ငါ့တပည့်တွေ အကုန် ဗီလိန်တွေချည်းပဲ

အခန်း (၃၃) အသက်ရှင်ဖို့ သုံးလပဲ အချိန် ကျန်တော့တယ်

Burmese Translation of {我的徒弟都是大反派} by author 谋生任转蓬
Translator - ME

အခန်း (၃၃) အသက်ရှင်ဖို့ သုံးလပဲ အချိန် ကျန်တော့တယ်

ကျောင်းယွဲ့က ပြုံးပြီး ပြောလိုက်၏။ “လောင်ပါ့က သူ့ရဲ့ အားနည်းတဲ့ ကျင့်ကြံဆင့်နဲ့ သူ့ကိုယ်သူ မိစ္ဆာဘုရင်လို့ ခေါ်ရဲသေးတာပဲ ”

ကျိထျန်းတောက်၏ တပည့်ကိုးယောက်ထဲတွင် ကျူးဟုန်ကုန်းက ယွမ်အာလေးထက် အနည်းငယ်သာ ပိုသန်မာသည်။ သို့သော် ယွမ်အာလေးက ဂိုဏ်းကို ဝင်ခဲ့တာ ငါးနှစ်သာ ရှိသေးရာ သူ့ကို ကျော်တက်သွားဖို့ အချိန် သိပ်မလို။ ထို့ကြောင့် အနည်းငယ် ရူးကြောင်ကြောင်နိုင်သည့် သူတို့၏ အဋ္ဌမမြောက် ရှစ်တိက သူ့ကိုယ်သူ မိစ္ဆာဘုရင်ဟု ခေါ်တာကို ကျောင်းယွဲ့က ကြားသောအခါ မပြုံးဘဲ မနေနိုင်တော့ချေ။

သို့သော် ယဲ့ထျန်းရှင်းက ပြောလိုက်၏။ “လောင်ပါ့က အားနည်းလွန်းတာ မဟုတ်ဘူး၊ ဒါပေမဲ့ အဲ့ဒီ အဘိုးကြီးက သန်မာလွန်းနေတာ”

ကမ္ဘာလောကကြီးကို လှုပ်ခါစေသည့် အချိန်က ထိုနှစ်များအတွင်း သူလုပ်ခဲ့သည့် အံ့ဩဖွယ် လုပ်ရပ်များကနေ ကျိထျန်းတောက်အကြောင်းကိုသာ သိကြသည်။ သို့သော် မိစ္ဆာအိုကြီးနောက် လိုက်ပါရသည့် ခံစားချက်ကို သူ၏ တပည့်များသာ သိပေသည်။

စီမိသားစုရှိ လူများကို ကယ်တင်ပြီးနောက် သူတို့သည် လုကျိုးကို ဒူးထောက်ကန်တော့ကာ ကျေးဇူးတရားများ ဖော်ပြကြ၏။ ထင်သည့်အတိုင်းပင် လူအယောက်တစ်ရာ၏ ရိုသေလေးစားမှုကို ရရှိသောအခါ ကုသိုလ်အမှတ်များ ရရှိသည်။ သူတို့ထဲမှ လူအများက အကြိမ်ရေများစွာ ကန်တော့ခဲ့သော်ငြား သူအမှတ်ပိုမရပေ။ ဆိုလိုသည်က ထပ်တိုးကန်တော့တာက ကုသိုလ်မှတ်ပိုမရစေနိုင်ဟု ပြောလိုက်တာပဲ ဖြစ်သည်။ ျ

ယွမ်အာလေးကလည်း သူမ၏ မိခင်နှင့် ပြန်ပေါင်းစည်းသွားပြီး သူမအဖို့ စိတ်လှုပ်ရှားစရာ ဖြစ်နေသည်။ သူတို့ စကားကြာကြာ မပြောရသေးခင် လုကျိုးက ထိုလူများ အားလုံးကို အိမ်တော်ဆီ ပြန်ပို့ခိုင်းတာက နှမြောစရာ ကောင်းလှသည်။ သူတို့၌ ကယ်ရန် တစ်စုံတစ်ယောက် ကျန်နေသေးသည်။ သူမ၏ ဖခင်က အမည်မသိ နက်နဲသော ကျင့်ကြံသူတစ်ဦး၏ လက်ထဲတွင် ရှိနေသေးသည်။