🌺عبق ياسمين 🌺 (طور التنزيل )

part68

🥀 عبق الياسمين 🥀
🖋️ نور آية 🖋️
بارت...68🍂
ضحك محمد و خرج مخلي حفيظة غير تتشوف و تسرط القمعة اما شيماء مبانتش قدامو سادة عليها فالبيت من البارح.....
لبسات سميرة جلابة زوينة مع صندالة طالون ب ساكها و زويف مع ماكياج خفيف تتبان بحال ختو الكبيرة متعطيهاش مو.....
ركبو فالطوموبيل متوجهين للبحر فين گلسو فواحد القهوة عائلية عندها طيراس على البحر..... طلبو اللي بغاو كيديو و يجيبو فالهضرة....
سميرة: ايوا خلي تال السابع ديالكم و نديرو صدقة للصحاب و العائلة
محمد: انا مكنفهمش فداكشي نتوما ديرو اللي بان ليكم (تنهد و عاد دوا) صراحة الواليدة انا باغيك فشي حاجة اخرى (حركات ليه راسها بمعنى شنو) بغيت نفك الشركة ديال المحل اميمتي
سميرة:(تصدمات) اويلي علاش ياك مكااااين باس واش على يوسف ولا شنو عارف باك ميعجبوش الحال
محمد: الدعوة مخلطة من غير يوسف و شيماء المحل فيه الخواض بزاااف و خسارتو كثر من ربحووو و هازين شلا كريديات و مغنتسناهومش تا يديرو ليا المش فالسروال عاد نفيق اللهوما دابا
سميرة: ايوا اش غنقولك اولدي نتا تعرف شغلك و ايلا على باك انا نهضر معاه
محمد: راه فيا منقولها ليه ولكن بغيتك تسبقيها ليه
سميرة: ايوا تال العشية و نهضر معاه
محمد: لا مكاين بو عشية غتباتي معايا اليوم تبدلي الجو شوفي وجهك صفر
سميرة: والو اولدي غا العيا ايوا يله باش نصاوب لولدي شي طاجين متكتك
محمد: نيت توحشت طواجنك
سميرة: غا طواجني العفريت ها ياسمين جات تعمر بلاصتي
محمد: كل وحدة و بلاصتها الواليدة نتي ميمتي وهي مرتي و بجوجكم اللي عندي
سميرة:تانا اش بغيت ليك اولدي غا الهنا و راحة البال و يزرع فديك بنت الناس البركة و يجعل دخلتها دخلة خير يارب
محمد:(خدا يدها كيبوس فيها) امين الواليدة الله يطول ليا عمرك....
خرجو من القهوة فاتجاه الدار فين دوزو ليلة بيناتهم ضاحكين و كيتافقو اش يديو و شنو يتقداو.....
ليت كل الهواء عطرك 🤎
صباح جديد و سيمااانة دازت على ابطالنا بحلوها و مرها.... سيمانة اللي كانت عامرة بالأحداث و الشغال حتى ملقاوش فين يحكو راسهم.... كل نهار كتخرج ياسمين مع دعاء يتقداو بداية من طقم ديال لي فاليز باللون الأبيض ديال العرائس و خدات لبيسات بلديين جاهزين بحكم يله كفاها الوقت تخيط تكشيطة و قفطان فقررات ان شي لاخر غتخلي تال من بعد.....
خدات بيجامات جداد و ملابس داخلية كلهم فالوان هادية ماعدا اللون الأسود و الأحمر اللي فينما دوات مع محمد كيركز عليهم..... كانو كيهضرو كل نهار بالسوايع محاولين يشبعو من بعضهم واخا الشوق قاتلهم لكن مابقا والو و يتجمعو تحت سقف واحد.... مشات لسونطر ديال التجميل كبير دا ليها النهار كامل هي ودعاء دارت سوان لشعرها و وجهها مع لاسير كاملا صاوبات ضفيرات و خرجات كتشعل و المفاجأة لقات محمد كيتسناها....
محمد اللي دازت عندو السيمانة عادية قرر انه ما يهضر مع باه على المحل تيفوت هادشي و بقا خدام عادي عمرو ما مشا للرياض مو و عمتو كل مرة كيدوزو عندو يحطو شي حاجة من داكشي اللي شراو.....
و اليوم دوا مع ياسمين عرفها غتمشي لسونطر و مقدرش يصبر مازال خلاهم كيخملو فالدار و هز هو طوموبيلتو و مشا عندها بقا كيتسنا بالسوايع لكن ميهمش قدام شوقو لمحبوبتو.... خارجة بوجهها منور و شعرها مشدود ذيل حصان اللور مع جليليبة و بليغة....
الظفيرات دايرا ليهم الجيل و مصبوغين بالبيج و لون لامع فالبنصر ديالها.... تتبان بحال الحورية حمقاتوو كان داير نظارات شمسية هبطهم بابتسامة من عينيه اللي هايمين فيها..... و مكانش بوحدو اللي ساهي كانت حتى ياسمين ساهية فيه و فوقفتو و طلتو كلشي فيه كيصرخ بالرجولة.... تتقول مع بالها كنغبر عليه يوماين كيزيان ولا كيفاش..... شافتو دعاء حتى هي و بتاسمت قربو لعندو.....
دعاء:(مدات ليه يدها) اهلا اهلا بنسيبي كيف داير لاباس عليك
محمد:(سلم عليها بنظرة خاطفة و رجع كيشوف فياسمين) الحمدلله اختي و نتي بيخير
دعاء: بيخير الحمد لله (دورات راسها لعند ياسمين لقاتها مازال ساهية فيه نغزاتها بشوية حتى وعات على راسهت و مدات ليه يدها)
محمد:(خدا يدها سلم عليها حابس الضحكة) كيدايرا اختي لاباس عليك تشاوفت معاك غا البارح..
ياسمين:(حشمانة قدام ختها) لاباس ونتااا
دهاء: نخليكم انا دابا غيكون ولدي مروم الدنيا (خدات من عند ياسمين ساك صغير ديال الحوايج مخلية ليها غي ساكها و زادت لطوموبيل بعدما ودعاتهم)
محمد:(تسنا حتى مشات دعاء عاد جر ياسمين حتى لصقات مع صدرو) تسلمي عليا بايدك خوك انا (هبط باسها فحنكها) ادوي بحالا بايت مقصر معاك
ياسمين:(حدرات راسها حشمانة خصوصا انهم مازال فالزنقة) وا غير حشمت دعاء و الزنقة
محمد:(بعدها عليه شوية و جرها لجيهة طوموبيل حتى ركبو عاد دار عندها بلا مقدمات خدا شنايفها ببوسة جر ليها فمها كامل فيها عاد بعد فمو مخلي جبهتو محطوطة فوق جبهتها كيشوف فاحمرار خدودها و النور اللي على وجهها) اش هاد الزين كامل كل دقيقة تتزيدي تزياني كثر واش مكتعيايش من الزين
ياسمين:(ضحكات بغنج) بصح زوينة؟
محمد:(بعد راسو حتى وضاحت ليه صورتها هايم فضحكتها دوا بصوت حنين) ايلا كان غير الزين اقلبي راك فتيه بدرجات الله يحفظك....
ابتاسمت ليه ياسمين بحبو زادت عنقاتو وهو بدورو زير عليها حتى قدرو يرويو شوية من الشوق عاد حرك الطوموبيل....
محمد:غتكوني باقا ماكليتي
ياسمين:من فطوري
محمد:غندي الحبيبة ديالي تاكل احسن غديوة....
وصلو لسناك شعبي فيه الماكلة الشعبية من رفيسة كسكس لوبيا لحم الراس.... گلسو و ياسمين كدور عينيها من ديما كيعجبوها هاد الأجواء و كيجيوها دافيين...
محمد: دابا غتعرفي احسن اكلة عندي
ياسمين: شنو هي
محمد: الكرعين باللوبيا (شافت فيه بعدم تصديق) اوالله العظيم اختي راه هاد الشوية ديال الكرش اللي خارجة سبابها غا ليدام هههههه
ياسمين:(ضحكات عليه عاد قالت طلبها) راه غتولي بحال البرلماني نقص من ليدام
محمد:(بنظرة لعوبة) متخافيش ازين غاتجي عندي غتمشي
ياسمين:(باستفهام) كيفاش مفهمتش
محمد:(قرب ليها بهيام) نغلق بنهار و نحرق بليل الزين ديال حبيبو
ياسمين:(احمرو خدودها بحشمة و ضربت خمسة على فمها)....
طلبو طلباتهم و جلسو داويين كيتسناو فيهم حتى جاو كلاو عرگوها عاد خرجوو مشادين كيضحكو مقاداهم فرحة....
ياسمين: صافي وصلني للدار خاصني نمشي غتكون ميمة و خالاتي جاو
محمد: وايلي على نوصلك مازال مادوزنا تا جوج سوايع مقادين
ياسمين: راك عارف اليوم الحنة و غتكون العائلة جات
محمد:(بسخط) صافي سيري اختي بالحق مابقا قد ما فات غا وجدي ليا راسك (ضحك بمكر و زادت ضحكتو علات ملي شاف تزنيكتها)..
وصلها تال قدام الباب اللي كان محلول بحال گاااع ديور العرس بحيت بالرغم من انهم قالو مباغين لا عرس لا والو لكن حلفات ثورية تادير ليها ليلتها بالأصول و تركبها فالعمارية و دار العرس راه ديما الرواج.....
وقف قدام الباب دور راسو هاك و هاك مالقا حتى واحد وهو يتلاح عليها ببوسة على غفلة حتى خنقها..... كيقبل فيها بجوع و نهم مكرهش يحيد شنايفها و يديهم معاه يصبروه هاد الليلة.... دامت قبلتهم الفرنسية لمدة طويلة حتى تخنقو و بعدو مساخينش فالبلاصة عنقها لصدرو كينهجو بجوج حتى شبعو.....
محمد:(كيشوف فيها) ولينا كنديرو فعايل البراهش امدام
ياسمين:(كضحك حشمانة) بقات غير ليلة
محمد: يادلي راه هاد الليلة كثر من شهر نزلي اختي نتشاوفو غدا
ياسمين:(تتشوف فيه مترددة حتى زعمات راسها بزز و حدرات بالزربة باستو فخدو و بعدات حلات الباب حتى بغات تنزل و لاحت ليه) كنبغيك (نزلات كتجري مخلياه كيضحك عليها حتى شافها طلعات عاد حرك الطوموبيل متوجه لميحيلو)..
طلعات ياسمين للدار لقات الجليسة ديال الحنة مصاوبة و النقاشة كاينة اللعابات كيسخنو فطعارجهم و بنادرهم العائلة القريبة جات سلمات عليهم و جراتها مها تاكل كلات شوية تاني عاد مشات للبيت لقات دعاء و مريم و هاجر كيلبسو و موجدين ليها هي لبستها اللي كانت عبارة على قفطان بالطرز الفاسي مع سروال قندريسي بنفس الطرز و شربيل ديال الصم الحر فرجيلاتها....
طلقات شعرها اللي كان كيتسبسب بالسوان اللي دارت ليه و كحلات عويناتها بكحل طبيعيي حاااار خلاهم يدمعو و يحمارو مع تزنيكتها الطبيعية و النور اللي فوجهها و نفتة بسيطة ديال مرطب شفاه خلا منظرها يبان روعة.....
#يتبع ❤️❤️