ငါ့တပည့်တွေ အကုန် ဗီလိန်တွေချည်းပဲ

အခန်း (၂၆) ပြန်ပေးဆွဲမှုကို စုံစမ်းခြင်း

Burmese Translation of {我的徒弟都是大反派} by author 谋生任转蓬

Translator - ME

အခန်း (၂၆) ပြန်ပေးဆွဲမှုကို စုံစမ်းခြင်း

ယနေ့ခေတ် ကျင့်ကြံရေးလောက၌ ဂိုဏ်းသားပေါင်း သောင်းချီရှိသော  ငရဲဂိုဏ်းကား အကြီးမားဆုံး ဂိုဏ်းအဖြစ် သတ်မှတ်နိုင်ပေသည်။ ထိုအရာက သမာသမတ်ဂိုဏ်းများ၏ အကြောက်တရား ဖြစ်လာသလို တစ်လောကလုံးရှိ သမာသမတ်ဂိုဏ်းများ၏ ဘုံရန်သူလည်း ဖြစ်လာသည်။

ဤသို့ အမုန်းတီးခံ ဂိုဏ်းတစ်ဂိုဏ်းအနေနှင့် အကြောက်တရားမရှိဘဲ ဂိုဏ်းသားများကို ပွင့်လင်းမြင်သာ လက်ခံနေလိမ့်မည်ဟု ထင်ထားကြမည် မဟုတ်ပေ။

“ လူအိုကြီး … ဒါက ခင်ဗျားရဲ့မြေးလား ။ သူမရဲ့ အလားအလာက ခင်ဗျားထက် ပိုကောင်းပြီးတော့ ရုပ်လေးကလည်း လှတယ်။ ဒါပေမဲ့ ကျုပ်တို့ခေါင်းဆောင်ကို ပြောပြီးတော့ ခင်ဗျားတို့ နှစ်ယောက်လုံးကို ဝင်ခွင့်ပေးခိုင်းလိုက်မယ် ”

အမျိုးသား မရိုးမသားပြုံးရင်း ပြောလိုက်သည်။

‘ရှစ်စွင်းက ဘာမှမပြောဘူးဆိုတော့ ဒေါသထွက်နေတာပဲ နေမယ်။ ရှစ်စွင်းက ငါတို့ကို လူမသတ်ရဘူးလို့ ပြောထားပေမဲ့ လူမရိုက်ရဘူးလို့မှ ပြောမထားတာ … ’

ထိုအကြောင်းကို တွေးမိပြီး ရှောင်ယွမ်အာလေးက အလျှင်အမြန် ပြေးသွားလိုက်ပြီး ခြေထောက်ကို မြှောက်ကာ ထိုအမျိုးသား၏ ရင်ဘတ်ဆီ ကန်ချလိုက်တော့သည်။

ထိုအမျိုးသားက သွေးတစ်ပွက်အန်ရင်း ဘောလုံးတစ်လုံးလို လွှင့်ထွက်သွားလေသည်။ ဈေးဆိုင်သုံးဆိုင်ကို တိုက်မိပြီး ဆယ်မီတာလောက် လွင့်စဉ်သွားပြီးနောက် ပြုတ်ကျသွားသည်။

ထိုကန်ချက်က သူ့ကို သေလုနီးပါး ဖြစ်သွားစေခဲ့သည်။

ထိုအရာက ဘေးလူများကို ကြောင်အမ်းသွားစေပြီး ကြောက်ကြောက်လန့်လန့်ဖြင့် မြန်မြန် နောက်ဆုတ်လိုက်ကြသည်။

“ သူမက စည်းမျဉ်းတွေအပေါ် လေးစားမှု မရှိဘူးလား ”

ကံဆိုးစွာဖြင့် သူမသာ စည်းမျဉ်းအကြောင်း သိနေပါက ရှောင်ယွမ်အာ မဟုတ်တော့ပေ။