ငါ့တပည့်တွေ အကုန် ဗီလိန်တွေချည်းပဲ

အခန်း (၂၀) ထွက်ပြေးသွားသောတပည့်

Burmese Translation of {我的徒弟都是大反派} by author 谋生任转蓬

Translator - ME 
.........
အခန်း (၂၀) ထွက်ပြေးသွားသောတပည့်

တပည့်များကို သွန်သင်ရခြင်းမှာ ရှည်လျား၍ ခက်ခဲကြမ်းတမ်းသော တာဝန်ဖြစ်သည်။

လုကျိုး မတ်တတ်ရပ်ပြီး လက်နောက်ပစ်လျက် ရှုခင်းကြည့်ဆောင်အပြင်ဘက်ရှိ ရှုခင်းကို လှမ်းကြည့်လိုက်သည်။ ဤကမ္ဘာကူးပြောင်းမှုသည် ကောင်းချီးပေးခြင်းလော ကျိန်စာလော သူ မသိတော့ပေ။

စကြဝဠာ ခရီးသွားများကြား မည်သူ ကံအဆိုးဆုံးလဲယှ‌ဉ်ကြည့်သည့် ပြိုင်ပွဲရှိလျှင် သူသည်ပြိုင်ဘက်မရှိ ချန်ပီယံဖြစ်လိမ့်မည်ဟု ယုံကြည်သည်။

သိပ်မကြာခင်ပင် ယွမ်အာလေးက ရှုမျှော်နန်းဆီ မင်ရှစ်ရင်နှင့်တွမ့်မူရှန်းအား ခေါ်လာခဲ့သည်။

"ရှစ်စွင်း!"

"ရှစ်စွင်း!"

လုကျိုး လှည့်ကြည့်လိုက်ပြီး တပည့်နှစ်ယောက်အပေါ် အကြည့်ရောက်သွားသည်။ မင်ရှစ်ရင်၏ သစ္စာရှိမှုသည် ၅၉ ရာခိုင်နှုန်းတွင် ဖြစ်နေသေးကြောင်း မြင်လိုက်ရသည်။ တပည့်သည် ခုနတုန်းက သူ့ကို ယာယီ လေသံပျော့နေသော်ငြား သူ့ရှစ်စွင်းကို သံသယ ရှိနေသေးဆဲဆိုတာ ပေါ်လွင်ပေသည်။ တွမ့်မူရှန်းမှာ အနည်းငယ် ပိုသာသည်။ သူ့ သစ္စာရှိမှုသည် ၆၅ ရာခိုင်နှုန်းတွင် တည်ရှိနေသေးပြီး အတော်လေးတည်ငြိမ်လှသည်။

ယွမ်အာလေး၏သစ္စာရှိမှုသာလျှင် အမြဲမြင့်နေဆဲဖြစ်ကာ လုကျိုးလည်း သူမကို ပိုမိုယုံကြည်မိသည်။

"ငါမင်းတို့ကို ဒီခေါ်ရတာက ငါ့အတွက် ကိစ္စတစ်ချို့ လုပ်ပေးစေချင်လို့"

"ရှစ်စွင်း၊ ကျေးဇူးပြုပြီး ဘာလိုအပ်သလဲ ကျွန်တော်တို့ကို ပြောပါ၊ ပြီးတော့ တာဝန်တွေ ပြီးမြောက်စေဖို့ ကျွန်တော်တို့ လုံးဝ စိတ်ကိုမြှုပ်နှံထားမှာပါ"

တွမ့်မူရှန်းက ခေါင်းငုံ့ပြီးပြောလိုက်သည်။

"ကျိုးကျစ်ဖုန်းက ကောင်းကင်ဓားဂိုဏ်းကနေ ထွက်ခွာသွားပြီ၊ မင်း သူ့နောက် ခြေရာခံပြီး စုံစမ်းဖို့ တာဝန်ရှိတယ်၊ သူ့အခုလက်ရှိ အဆင့်အတန်းနဲ့ အနေအထားအရ ဂိုဏ်းသစ်ဝင်ဖို့က ပြဿနာရှိမှာမဟုတ်ဘူး၊ မင်း သတင်းတစ်ခုခုရရင် ငါ့ကိုချက်ချင်းသတင်းတင်ပြ"