တရားဝင်သမီး လက်ထပ်ထိမ်းမြားခြင်း

Part 74.1

Ch 74

ဂီတစစ်ဆေးမှုက အားလုံးရဲ့အံ့ဩတဲ့သက်ပြင်းတွေနဲ့အတူ ပြီးဆုံးသွားတယ်။ ဘာပဲဖြစ်ဖြစ် အခုဆို ယန်ကျင်းတစ်ခုလုံးမှာ ကျန်းလီရဲ့ စွမ်းဆောင်ရည်က လူပြောများ ရေပန်းစားနေတယ်။အရင်စာမေးပွဲ ၃ခုက ကျန်းလီအပေါ် မယုံသင်္ကာဖြစ်နေတဲ့သံသယတွေ အကုန်လုံးလည်း ပျောက်ချင်းမလှ ပျောက်သွားပြီး လောင်းကစားရုံမှာ မုန့်ဟုန်ကျင်းဘက်က လောင်းခဲ့တဲ့သူတွေတောင် ကျန်းလီဘက်ကို ပြောင်းလောင်းနေကြတယ်။ အပြောင်းအလဲတွေက တဖြည်းဖြည်းချင်း ပြောင်းလာတာဆိုပေမယ့် ကြည့်ရတာ ဒီတစ်ညကျော်လွန်သွားတာနဲ့ လူထုတစ်ရပ်လုံးက ကျန်းသခင်မလေးရဲ့ အစွမ်းအစတွေက ယန်ကျင်းက တခြားသခင်မလေးတွေအောက်မလျော့တာကို တစ်စိတ်တစ်ဝမ်းတည်းထောက်ခံကြတော့မယ် ထင်တယ်။

ဒါက ကျန်းလီအတွက်တော့ ကောင်းတဲ့အရာဆိုပေမယ့် မင်ယီကျောင်းက တခြားသခင်မလေးတွေအတွက် မဆိုနဲ့ဦး အလောင်းအစားလုပ်ထားတဲ့ မုန့်ဟုန်ကျင်းတစ်ယောက် လောလောဆယ် ငြိမ်ငြိမ်တောင် မထိုင်နိုင်တော့ဘူး။

မုန့်အိမ်တော်မှာ သူ့အဖေ မုန့်ယိုဒယ်က အိမ်တောင်ပြန်မလာသေးဘဲ သူ့အမေကတော့ ဧည့်ဆောင်ထဲမှာ မမျှတတဲ့လောကကြီးအပေါ် ငြီးငြူနေရှာတယ်။ မုန့်ဟုန်ကျင်းကတော့ နားနေဆောင်ထဲက မထွက်ဘဲ ဒေါသကြောင့် အခန်းထဲက စာရွက်တွေ မှင်တံတွေပစ္စည်းတွေအကုန်လုံးကို စားပွဲပေါ်က တိုက်ချထားတယ်။ သူ့မျက်နှာက အင်မတန် ဒေါသထွက်နေပုံရပြီး သေချာကြည့်မယ်ဆိုရင်တော့ အကြောက်တရား နည်းနည်းလည်း ပါဝင်နေတာ တွေ့ရလိမ့်မယ်။

တစ်ခဏတွင်းချင်းမှာပဲ အခြေအနေတွေဟာ ဒီလောက်ထိ ပြောင်းလဲသွားပြီ။ မုန့်ဟုန်ကျင်းက အခုထိအရာရာက အိပ်မက်တစ်ခုလိုမျိုးပဲ မှတ်ထင်နေမိတယ်။ အပြင်ကလူတွေအားလုံးက အစက သူ့ဘက်ကလောင်းထားရာကနေ အခုကျန်းလီဘက်ကို ပြောင်းလောင်းနေကြတာ တွေ့လိုက်ရတယ်။ အခုတော့ တခြားသူတွေရဲ့ အမြင်မှာတောင် သူမမှာနိုင်ချေမရှိဘူးလို့ တွေးထင်နေကြပြီ။

ထိုသူတွေတင်မက အမှန်တော့ သူကိုယ်တိုင်တောင် အဲ့လိုတွေးနေမိပြီး အရင်ကရှိခဲ့တဲ့ ယုံကြည်ချက်တွေဟာလည်း ပျောက်ဆုံးသွားခဲ့ရပြီ။ သူက အခုမှ ကျန်းလီက သူ့ကိုလှည့်စားခဲ့တာ သဘောပေါက်သွားတယ်။ ကျန်းလီက ဘာမှမလုပ်တတ်တဲ့ ငနုံငအဆိုတာတွေ အားလုံးက သူ့ကိုလှည့်ဖျားဖို့ ကျန်းလီ သုံးခဲ့တဲ့လှည့်ကွက်တွေချည်းပဲ။ ကြည့်ရတာ ကျန်းလီက အစကတည်းက သူ့ကိုဖမ်းဖို့ ထောင်ချောက်ဆင်ခဲ့တယ် ထင်ပါတယ်။ ဒါကြောင့် သူကိုယ်တိုင် အဲ့ထောင်ချောက်ထဲရောက်အောင် ဆွဲခေါ်ခဲ့တာပဲ။ အမှန်တော့ အရင်ထဲက ကျန်းလီက အကုန်သိနေခဲ့တာ...။