🌺عبق ياسمين 🌺 (طور التنزيل )

part90

عبق الياسمين 🥀
🖋️ نور آية 🖋️
بارت...90🍂
زاد و خلاها خير تتشوف مشافش الشخص اللي كان واقف حاط يدو على فمو مصدوم و شككو كاملة تأكدت....
طلعات ياسمين لبيتها بعدما مشات خالتها اللي واخا حلفو عليها لكن مشات..... اول حاجة بدلت و طلقت شعرها فرحانة بيه..... هزت التيلي تا تصدمات بالكم الهائل ديال المكالمات و المسجات..... فالبلاصة صونات ليه.... تعطل شوية عاد جاوب بصوت مبحوح باينا فيه يله فايق من النعاس....
محمد: الو احم ياسمين
ياسمين: كنتي ناعس
محمد: اه داتني عيني كيدوزات الحبيبة ديالي نهارها
ياسمين: الحمدلله مزيان ونتا صافا يدك
محمد: مزيانة خاص نرجع ندير الكونترول ايوا مهداكش الله تجي الدار خاوية بلا بيك
ياسمين: كيفاش الدار خاوية علا نتا ماشي فالرياض
محمد: لا ناض صداع مع شيماء و جيت فحالي لخربتي و غدا غندوز نجمع دوك الحوايج نرجعو لدارنا
ياسمين: ولكن غتقلق خالتي سميرة
محمد: خالتك سميرة معارفاش بيلا ولدها بغا ياخذ راحتو فدارو مع روحو ابنتي
ياسمين: ههههه هضرتك شحال حليلوة تتحمقني
محمد: اححححح اقلبي على حليلوة كاين شي حلاوة قدك نتي راك الروح ديالي
ياسمين:(بغنج) ونتا حبيبي
محمد:(ساح و ذاب) احححح زيدي اشنو اخور
ياسمين:(بصوت شبعان انوثة و تحلوين) و راجلي
محمد:(بدا تيتزير عليه الحال) ايه و شنوووو تاني
ياسمين: و روحي و حياتي و حبقلبي و كولشي نتااااا بيبي
محمد: احححح ابنت الهم نوضتي الراگد ملي كنكون حداك گعما كيكون عندك هاد اللسان تاكتبعدي
ياسمين: لا صافي غنولي ديما نعبر لك (فهاد اللحظة تفكرات الهضرة اللي دارت بينها و بين مريم....)
فلاش باك 🔙🔙🔙
وهوما جالسين دخل السي مصطفى سلم عليهم و مشا لبيتو عاد تبعاتو ثورية..... غير خرجت دارت مريم عند ياسمين موجهة ليها الهضرة.....
مريم: ايوا عندرا كيغادا مع راجلك
ياسمين: الحمدلله هاد الساعة مزيانين و راك عارفة دوك النقاشات الصغيرة
مريم: ضروري منهم هادوك هوما الملحة ديال الحياة تيقينيي ايلا قلت لك شي مرات مع ادريس (زوجها) كنوليو نجبدو صداع من والو غير باش نتغاوتو شوية و نبدلو الروتين ههههههه
ياسمين: هههههههه ضحكتينيي حنا قليل فين كتناقشو اصلا اناااا مازال كنحشم منو
مريم: اويليي على الهبيلة طالعا فستة اشهر باش تزوجت و مازال تتحشم مالك حماقيتي راه ميبغيش هكاك
ياسمين: ولكن هو عمرو قاليا
مريم: و مغيقولش لك الحمقة راه واخا يضحك و واخا تكون تتعجبو ديك الحشمة ديالك غيجي واحد النهار و يمل الراجل احبيبة تيبغي مرتو تكون من كل فن طرب
ياسمين: مفهمتش شنو كتعني
مريم: هاني نفهمك بالشوية دابا الراجل بصفة عامة كيكون خدام يعني ديما خارج ديما كيتلاقا مع انواع و اشكال ديال بنادم و سيرتو العيالات و بصفة خاصة راجلك اللي خدمتو تسعين فالمية منها مع النسا يعني تيشوف الحشومية و الجريئة و الضحوكية و النكدية و المهدنة و الطيورية و كولشي الانواع و نتي معرفتيش نفسو ديك ساعة شنو تتقوليه راه واخا يكون تيحماق على تراب رجليك ولكن ضروري مغيشوف شي منظر فالزنقة و غيعجبو
ياسمين: و هادشي كامل و مازال مافهمت شنو دخلني انااااا ايلا عجبووو هو
مريم: سطلة يا بنت ختي سطلة اللي خاصك تفهمي هو انو خاصك تكوني هاد الانواع كامليين خاصك تكون حشومية و جريئة و مهدنة و ضحوكية و جدية و معقولة غير خاصك تعرفي ايمتا تأكتيفي كل مود... ملي يبان لك مقلق ولا ضراه شي حاجة هنا خاصك تفكري بعقلك و تكوني رزينة و مهدنة ندير كاس ديال اتاي و لا قهيوة فصوينية زوينة و نطلق شعري ندير شي رويحة خفييييفة و عكير خفيف و نجي عندو متسوليه لا مالك لا والو نوضي شمري كتيفاتك و بداي تماسي ليه كتيفاتو تا يشرب قهوتو جلسي و قولي ليه يحط راسو على فخضك بداي تحكي ليه فشعرو ديك ساعة بلاما يحس غيبدا يعاود ليه..... ملي تلقايه معصب و طالعا ليه القنديشة ماتهدري معاه ما والو قدي شغلك و جلسي كوني دوا معاك جاوبيه و سكتي غوت علك گاع و لا عايرك دخلي لبيتك و خليه ديك الساع منين غيتهدن غيقول مع بالو وايلي شو هاد السيدة عايرتها و مجاوبتني ماوالو و غايجي يطلب السماح.....
مريم:(شربات الما) لكحتيني ههههههه ايوا ثاني حاجة ماشي ديما البادرة تجي من عندو لاااا مرة من عندو و اكتيفي المود حشمة مرة من عندك مرة لبسي و تقادي و قصديه مرة مرة خدمي الموسيقى و شطحي ليه هادشي راكم عارفينو نتومااااا المهم متخليش كل ليلة كيما اللي قبلها و اهم حاجة كوني نتي ديك الق**ة اللي غيخونك معاهااااا.... بغيتيي شي حاجة متطلبيهاش منووو ملي يكون جالس ولا معصب ولا ديريي ليه شي لويلة و خلي تتساليو راك عارفا و طلبيه..... علاقتك مع مو ديما تكون مزيانة..... الاحترام مع خوتو قدام باه ديما لوحي شال على راسك واخا متكونيش دايرا الزيف غير من باب الاحترام..... شري شي كادو و خلي تتكونو جالسين و عطيه لعدوزتك قولي ليها هذا خديتو لك انا ومحمد.... هكا دي جيست صغار ولكن زوينين...
ياسمين: بصح انا ديما غير حشمانة منو شي مرات كيتعصب
مريم: هاااا شفتي راه ديما التغيير زوين (بانت ليها ثورية جاية قلبات الهضرة) اشمن صالون مشيتي خدمتهم زوينة...
قلبو الهضرة لكن بقات ياسمين كتفكر فيها و لقات انها على صواب.... و باش تحافظ على زواجها خاصها تكون شوية من گاع داكشي اللي كيكون فالزنقة....
العودة 🔙🔙🔙
رجعات لارض الواقع مكملة هضرتها مع محمد....
محمد: شي يهودي مات فالملاح ملي لالة ياسمين تكرمات علينا
ياسمين: ههههههه وا صافي دابا غنحشم تاني
محمد: دابا شنو غدا نجي نجيبك
ياسمين: لا لا بلاما تعذب بابا عندو شي شغال فالرباط و غيجيبني
محمد: ايوا صافي المهم جي للدار نيشان
ياسمين: صافي واخا يله رجع دابا ترتاح احبيبو
محمد: اححح على حبيبو سيري ازين ديال حبيبو تصبحي على خي
ياسمين: تصبح على خير ايلافيو
محمد: كنبغيييييك (ختمها ببوسة و قطعو)....
أحببتك مرة واحدة، ولكنها الى الأبد... 🧡
بعدما تعشاو و رمى لشيماء دوك الكلمات.... طلع لبيتو معصب بدل حوايجو بملابس بيتية و داز لبيت ولدو بقا معاه تنعس... متحسر على زهر هاد الوليد اللي كتاب عليه يتزاد عند ام معندهاش ذرة حنان..... كتاب عليه يعيش و يكبر مفرق بين واليديه.... معرفش شنو يدير باش يعوضو و ميخليهش يكبر معقد..... مكرهش شي وحدة اللي تحن فيه و ديرو ولدها.....
لكن فمجتمعنا قليل فين تتلقى زوجة الاب تتحن فالولاد هدشي ايلا مقلتيش مستحيل.... بقا معاه حتى نعس عاد داز لبيتو هز جاكيط و طلع لسطح..... بلاصتو ديال ديما فينما كان مخنوق.....
لكنها من نهار جات حنان مبقاتش بلاصتو بوحدو..... وبقات كل ليلة كتهز لحاف و طلع تجلس تبرد و تشم الهوا نقي..... فعلا طلع و رد الباب غادي لجليسة اللي كتكون حتى لقا الضو مشعول و هي جالسا مكمشة و شعرها كيطيرو البرد..... ضحكو منظرها نحنح برجولية باش ترد ليه البال..... هزات راسها مخلوعة لقاتو هو هاد تنفست.... جمعت اللحاف و بغات تنوض حتى وقفها صوتو.....
يوسف: غا جلسي مالكي تخلعتي بوعو انا
حنان:(ضحكات بحشمة) لا ههههه غي بغيت نخليك على راحتك
يوسف: جلسي ابتي مالي هازك هانا مرتاح (جلس قريب ليها) ايوا اش خبارك نتي مزيانة مع الخدمة
حنان:الحمدلله مزيان هاد الساعة
يوسف: الحمدلله قولي ليا تال اش وصلتي فالقرايا
حنان: ملي كنت فالخيرية وصلت تال سيزيام و العام ديال الباك خرجت فنصو كنت سيونس ماط
يوسف: تبارك الله راك قرايا على هاد الحساب ولكن علاش مكملتيش
حنان: شوية ههههه مكملتش حيت خرجت و انا فالباك كان خاصني ندير انتقال و داكشي لكن خالتي مبغاتش و صافي ملي جلست عندها ضربت على القرايا و خرجت خدمت
يوسف: ودابا متتفكريش تكملي ولا دخلي ديري شي ديبلوم بعدا متبقايش خداما هكا
حنان:(ضحكات بمرارة) غير قوليا شكون غيقبل يجلسك عندو موكلك مشربك مخلصك و يزيد يقريك من غير واليديك واخا يكون عسل غيتقادا
يوسف:(بقات فيه نبرتها المجروحة) بصح عندك الحق و مفكرتيش تعاودي تزوجي
حنان:(شافت فيه) نجيك للصراحة (حرك ليها راسو بايجاب) ولاو گاع الرجال كيجيوني بحالو بالحر اللي دوز عليا و العذاب اللي شفت من عندو و عند مو ولات عندي عقدة..
يوسف: راك غالطة اللي خلقو خلق غيرو خلق بحالو و كفس منو و حسن منو ايلا عاودت لك انا قصتي نتي براسك تبهضي يمكن
حنان:(بلاما تحس قالت) عاود ليا
يوسف: واخاا مكنحملش ندوي فهاد الموضوع ولكن كيما فتحتي ليا قلبك و عاودتي ليا حتى انااا غنعاود ليك انااا الالة ملي بدات تتشدني المراهقة و انا كتعجبني واحد بنت خالتي سميتها اميمة كبرت شوية وصلت لدوك بداية العشرينات صافي ولات تتعجبني بالجهد زينها و شخصيتها وكولشي و حتى هي كانت تتبين ليا بيلا كنعجبها نهار كملت قرايتي و خدمت مع الواليد صيفطت الواليدة تخطبها صافي قبلات تال نهار الخطبة كنتصدم بالسيدة مفرحاناش وايلي اش هادشي مهم كملنا تزوجنا و بحالا البنت داك الإعجاب ديالها غادي و كينقص معاملتها تقيلة لمدة اربع سنوات عمرها سولتني على راسي عمرها اهتمت بيا عمرها قالتلي تا واش راك بيخير افلان.... كنت ديما كنلاحظ معاملتها اللي سبيسيال مع محمد ولكن كنقول مكاين باس محمد اللي كانت كتحرشني عليه اللي مكنتش گاع كنهضر معاه..... تال النهار اللي غنكتاشف بيلا انا اللي كنت حمار وسط هاد البشري كامل ههههه كولشي عايق و اناااا مقلوبة عليا القفة السيدة كتبغي خويا و دارتني غي طريق تا صدقات مزوجة بيا (لاحظ ملامحها المصدومة) متصدميش مازال جايك فالهضرة..... ماشي تزوجت بيا و استوعات بالعكس زادت فداكشي و ولات تتحرش بخويا حتى خوا الدار بمرة لكن زواجو كان بحال وقيدة و لحتيها علييييها جهلات و ولات وحدة اخرى تال النهار اللي غيفضحها الواليد كولشي عارف و حتى حد ماقد يفيقني (حدر راسو) تصدمت احنان صدمة عمري حسيت برجولتي تهانت شنو فيه و مافياش شنو اللي فيا خايب نحيدو غي باش ترضى عليا..... ما علينا صافي خويت الدار و عطيتها النخال السيدة ملي لقات راسها بلانها مع خويا تفضح ولات باغا عاد دور بيا لكن انااا كان قلبي كفر رفعت عليها دعوة ديال الطلاق و باش تعرفيها مهامهاش حتى ولدها لاحتو و تنازلت على حضانتو ليا و مشات.....
حنان:(مصدومة مكانتش متوقعة يكون عايش هادشي كامل) الصراحة معرفت منقولك هادشي قاصح والله مين كتشوف مشاكل الناس كيهونو علك مشاكلك
يوسف: غير باش تعرفي بيلا كل واحد عندو ماضي كحل مع طرف اخور ولكن هادشي ميخليكش تحكمي على كولشي بالعكس نتي مازال صغيرة و زوينة (حشمهاااا حتى خشات راسها فعنقها) مازال الحياة قدامك تعيشي و تزوجي و تولدي
حنان: عندك الحق بالصح شكرااا بزااف على هاد الهضرة ريحاتني
يوسف: ياك حنا صحاب دابا مبيناتناش شكرااا ولا لا؟!
حنان: اه صحاااب...
#يتبع ❤️❤️