បល្ល័ង្កស្នេហ៍ (រដូវកាលទី ០២ : SELFISH LOVE) [ ចប់ ]

ភាគទី៤៦

បល្ល័ង្កស្នេហ៍                    
ភាគទី៤៦💔

ងឹត!គ្រឹប
ឡានស្ព័រទំនើបបើកចូលមកលឿនស្លេវដូចជារន្ទះរួចក៏ឈប់ចតនៅចំពោះមុខវីឡាត្រកូលហ្វាល់លីដា មុននឹងរាងកាយខ្ពស់ស្រឡះបោះជំហានចុះទៅយ៉ាងលឿនហាក់ដូចជាមានធុរៈបន្ទាន់ចឹង អ្នកបម្រើប្រញាប់ស្ទុះស្ទារនាំគ្នាមកអោនគំនាបដល់ភ្ញៀវដែលទើបមកដល់នោះតែក៏មិនទាន់ព្រោះថាដំណើរបោះជំហានគេលឿនរហ័សខ្លាំងពេក នាយកម្លោះស្ថិតនៅក្នុងឈុតឧត្តមសេនីយ៍រហ័សចូលមកខាងក្នុងវីឡាគាប់ជួននឹងលោកស្រីម្ចាស់វីឡាចេញមករួមជាមួយនឹងចៅប្រុសក្នុងដៃផង យ៉ុនហ្គីក៏បន្ថយល្បឿនជើងមកជាយឺតៗរួចក៏អោនគំនាបគោរពគាត់
"ខ្យល់អីបក់លោកឧត្តមសេនីយ៍យ៉ុនមកទីនេះ?"លោកស្រីសាន់ត្រាពរចៅប្រុសសំណព្វជាប់នឹងដៃហើយគាត់ក៏ប្រឡែងជាមួយគេជារឿយៗ ក្មេងតូចជុននីអូកាលបើក្រឡេកឃើញយ៉ុនហ្គីឯណោះគេក៏ញញឹមបញ្ចេញថ្ពាល់ខួចមកកាន់នាយហាក់ដូចជាពាក្យស្វាគមន៍ចឹង យ៉ុនហ្គីញញឹមតបហើយក៏លើកដៃអង្អែលក្បាលគេទាំងក្នុងចិត្តខ្នក់ក្នាញ់តែភ្នែកគេក៏ងាករ៉េសម្លឹងមើលជុំវិញហាក់កំពុងរកនរណាម្នាក់ជាបន្ទាន់ លោកស្រីសាន់ត្រាឃើញក៏អាចកាត់ន័យដឹងទើបគាត់គោះស្មាយ៉ុនហ្គីបន្តិចមុននឹងលើកដៃចង្អុលទៅផ្នែកម្ខាងនៃវីឡា
យ៉ុនហ្គិចោលក្រសែភ្នែកសម្លឹងមើលតាមដៃរបស់លោកស្រីសាន់ត្រាទើបឃើញវត្តមានរបស់មនុស្សដែលគេកំពុងតែចង់ជួប ស្នាមញញឹមក៏ញ៉ោចឡើងលើផ្ទៃមុខស្រស់សង្ហារបស់ឧត្តមសេនីយ៍វ័យក្មេងម្នាក់នេះ គេក៏ងាកមកអោនគំនាបលោកស្រីសាន់ត្រជាថ្មីរួចក៏ប្រញាប់បោះជំហានចាកចេញទៅ ការចាកចេញរបស់គេស្ថិតនៅក្រោមការតាមសម្លឹងមើលជារឿយៗរបស់ក្មេងប្រុសតូចដែលកំពុងតែនៅក្នុងរង្វង់ដៃជីដូន..
"លោកពូមើលទៅមានអំណាចណាស់តែគាត់ក៏គួរសមនឹងគ្រប់គ្នា"
"បែបនេះហើយដែលហៅថាបុគ្គលិកលក្ខណៈរបស់មនុស្សថ្លៃថ្នូរណាចៅប្រុសយាយ លោកប៉ា លោកពូយ៉ុននឹងអ្នកធ្វើការផ្សេងទៀតភាគច្រើនគឺតែងប្រកាន់ខ្ជាប់នូវក្រមសីលធម៌បែបនេះ យាយចង់ឲ្យចៅប្រុសយាយរៀនតាមលោកប៉ានឹងលោកពូ"លោកស្រីសាន់ត្រានិយាយឡើងមកហាក់ប្រាប់ពីបំណងរបស់គាត់ ក្មេងតូចក៏ងាកសម្លឹងមើលទៅលោកយាយរួចងក់ក្បាលញាប់ស្អេកតែម្ដង ជាការពិតណាស់គេតែងតែចង់ធ្វើឲ្យដូចជាលោកប៉ារបស់គេ ប៉ាគេជាrole modelគេស្រាប់ទៅហើយ។