشوفة و دوات) ماعندك ماتشرح ليا صافي (رجعات النظاظر لعينيها و هزات ساكها و نزلات مخلياه موراها حاط يدو فوق راسو و كيشوف عرف راسو عورها نيييت)...
نزلات لقات الدار جالسين كيفطرو سولاتها سميرة علاش لابسة و تحجات بتوحشات الدار لكن كانت باينااا من الطيارة مخاصمة مع محمد..... سكتو و خلاوها على خاطرهااا و محمد تاهو هبط طالع ليه الدم و نادم حتى ما قد.....
فطرو و ناضو بغاو يمشيو واخا عياو مايشدو فيهم لكن صافي بغاو يمشيو..... و هوما خارجين عيط محمد لياسمين و بعدو عليهم....
محمد:(حط يدو على حنكها كيدوز صباعو بحنان) ايلا بغيتي ترتاحي و توحشتي الدار سيري لكن متفوتيش يوماين اياسمين راه منقدرش بلا بيك...
ياسمين:(طاحو دموعها اللي كانت حابسة حيدات النظاظر و شافت فيه بجرأة و حزن وقالت) لا قدرتي امحمد قدرتي و كون غي عارفة علاش
محمد:(قتلاتو النظرة باش شافت فيه و دموعها نزلو على قلبو بحال السم مد يدو بالزربة مسحهم ليها و قال) لا مقدرتش ولكن كان خاصني نبعد احبيبة راك معرفتيش حالتي بقاي معايا و نقولك علاش عفاك متمشيش..
ياسمين:(قصحات قلبها و رجعات النظاظر و قالت) لا غنمشي بغيت نرتاح...
محمد:(حدر راسو بأسى) واخا سيريي ترتاحي احياتي راحتك هي اللولة ولكن ديري فبالك راني كنموت عليك و راني معذور (مد يدو لجيبو جبد شي فلوس محسبهمش حدو دارهم ليها فالساك) خلي هادو عندك ولا احتاجيتي شي حاجة صوني ليا (نزل على جبهتها باسها و داز لوذنها قال بهمس) سمحيلي احبيبة...
بعدات عليه و قلبها كيضرب بالجهد من جهة متأكدة من حبو ليها و عارفا بصح بيلا ميقدرش بلا بيها و حتى هي..... و من جهة شدات فخاطرها من جيهتو و خاصها وقت باش تنسا..... تبعات دارهم بعدما سلمات على الكل و توجهو للطوموبيل فين مشاو بصمت الا شي جمل صغار.....