عبق الياسمين 🥀
🖋️ نور آية 🖋️
بارت...42🍂
حگراتها فاللول ساعة بهراتها كملات ليها سوان و دازت لشعرها اللي اكدات عليها متقطعوش بطلب من محمد اللي ملي قالت ليه غتمشي لصالون قالها كولشي تال الشعر..... و فعلا نقصات ليها غير لي بوانت و دارت ليها واحد الماسك مغدي...
صاوبات ليها ضفيراتها ديال ايديها و رجليها بينما عطى المفعول و غسلاتو ليها و اكتفت تنشفووو كانت ديك ساعة وقيتة ديال الغدا خرجات دعاء للسناك جابت غدا ليهم كاملين كلاو و دازو لدعاء اللي دارت غي سوان و قادات ظفارها و مريم قطعات شعرها...
سعيدة: تبارك الله على العروسة منورة
ياسمين:(بابتسامة طلعات حنيكاتها الحمرين) ربي يخليك اختي حتى نتي فنانة الله يحفظك
دعاء: ايوا شنو سعيدة راه طووووب يله اختي ميعادنا السبت و جي شوية بكري..
سعيدة:متخميش احوبي السبت شديتكم غير نتوما..
و هكا خرجو من عندها مسهوطين خصوصا ياسمين تقول كانت كتهز فالملحة ههههه مشاو نيشان للدار لقاو نعيمة و رانيا كاينين شربو اتاي و هضرو شوية و مشاو و استأذنات ياسمين باش تمشي تنعس بعدما رفضات تعشا دخلات بدلات حوايجها و هزات تيليفونها لقات راسها دايرا ليه طيارة و ناسية غير حيداتها لقات عشرين ابيل من عند محمد و جوج من عند مها و بزااف المسجات تكات و دوزات ليه لابيل مكانتش دقيقة حتى جاوب بصوت مرتفع شيئا ما..
📱محمد: اتبارك الله على مدام..... داك التيلي غا لوحيه ملي مناوياش تهضري فيه
📱ياسمين:(عرفاتو تعصب بحيت فهاد الايام قدرات تعرف انه بقدر ماهو مزيان و ظريف كيتعصب بالزربة و عاد هي كيتعصب عليها فحالة وحدة ملي كيصوني و مكتجوبوش ضحكات بدلع و حشمة و قالت) ههههه غير سمحليا راه كنت دايرا ليه مود افيون و نسيتها..
📱محمد:(سمع ضحيكتها وهو يتهدن و قال بصوت خافت) لافيون هي اللي شداتني..... كيداير الزين ديالي..
📱ياسمين:(عضات على جنب شفتها و قالت بنفس مستوى صوتو) الحمدلله و نتا..
📱محمد:(نيم عينيه بسخونية على صوتها اللي كيدخل مع شرايينو و نعل الشيطان من التخيلات اللي جاوه فبالو كون كانت قدامو و قال) يوماين ازين ديالي و نولي بيخير (سكت شوية حتى سمعاتو تنهد و قال) موحشك بزاااف اياسمين..
📱ياسمين:(طلعات معاها الصهدة بصوتو و حناكها حمارو حتى رجعات كتحس بيهم سخان معرفات متقول اكتفت ب) احم ممم
📱محمد:(بضحكة) ممممم عاوتاني... ياسمين(قالها بنبرتو الجدية اللي ولفاتها ياسمين فينما كيبغي يعلمها بشي حاجة او يبغيها تركز معاه كيقول اسمها بجدية حتى ولفات عليها تسناها حتى همهمات ليه بالايجاب و كمل) شنو بان لك نسافرو واحد اليوماين مورا الملاك (العقد او ضريب الصداق)..
📱ياسمين:(تصدمات متصورتاش غيقول ليها هاد الفكرة كانت ماسحة من بالها هاد القضية و كانت ناسية حتى امر الدار و كذا و دابا دهشرها معرفاتش متقوليه من جيهة حشمانة حيت باغي يمشي معاها الراس فالراس و العالم الله فاش عينو و من جيهة تتقول راه غيولي راجلها و حلالها و من حقو عليها طيعو) احم.... معرفتش فين بعدا
📱محمد: واش تتعرفي نتي ازين هههههه نمشيو لمراكش
ياسمين: غتكون سخونة دابااا
📱محمد: الدار كليماتيزي اصلا مغتخرجيش منها ههههههههههه (سمعها صقلت) ابتي نتي غا يالاه مالك خايفة غناكلك..
📱ياسمن:(تالفة و معارفا شنو تقول قالت بقلة حيلة) نتشاور مع ماما و نعلمك
📱محمد: ماما....تشاوري امومو مع ماما تشاوري تاوكان طيحي فيدي..
📱ياسمين:حشومة ههههه
📱محمد: مراة الشيطان احبيبي كنعرفها مالها (سمع ضحكتها و كمل) .... مشيتي للصالون..
📱ياسمين: مشيييت و تسخسخت بزاف عييت
📱محمد: مالك على حالتك نتي زوينة بلا والو خاليا عشتي بداك الزين اللي فيك و ماديا ليا العقل شنو مازال باغا ديري..
📱ياسمين:هههههه صافي عافاك (حشمااااات تا ماقدات)
📱محمد: وايلي على صافي حنا عاد غنبداو..... سيري اختي تنعسي وكلت فك الله
📱ياسمين: علاش شنو درت
📱محمد:(كيحس بذاتو سخونة كتفور و واحد الشوق عندو من جيهتها بزاااف) مادرتيش ازين على نتي كديرييي..... سيري احبيبي الله يصبحك فراحتو..
📱ياسمين:(ضحكات بصوت عالي على هضرتو و قالت بدورها) تصبح على خير ء.... ميمو....
لاحت ليه ديك ميمو و قطعات بالزربة حشمانة من راسها محساتش حتى قالتها و خافت يتقلق و لا شي حاجة صيفطات ليه فالبلاصة..
💌ياسمين: محمد سمح ليا راه معرفتش كيفاش خرجات
💌محمد: ههههههههه غا ملي هضرتي هانيا واخا تقولي تا ميمااا
حطات التيلي و دارت على جنبها كضحك فرحاااانة و مرتاحة حتى فاتت القياس عمرها كانت كتصور غيجي شي نهار تبغي شي واحد و يبغيها تزعم عليه و ترتاح ليه و تزوج بيه..
ديما كانت كتفكر انها اذا تزوجات غيكون تقليدي بحيت شخصيتها مكانتش كتسمح ليها دير علاقات و كذا حتى تلاقات مع محمد اللي بدل فكرتها و قدر بشخصيتو الاجتماعية يقتاحم حياتها و يخليها تبغيه و تزعم عليه، بقات كتفكر حتى نعسات...
نخليوها و نمشيو نشوفو محمد اللي ضحك تا ما قد عليها و فنفس الوقت عجباتو زعامتها ناض بلا عجز عليه دخل للدوش و بقا حتى برد شوية عاد خرج كيدور فدارو اللي من نهار وقعات الواقعة مع خوه مبقاش عاود مشا للرياض باتت عندو مو و عمتو و جداه و امنية و نسرين واحد الليلة هي فين شافهم اما لوخرين عمرو مازال شافهم كفر عليهم بمرة...
زادت فكرة يسكن بوحدو ترخسات فعقلو و حتى مو ايداتو واخا مكرهاتوش يسكن معاها ولكن خوفا عليه و على ياسمين اللي متقدرش على دوك القوم صبرات....
تلاقا شحال من مرة مع يوسف فالمحل و كان يوسف تيجبدو فشي حاجة ولكن محمد مكيجوبوش دوا مع باه على الخواض اللي طاري فالمحل و باه دوا مع خوتو و ناض الصداع تاني على محمد اللي ديما خارج خاسر من المحل حتى ولا كيفكر يفك هاد الشركة ولكن مازال مجاتو الفرصة....
سعيد فعاود مشا عندو بغا الفلوس ولكن هاد المرة رفض محمد بحجة معندوش و الكريدي و كذا بحيت عيق عليه و مازال الفلوس اللي دا من عندو راه فايتين ل10 ملاين الشيء اللي عصب سعيد و خلاه يعري على الوجه اللي كان عاطيه على قبل الفلوس و عرى على نيابو ولكن محمد مابقات حتى حاجة كتهمو..
عارف ان دوك الناس واخا يقطع من لحمو و يعطيهم عمرو يگر فيهم و عمرهم يعتارفو ليه بيه فعلاش حتى هو ميشوفش حياتو و يدير مستقبل ولادو و داكشي اللي كان بدا من المحل اللي قرر انه تفوت الخطبة غيفك الشركة و يدير شي مشروع اخر و سعيد اللي حلف مايبقا يشد السانتيم و الفيرمة ديال مراكش اللي كان كل واحد تيوصلو حقو منها بحالا الجد باقي عايش قرر انه غيقطع عليهم كولشي حتى يعرفو بقيمتو...
فهاد الايام كانت سميرة غير كتشري و تحط لياسمين حتى عمرات ليه البيت مخلات ماخدات ليها بحالا كتشري لبنتها و محمد غير كيسمع ياسمين و يحط على قلبو حتى هو ختار ليها الخاتم اللي كان خارج واحد خداه ليها و ختار ليها الذهب اللي غيديوه و الشي لاخر بقا على مو، مشا هو بدورو ينعس...
#يتبع ❤️❤️
أنت تقرأ
🌺عبق ياسمين 🌺 (طور التنزيل )
Adventure______🥀👑 على مختلف اللهجات 👑🥀______ ________🌺عبق الياسمين🌺________ ___بقلمي:aya oulaaidi ( Aya Oulaaidi 🤍)___ معنى الحب: أنت معنى الكفاية: قربك معنى الراحة: كتفاك معنى السلام: صوتك معنى الجمال: عينيك معنى الضياع: شفتاك معنى الانتصار: قلبك مع...
