- နှလုံးသား​စေညွှန်ရာ ... နာခံလေသော ချစ်သူ

part(63)

Unicode

တကယ်တော့ ဇုံဇုံတို့ တိုက်ခန်းငှားနေခဲ့တာမဟုတ်ပါဘူး။ ငှားနေလို့လဲ အဆင်ပြေမှာ မဟုတ်ဘူးလေ။
အဝတ်ပိုသုံးစုံ... မျက်နှာသုတ်ပဝါ... လိုအပ်တဲ့ဆေးဝါးနဲ့မုန့်ခြောက်အနည်းငယ်ကို ကျောပိုးအိတ်ထဲမှာ အသင့်ထည့်ထားရပါတယ်။ မှတ်ပုံတင် ကျောင်းသားကဒ်နဲ့ စာရွက်ပိုင်းလေးတွေရော... ဖုန်းရော... power bankရော.... လိုမယ်ထင်တာတွေကိုထည့်ပြီး သွားလေရာသယ်ရပါတယ်။

ဇုံဇုံတို့သူငယ်ချင်းတစ်စုနဲ့အတူ ကျောင်းသားလူငယ်တွေပါဝင်တဲ့ လူအယောက်သုံးဆယ်လောက်အစုအဖွဲ့ဟာ ခေါင်းဆောင်ဖြစ်မှန်းမသိဖြစ်လာကြပြီး ရန်ကုန်မြို့အနှံ့က ဆန္ဒပြပွဲတွေကိုသတင်းချိတ်ဆက်ပေးကြရပါတယ်။
တစ်နေရာမှာ နေ့တိုင်းရှိမနေကြတော့ပါဘူး။
ဆန္ဒထုတ်ဖော်ပွဲတွေရှိတဲ့ ရန်ကုန်မြို့အနှံကို ရောက်အောင်သွားကြရပါတယ်။ လိုအပ်တာတွေကို ကူပေးရပါတယ်။ လူသုံးဆယ်လောက်အဖွဲ့က ငါးယောက်တစ်ဖွဲ့ခွဲပြီး သွားလာလှုပ်ရှားရပါတယ်။
အရေးကြီးဆုံးကတော့ အားလုံးလုံခြုံကြဖို့နဲ့ တစ်ခုခုထူးခြားရင် ဘာလုပ်မလဲဆိုတာတွေကို တိုင်ပင်ထားကြရတယ်။ ကိုယ့်အတွင်းစည်းမှာ လူညီကြဖို့လဲ အရေးကြီးလာပါတယ်။ ပစ်ခတ်မှုတွေက ရန်ကုန်မြို့ပေါ်က ဆန္ဒထုတ်ဖော်နေရာတွေအထိ ရောက်လာပါပြီ။

.
.
.

ကိုကိုကြီး စိတ်မပူအောင် အတတ်နိုင်ဆုံးပြောခဲ့ရပေမဲ့ တကယ်တော့ ဇုံဇုံတို့က လိုအပ်ရင်ပြေးကြဖို့ လမ်းကြောင်းကိုစီစဥ်ထားကြပြီးသားပါ။ တကယ့်ကို အကြီးကြီးပြင်ဆင်ထားကြရတာပါ။ ပြည်သူ့မျက်နှာကို ထောက်ထားလေမလားဆိုတဲ့ မှိန်ပျပျမျှော်လင့်ချက်တွေကလဲ မဖြစ်နိုင်တော့တာ တစ်ရက်ထက်တစ်ရက်သေချာလာပါတယ်။ နိုင်ငံကြီးတွေရဲ့အကူအညီကရော ရနိုင်မှာလား။
တကယ်တော့.... အရာအားလုံးဟာ.... လိုက်လေဝေးလေဖြစ်ခဲ့ပါတယ်။

နေ့ဘက်မှာ လမ်းမပေါ်တွေတက်ကာ တစ်နေကုန်ပြေးလွှားကြ ပို့ဆောင်ကြ စီစဥ်ကြရတယ်။ ဆန္ဒထုတ်ဖော်ရာနေရာတွေမှာ ဒိုင်းကာမှစပြီး လိုအပ်တာတွေ များလာတာကြောင့် တစ်ယောက်မှသည်တစ်ဖွဲ့ချင်းစီသို့ ချိတ်ဆက်ကူညီကြရပါတယ်။ ကျောင်းသားခေါင်းဆောင်တွေ လုံခြုံဖို့ကလဲ တစ်ရက်ထက်တစ်ရက်ပိုပြီးအရေးကြီးလာပြီး ကိုယ့်အတွင်းလူထဲမှာလဲ သစ္စာမထားသူတွေရှိလာခဲ့ပါတယ်။
.
.
.