حبيبي مافيوزي الجزء التاني

189

روى قالي كراميل يالله نخرجك شوية وقلت واخا، على الاقل نسرح رجليا شوية على قبل البيبي مسكين اللي مابقيتش كنحس بيه كيتحرك بكترة الجلاس ديالي، لبسو ليا حوايجي وقادو ليا وجهي ولاكن ماعارفاش كاع اش لابسة كنحس بيهم كيلبسو ليا سبرديلة فرجلي وقادوني وشديت فيد كراميل وغادا كنسبق رجلي حتى كنتأكد ماكاين حتى حاجة قدامي عاد كنزيد نحط الرجل التانية ، واخا كراميل شاد فيا مي كنخاف ، كنحس بقلبي كيضرب بالجهد ماعارفاش فين غادا وفي انا ، الى طلق مني كراميل ماغانعرف اشمن تيجاه نمشي فيه ، واش نرجع اللور ولا نزيد القدام ولا جنب ، احساس خااااايب تلقى راسك وسط واحد النقطة ضاير بيها السواد خرجت لاسقة فيه وخايفة نضيع ولا يطلق مني ونتلف ولا نطيح وتوقع ليا شي حاجة خايبة ، بقيت غادة لاسقة فيه تا.. مروى: اااااععو (غوت وعنقتو) كراميل: ماتخافيش ...حنا فلاسانسور، راه هابط بينا غير ماتخلعيش مروى: اففففف...ناري كان قابي غيسكت، من غير ماخرجناش ، كن بقيت فالبيت ، حتى يلا تلفت فيه راه غنبقى غير بين الحيوط، ماشي بحال هنا ، هادشي كيخلع اهىءاعىء😢 ...انا خايفة كراميل: هانا معاااك ...تهناااي، ماغانطلقش منك واخا يوقع للي بغا يوقع ...زيدي وتهناي ، حاصك شي عصية ديباني بيها باش تعرفي فين كتزطمي مشيت لاسقة فكراميل ا ضربني الريح لوجهي وسمعت صوت الكوموبيلات شي غادي شي جاي عرفت راسي خرجت من الاوطيل ، طلعوني فالطوموبيل وبقينا غاديين وانا شادة فكراميل شدة العمى فالضلمة تا حبسات الطونوبيل ونزلني ، بديت كنسمع السكاااات غير صوت الشجر كيتحرك و العصافير و الناس كضحك وصوتهم مديح الريح وريحة فشكل ،مختالطة مع التراب و الهواء نقي مروى: كراميل! واش حنا فشي جردة؟؟؟ كراميل: ههه 😍 ااه باش عرفتيها؟ مروى: حسيت بالارض عوجة ماشي مسطحة و الريحة فشكل والناس كااالم صوتهم كيديه الريح كراميل: ياااي 😍 هانتي وليتي كتأقلمي مع الحياة...شدي فيا نساريك شوية ونمشيك، حنا فجريدة زويييونة ، وماغاقولش ليك فين وقفنا حتى نشوف واش تقلعي نتي ولا لا، دابا يا الكبييييدة ديالي (باسني فحنكي) غادي تحااولي طوري الحواس ديالك باش تعلمي تحسي بشنو كايضور بيك حسن ماتشوفي ، اصلا مابقى فالدنيا مايعجب مروى: هههه عارفاك كطلع ليا المعناويات.. كراميل: دربي دابا الحواس ديالك و نميهم ، فراسك تشوفي بحواسك حسن ما تشوفي بعينيك، اللي كيحس راه كيحس بكلشي وديما كيمشي فالطريق الصحيح ، اما اللي كيشوف غالبا ماكايشوفش كلشي كلشي ؛ وتقدر عينو تكدب عليه ، وتوريه شي حوايج اللي كايشوفهم هوا غالطين وكيفهمهم غالطين مروى: بصح!!! زعما ماشي اي حاجة كنشوفوها كتكون حقيقية! زعما نقدرو نكونو شفنا شي حوايج واداونا وهما ماشي حقيقيين كراميل: وي ، الى شفتي بقلبك وعقلك كاع ماغاتلفي ، وغاتكوني كنشوفي الدنيا من منضور اخر ، وغتهناي من العينين ، حيت العينين شي مرات كيوريونا غير الحوايج اللي يمرضونا ويقهرونا مروى: (وقفت) بصح ، تمنيت كن مابقيتش نشوف قبل مانشوف داك الفيديو كراميل: اشمن فيديو؟ مروى: ماعرفتش لحد الان واش داكشي اللي شفت حقيقي ولا لا ، شفت راصي ... (غوت) اااي...شد فيا 😠 هانا كنت غانطيييح تفووووو...واش ماتعرف حتى توريني فين كانزطم كراميل: صافي مانعاودش ...اففف ، ماتبقايش تغوتي ..شي نهار نموت بسباب الففزات اللي كتقفزيني يخخخ،شرشمتي ليا حوايجي (كيقاد حوايجو) صافي براكا علييك ، ضرتي حتا شبعتي ، يالاه نمشي نجلسو فشي كافي ، ونيت باش تاكلي شوية مروى: مافيااش جووووع كراميل: البيبي اللي فيه الجوع ماشي نتي ، غادي يموت ليك تما . جرني وركبني فاللوطو وانا تابعة السمع واللشم باش نفرز الاماكن ، وصلنا ونزلنا كنسمع الهضرة بزاف وموسيقى هادءة والناس كتهضر بيناتهم ، زدنا شوية حسيت بتلدفىء زايد عالى الخارج والهضرة دالناس مجموعة فمكان واحد ماشي كيديها الريح بحال برا، عرفت بلي دخلنا لكافي ، بادقا غادي بيا تا جلسني وهيا ضربني ريحة رجولية لنيفي قريبة مني ، وحسيت بحركة زايدة معانا ن غيري انا وكراميل. صابر: مروا سافا