حبيبي مافيوزي الجزء التاني

119

لقيت كلشي مجموع على السفرة والكرسي د نضال معروف ماكايجلس فيه حتى واحد لاهوا لا ديال صابر،مشيت جلست حداه وبدينا كنتعشاو فصمت و السكاااات والعينين كيضورو شي كايشوف فشي وشحال خايب الصمت والنضرات ديال كل واحد كيتسنى يتجبد شي موضوع،بقيت كنشوف وكل واحد كي دايرين تعابير وجهو ، نضال كيشوف قدامو كاياكل وهوا ساهي يعلم الله فاش كيفكر و واحد من الخدم عند راسو حافضو اش كيبغي بلا مايهضر ،كلارا جالسة حداها من الجهة الاخرى ومقابلة معايا انا ،ساكتة و وجها شاحب بحال الى مريضة و عينيها فالطبسيل ديالها حاسة بيها كاتاكل بزز،صوفيا حداها مبتاسمة غير بوحدها و كل شوية نلقاها كتشوف فواحد ، جوليا حداها غير كتفرنس فرحانة وكضحك مع صابر جالس حداها فالكرسي الفوقاني مقابل مع نضال كايتغزلو فيدين بعضياتهم ممسوقينش لينا،اما كراميل جالس حدايا كيعلف ومستاقم فالجلسة نيبا لا، وحداه باريش ماكايبانش ليا شكايدير حيت جا فصفي فين جالسة ،بقينا على داك الصمت تا واحد ما جبد الهضرة وماقال والو. #كلارا. جالسة وكنشوف بطرف عيني ف صابر وجوليا كيتغزلو فبعضياتهم وانا النعمة ما بغاتش دوز ليا مع حلقي غير شادة الفرشيط فيدي و كندورها فالطبسيل،الجسم حاضر والعقل غايب ،كنشوف و نستحمل بزز مني والهضرة د نضال كدور فبالي ،شفت فيه لقيتو ماحاضرش معانا باينة من تعابير وجهو ، ولا يمكن حاضر و كيصرف فينا واحد واحد، بقيت كنشوف فيه و قلبي كيتقطع بحال الى كنشكي عليه تا هز عينو شاف فيا و ابتاسم ابتسامة خفيفة وحرك ليا راسو من الاعلى للاسفل بحال اللي كيقول ليا عليك بالصبر.بقيت هاكا مقبوطة و ماكنبغيش نشوف جيهت صابر مي عيني كتمشي ليه وهوا كااايضحك هوا وجوليا و مرة مرة تبوسو فمو ،صبرت تا عييت وحسيت بعيني كيغرغرو و حلقي تقج وحابسة الجرح بالصبر وانا نوض حانية راسي دخلت ديريكت لبيتي وسديت عليا وعضيت فواحد المخدة وطلقت غوتة فيها خرج معاها داك الصبر كامل للي كنت صابرة وشلال ديال الدوع تا بحيت وحلاقمي تزيرو عليا تخنقت ،بقيت كنبكي ونشهق ووجهي فالمخدة تا بدا راسي يضرني بالبكا وفشلت وبقيت مليوحة هاكاك وحنكي على المخدة فاازكة ونيفي مخنوق ،سخفاااانة ولاكن حاللة عيني كنضور اللقطات ديالهم فبالي و عين كتبكي على عين والمخدة كتشرب فالدموع تا دخل عليا نضال شافيا هاكاك مشوكية ماكندير تا حركة كنشوف غير بعيني ،جا جلس حدايا فجنب الناموسية وساكت كيتنهد و صبعانو على جبهتو عارفاه مبرزط من جيهتي ، بقا كيشوف فيا شحال وهوا يقول ليا.. نضال: اححم... الى مانضتيش تبني احلامك، غاينوض واحد اخر يوضفك باش يبني احلامو...فهمتي شفت فيه كنحاول نفهم اش كيقول وهوا كيشوف فيا تا حط يدو على وجهي وكيمسح ليا عينيا وباسني من جبهتي و طبطب عليا جوج مرات وخرج سد مواراه الباب، جلست كنفكر فداكشي اللي كيقول ليا وكنتقلب ففراشي مابغاش النعاس يجيني وانا نفهم اشنو قصد وعرفتو كيحاول يوريني الطريق بلا فرشة ونتعلم نتصرف الراسي