ငါ့တပည့်တွေ အကုန် ဗီလိန်တွေချည်းပဲ

အခန်း (၉၆) အမှန်တရားနှင့် အလိမ်အညာများ

အခန်း (၉၆) အမှန်တရားနှင့် အလိမ်အညာများ

တင်းဖန်ချိုး၏ တပည့်များက လုကျိုးသည် သူတို့ဆရာကို ယဉ်ကျေးမှုမရှိ ခေါ်ဆိုနေသောကြောင့် ဒေါသထွက်လာကြသည်။ သို့သော်လည်း သူတို့ တတ်နိုင်သည့်အရာ မရှိပေ။

တင်းဖန်ချိုးက လက်နောက်ပစ်လျက် ရပ်နေသည်။ သူက လုကျိုး၏ အပြုအမူကို စိတ်ထဲ ထားဟန်မပေါ်ပေ။ ထို့အစား သူ့အာရုံက ရှောင်ယွမ်အာဆီသာ ကျရောက်နေသည်။

ထိုစဉ် လုကျိုးက မုတ်ဆိတ်မွေး သပ်နေလေ၏။ သူက ဘယ်ညာကြည့်လိုက်ပြီးနောက် ဆင်ဘုရင် ကျောပေါ် အသာလေးခုန်တက်လိုက်ပြီး ရထားလုံးထဲ ဝင်လာလိုက်သည်။

ရှောင်ယွမ်အာက ထိုသို့ မလုပ်ချင်ပေ။ သို့သော်လည်း သူမ ရှစ်စွင်းဖြစ်သူ၏ အပြုအမူများကို မြင်လိုက်ပြီးနောက် စီးတော်ယာဉ်အပေါ် တက်ရုံမှအပ ရွေးချယ်စရာ မရှိတော့ပေ။

‘ ရှစ်စွင်းက ဒီမှာရှိနေမှတော့ ဒီလူတွေ ဘာမှလုပ်နိုင်မှာ မဟုတ်ပါဘူး ’

ရထားလုံးက နေရာကျယ်ဝန်းပေ၏။ လုကျိုးနှင့် ရှောင်ယွမ်အာတို့က တောအုပ်မြင်ရသည့် ဘေးဘက်တွင် ဝင်ထိုင်လိုက်ကြသည်။

သိပ်မကြာခင် တင်းဖန်ချိုးက ရထားလုံးထဲ ပေါ့ပေါ့ပါးပါး ခုန်ဝင်လာကာ တခြားဖက်တွင် ထိုင်လိုက်သည်။ သူက အမိန့်ပေးပြီးနောက် ဆင်ဘုရင်ကြီးက ဆက်သွားလေသည်။ သူ့ခြေလှမ်းလှမ်းလိုက်တိုင်း မြေကြီးပေါ် ခြေရာအနက်ကြီးများ ထင်နေခဲ့သည်။ အမြန်နှုန်းကလည်း လက်သင့်ခံနိုင်ဖွယ် ဖြစ်၏။

လုကျိုးက အတော်လေး ကျေနပ်နေမိကာ ခေါင်းညိတ်လိုက်ပြီး  “ ဆင်ဘုရင်ကို နာခံအောင်လုပ်ဖို့ မလွယ်ဘူး ”

တင်းဖန်ချိုးက မထူးမခြားနား ပြောလိုက်သည်။ 

“ဆင်ဘုရင်က ဘာမှမဟုတ်သေးဘူး။ ရွှေနန်းဥယျာဉ်တောင်ထိပ်မှာ နောက်ထပ် စီးတော်သားရဲ ဆယ်ကောင်လောက် ရှိသေးတယ် ”

ရှောင်ယွမ်အာက ထိုအကြောင်း ကြားလိုက်ရသည့်အခါ မျက်လုံးဝေ့ကြည့်လိုက်သည်။

‘ ဆက်ဖြီးဖြန်းလိုက်စမ်းပါဦး ’

တင်းဖန်ချိုးက ရှောင်ယွမ်အာ၏ မယုံသည့် အမူအရာကို မြင်လိုက်ပြီးနောက် သဘာကောင်းစွာဖြင့် မေးလိုက်သည်။