ငါ့တပည့်တွေ အကုန် ဗီလိန်တွေချည်းပဲ

အခန်း (၇) စတင်ပဲ့ပြင်

Burmese Translation of {我的徒弟都是大反派} by author 谋生任转蓬

Translator - ME

အခန်း (၇) စတင်ပဲ့ပြင်

_____________

လုကျိုးသည် တပည့်လေးယောက် ရှေ့၌ ရပ်ကာ သူ့မျက်လုံးအကြည့်များက တွမ့်မူရှန်းမှသည် မင်ရှစ်ရင်၊ မင်ရှစ်ရင်မှသည် နောက်ဆုံး ကျောင်းယွဲ့ဆီသို့ တစ်ယောက်ချင်းဆီ ဖြည်းဖြည်း အကဲခတ်ကြည့်သွားလေသည်။

"ယွမ်အာလေး"
ဤခေါ်သံကြောင့် တွမ့်မူရှန်းနှင့် ကျန်တပည့်နှစ်ယောက် ကျောချမ်းသွားကြရသည်။

"ရှစ်စွင်း..." ယွမ်အာလေးက ချက်ချင်း ပြန်ထူးသည်။

"မင်း ထလို့ရတယ်" 

"ဟုတ်ကဲ့"

သူမ၏ သစ္စာစောင့်သိမှုက ၆၅ ရာခိုင်နှုန်းထိတက်လာပြီး တွမ့်မူရှန်း၊ မင်ရှစ်ရင်နှင့် ကျောင်းယွဲ့တို့၏ သစ္စာစောင့်သိမှုမှာ ၃၀၊ ၂၀ နှင့် ၄၀ ရာခိုင်နှုန်း အသီးသီး၌ ရှိနေကြသည်ကို လုကျိုး သတိပြုမိလိုက်သည်။ ၎င်းတို့၏ သစ္စာစောင့်သိမှုများကား ဆက်၍ မကျဆင်းတော့ဘဲ တဖြည်းဖြည်း တက်လာနေသည်။ သို့သော် ဤအတိုင်းအတာသည် လုံလောက်သည်ဟု ဆိုနိုင်ရန် ဝေးစွ။

သူ ကျန်သုံးယောက်ကို ဘာမှ မပြောတော့ဘဲ နဝမတပည့်ကိုသာ ပြောလိုက်တော့သည်။

"ငါ ပင်ပန်းနေပြီ၊ ငါ့ကို တွဲထားပေး၊ ပြန်ကြရအောင်"

ယွမ်အာလေးကတော့ ကြိတ်ပြီး ဝမ်းသာသွားမိလေသည်။ သူ့အနားကို ခြေလှမ်းစိပ်ကလေးတွေနှင့် ရောက်လာပြီး သူ တောင်ပေါ် တက်ရာလမ်းတစ်လျှောက်မှာ နာခံလိမ္မာအလိုက်သိသော အစေခံမိန်းမငယ်လေးပမာ တွဲထူထိန်းထားပေးလေ၏။ ရလဒ်ကတော့၊ တွမ့်မူရှန်းနှင့် ကျန် တပည့်နှစ်ယောက် နောက်မှာ ချန်ထားခံခဲ့ရ၏။

သူတို့ ဒူးထောက်နေရာမှ ထ၍ ရပြီဟု ဆရာသခင်က ပြောမသွားသောကြောင့် မိမိတို့ သဘောရှိတိုင်း မထဝံ့ကြပေ။ ထိုမျှမက၊ ဆရာသခင် ရိုက်လိုက်သည့်တစ်ချက်ကြောင့် ဒဏ်ရာရထားသည်ဖြစ်ရာ ယခုအချိန်၌ အခြေအနေမဟန်ကြ။

"လောင်စစ်၊ မင်းကြောင့် ငါအခု အကျဉ်းအကြပ်ထဲရောက်ရပြီ..." တွမ့်မူရှန်းက ဖြူဖပ်ဖြူရော်နှင့် ပြောလာသည်။