فى غرام أفعى

الحلقة السادسة والخمسون :-

#فى_غرام_افعى
#ياسمين_احمد

----------------------------------------

... اتفقوا على كل شيء وتم توزيع الأدوار ووضع الخطة بدقة متناهيه ، كان سيف مكلف بالبحث عن مكان مناسب لإقامة الحفل كما أنه سيكون من المشرفين عليه ، كُلفت صدف بالغناء فى الحفل ثم الذهاب معهم لتنفيذ العملية حيث أصرت على التواجد هناك ، فيشو سيعتنى بأمر الكاميرات ، فجأة هتف أمين بتساؤل حاد :

- أمين :- وانا ! انا هعمل ايه ولا انا ضيف شرف ؟! .

- ياسمين :- انت هتمسك كاميرا وتصور كل حاجة بتحصل مع أمير .

- أمير :- كاميرا ايه ؟ .

- ياسمين :- أى حاجة حتى لو كاميرا موبايل ، احنا هنحتاج شباب مننا محدش يعرفهم اوى يعملوا كأنهم صحافة .

- علي :- عندى شابين كويسين وبثق فيهم ، بس حوار الصحافة ده هيبقي صعب لأن هيتسألوا عن الكارنيهات بتاعتهم .

- ياسمين :- حلو اتنين ، لا ما احنا مش هنقول مين صحفى ومين لأ ، احنا هنفهم إدارة المكان أن فيه تغطية للحفل وفيه ناس هتصور منهم أصحابنا عشان السوشيال ميديا وكدة ولو أى حد سأل مين دول هنقول أنهم تبعنا بس أنا عايزة الشكل العام يوحى أنهم صحافة يعنى يمسكوا كاميرات فيديو وغيره ويلبسوا سيمى فورمال عشان عم علي يحس أن الحوار فعلاً كبير .

- دارين :- طيب ترتيب اليوم ؟ .

- ياسمين :- اليوم هيبدأ الساعة 3 هنبدأ كلنا نستقبل الناس عادى وكلنا هنبقي موجودين ولازم ناخد صور كلنا مع بعض عشان فى باقى اليوم هنتقسم هنبدأ أول فقرة فى الحفلة الساعة 4 بعد ما نرحب بالناس وكدة ، 5 بالظبط فيجو هيغنى وبعدها يطلع يروح الكافيه وانا  وحورس هنروح معاه ونبقي موجودين من بعيد عشان لو احتاج مننا حاجة ، هيبعت رسالة من موبايل البنت لعم علي عشان يروح لها الشقة وهو طبعاً ما هيصدق ، علي هتفضل لازق لعمك عشان لو فكر يمشي قبلها تمنعه بأى شكل لحد ما توصلك رسالة منى تعرفك أن الرسالة اتبعتت ساعتها تسيبه يمشي ، فيجو هيمسح الرسالة من موبايل البنت ويطلب منها أنه يوصلها ويطمن عليها ولما يتأكد إنها رجعت بيتها هيرجع الحفلة ، السؤال عننا هتكون إجابته أن فيجو عنده زياره للدكتور واحنا روحنا معاه عشان نساعده ولو سألوا عن ليه فيشو مش هو اللى معاه هنقول أن فيجو طلب من أخوه يفضل فى الحفلة عشان يبقي متطمن أن كل حاجة تمام وعشان ميتعبوش معاه ، فى خلال الوقت اللى هنكون فيه برا هتعرضوا فقرات تانية منها فقرة صدف لحد ما حورس يرجع يكمل ، وبمجرد ما هنرجع هتبدأ العملية واللى هيشارك فيها انا ودارين وقاسم وسيف ، هنروح الشقة اللى المفروض هيبقي فيها عم علي بس هنخلص عليه ونرجع ، العمارة اللى فيها الشقة تعتبر فاضية مفيش فيها حد غير دكتور ومراته ودول عواجيز وسمعهم رايح فى داهية ودول فى الدور التالت والدور الاول فاضي والتانى فيه الشقة المطلوبة ، مفيش كاميرات فيه بس بواب نايم على الدكة طول الوقت وده من حسن حظنا ، هندخل عادى ونخرج عادى برضه وشوشنا مش هتتغطى غير ساعة ما نوصل الشقة .