حبيبي مافيوزي الجزء التاني

186

.وليت كنتفتف بيدي 😢 بعد ما كنت كانشوف 10 على 10 وليت ماكنقشع والو ، معتامدة على السمع وحاسة اللمس،بكييييت وشكييييت وندبت تا عيييت وماخليييت مادرت ولاكن لافاءدة ، حتى واحد ما غيرجع ليا البصر ديالي ، فشيت قلبي فالبكا تا عييت وكنحاول نتقبل انني مابقيتش كنشوف واالو ، لا عاءلتي لا شوارع لا حتى حاجة ، عايشة وصافي ، الحياة ولات مملة عندي ، اسبوع وانا فالفراش كنبكي بالليل وبالنهار ومابغيت حتى واحد يجي عندي ، كراميل الوحيد اللي كيضل حدايا ويوكلني ويشربني وفين ما يجيب ليا ولادي كنسمع صوتهم ونقيسهم كنفاجر بالبكى تا كيبداو يبكيو معايا وماعرفينش علاش...الموت اهون ليا ولا العيشة فالضلام والفقصة ديال البصر اللي مشا ليا...صعيب يوصفو ليك الحاجة كي دايرة ونتا متشوق تشوفها ، مابقااش عندي رغبة فالحياة.من بعد ما مشاو ليا عينيا ولامست واقع الغرابة والضلام والبؤس طفا ضوء الطموح و الاحلام اللي كنت بانياهم ، منهم حلمي للصبي اللي غايتزاد وماغنشوفوش ...فقط غنكتفي بالوصف ديالو ليا ...ولادي اللي غيكبرو وماغنشوفهومش، الشتا اللي على الابواب ماغنشوفهاش ، باختصار حياتي ولات بحال شي تابوت ..ضلااام فضلام كنشوف فيها غير داكشي اللي ديجا شفت كنسمع وكنتشوق نشوف والشوق واللهفة للحاجة هوا اللي كيزيد يمرضني ويقهرني ، مابغيت نحس بحتا واحد كيدور حدايا ولا نسمع شي صوت ديال شي واحد من غير كراميل ، خديت اسبوع منفاردة براسي كنحاول نستوعب الحالة اللي انا فيها ونتقبلها بزز مني حيت انا حيا ، وعايشة واخا ماعايشاش ، اللي كنعرف دابا هوا انني باقة حيا وخاصني نعيش ...عايشة باش نعيش لاغير، ماعايشاش باش نحقق احلام ...ماعايشاش باش نبني طموح ، سلمت امري وحطيت يدي وكنتسنى يشعل شي ضوء يخرجني من هاد الضلام اللي انا ديما فيه ومقناط وممل ..24 على 24 ساعة وانا فيه ، تخيلو حياتي وحياة اي واحد اعمى ، كنت كنشوف وكنقط وكنبدل البلاصة باش نحيد القنط ، ودابا كنقنط وكنبقا فبلاصتي حيت تا بلاصة ماغتحيد ليا القنط والخوف اللي انا حاسسة بيه ، فين ما مشيت غايرافقني هاد الضلام وهاد التابوت للي وليت عايشة فيه . صباح جديد... كراميل: مرواا ...مروااا... مروى: امممم... (كنحل عيني) كراميل: يالاه نوضي ...راه وجديت ليك الدوش والجاكاوزي مروى: واخا... نضت بزز عضامي مهدودين ..اسبوع وانا مريضة فالفراش ونفسيتي محطمة ، واخا ماكنبغي حتى واحد يجي عندي لبيتي مي كنحس بيهم كيجيو ومكيديروش الحس ، كنحس بنضال كيجلس حدايا الليل كامل فاش كنعس وكيمشي كراميل لبيتو ، كيقرب من البيت غير خطوة كنحس بيه ،وفالليل فاش كضربني الفيقة كنوض نجلس ففراشي كنحس بيه جالس مراقبني وماكيديرش الحس ، حتى كيصبح الحال وكيجي عندي كراميل ، هاكا داز الاسبوع حسيت براسي شوية هاد الصباح ونضت شادة فيد كراميل تا دخلني للدوش ومعايا المساعدة ديالي حيداتليا حوايجي و دخلت للجاكاوزي رخيت غضامي، ماكنقدرش نبقى بوحدي ..ضاروري خاص كراميل يكون حدايا وليت كنتمشى وهازا عيني لفوق ...هاكا كنقدر نركز كتر، عاد عرفت علاش الاعمى كيشوف الفوق ...حيت كيتخيل الحاجة ويركز معاها ويرسمها فالضلام اللي هوا عايش فيه، اما نضال من داك النهار وهوا معزول بوحدو ماسمعتش صوتو وحتى النعاس ماكينعسش حدايا والهضرة ماكيهضرش معايا ، ولاكن كنحس بيه ديما بلليل حدايا .