ငါ့တပည့်တွေ အကုန် ဗီလိန်တွေချည်းပဲ

အခန်း (၁၁၄) ငါက အရင်ကလို မဟုတ်တော့ဘူး

အခန်း (၁၁၄)  ငါက အရင်ကလို မဟုတ်တော့ဘူး

လျှို့ဝှက်ခန်းအတွင်းတွင် ဖြစ်သည်။

လုကျိုးက လျှို့ဝှက်ဆန်းကြယ်သေတ္တာအား သူ့စွမ်းအားဖြင့် ဆက်တိုက် ဖွင့်ကြည့်နေဆဲ ဖြစ်သော်လည်း သေတ္တာကား အထိအခိုက်မရှိ နဂိုအတိုင်း ကျန်ရှိနေဆဲ ဖြစ်၏။

‘ဖွင့်မရတဲ့ သေတ္တာ … အဲဒါ ဘာကို ဆိုလိုချင်တာလဲ။ ငါက ဘာမှမဟုတ်တဲ့အရာအပေါ် ကုသိုလ်ရမှတ် နှစ်ထောင် သုံးခဲ့မိတာလား’ လုကျိုးက သေတ္တာကို သေချာလေ့လာကြည့်လိုက်သည်။ သေတ္တာပေါ်မှ မြောင်းရာများအပြင် တခြားဘာမှထူးထူးခြားခြား မရှိပေ။

လုကျိုးက သူ့လက်နက် အမည်မဲ့ကို သတိရလိုက်သည်။

ဒီသေတ္တာကို အမည်မဲ့နဲ့ ဖွင့်ကြည့်လိုက်ရင် ဘာဖြစ်မလဲ …

သူက ညာဘက်ကို အသာမြောက်လိုက်သည့်အခါ အမည်မဲ့က လက်ရာမြောက် ဓားတစ်ချောင်းအနေနှင့် ထွက်ပေါ်လာသည်။ သူက အသာလေး ဝေ့ယမ်းလိုက်သည်။

ဘန်း

အမည်မဲ့က လျှို့ဝှက်ဆန်းကြယ် သေတ္တာနှင့် ထိပ်တိုက်တွေ့သွားကာ မီးပွားများ လွင့်စဉ်လာသည်။

လုကျိုး၏ ဦးဆုံးတုံ့ပြန်မှုက အမည်မဲ့ကို စစ်ဆေးကြည့်ရန် ဖြစ်၏။ ထိုအပေါ်တွင် ခြစ်ရာမရှိမှ သေတ္တာကို ကြည့်လိုက်သည်။ အမည်မဲ့အတိုင်း အထိအခိုက် မရှိပေ။ တစ်ခုတည်းသော ပြောင်းလဲမှုမှာ အပေါ်ယံရှိ ခြစ်ရာလေးတစ်ခု ဖြစ်၏။ လုကျိုးက မျက်တောင်ခတ်လိုက်သည့်အခါ ထိုခြစ်ရာလေးက ပျောက်ကွယ်သွားလေသည်။ အရည်ပျော်ကျသွားသကဲ့သို့ ဖြစ်သည်။ အမည်မဲ့က ပိုအဆင့်မြင့်မှန်း သိသာလှသည်။ သို့သော်လည်း သေတ္တာ၏ ပစ္စည်းကလည်း အတော်လေး ထူးခြားလှသည်။ သူ့ဘာသာ နဂိုအတိုင်း ပြန်လည်ထိန်းသိမ်းနိုင်စွမ်း ရှိ၏။

အမည်မဲ့က အမှောင်စစ်သည်‌တော်၏ မြေကမ္ဘာအဆင့် လက်နက်ကို ချိုးဖောက်နိုင်လေသည်။ ဆိုလိုသည်မှာ ဤသေတ္တာကလည်း ကောင်းကင်အဆင့် လက်နက်ထက် ပိုမာကြောလေ၏။

လုကျိုးက မတ်တတ်ရပ်လိုက်သည်။ သူက သေတ္တာကို မလေ့လာတော့ဖို့ ဆုံးဖြတ်လိုက်သည်။ စနစ်က သူ့အား သေတ္တာရောင်းချလိုက်သည့်အတွက် အသုံးဝင်မှုတော့ ရှိရပေမည်။ ထိုအကြောင်း သောကရောက်လွန်းနေသည်က အဓိပ္ပာယ်မရှိချေ။ အရာအားလုံးက အဆင်ပြေသွားလိမ့်မည်။ သူလည်း နည်းလမ်းရှာတွေ့မည် ဖြစ်ကြောင်း သေချာယုံကြည်ထား၏။