ဂန္တဝင်စနစ်

အပိုင်း (၆၇)

ခင်ဗျားကြီးတော်ကြီးကို မှတ်မိရမှာလား...

ခင်ဗျားပြသွားတာက အရမ်းမြန်လွန်းလို့ ကျုပ်မျက်လုံးတွေတောင် နာနေပြီ..

ချင်ကျင်းမှာ ရှက်ရွံ့သွားသောကြောင့် ဟန်ဆောင်လိုက်ကာ:

"မမှတ်မိလိုက်ဘူး... ဒုတိယသခင်က သိပ်ကိုရဲရင့်လွန်းတယ်... လက်နက်ရဲ့ အလျင်က အရမ်းမြန်လွန်းလို့ မှုန်ဝါးဝါးဘဲမြင်လိုက်ရပြီး ကျုပ်..."

"ရပါပြီ"

ကွမ်ယု ခေါင်းကိုက်သွားလေသည်။ အကယ်၍ ချင်ကျင်းသာသူ့အား မမှတ်မိဘူးဟု ‌ပြောပါက သူစိတ်ဆိုးမိမည်ဖြစ်သည်။ သို့သော်ယခု ချင်ကျင်းမှာ သူ့အား အမွှမ်းတင်လိုက်သောကြောင့် သူ မပြုံးဘဲမနေနိုင်တော့ပေ။ ကွမ်ယု မနေနိုင်တော့ဘဲပြောလိုက်ရသည်:

"ဒါဆိုရင် ကျုပ်နည်းနည်းနှေးပေးမယ်"

စကားပြောရင်းပင် နဂါးစိတ်ဝိညာဉ်ပြစ်ဒဏ်ခတ်ခြင်းလှံကိုထပ်ယူကာ ‌လွှဲရမ်းပြပြီး ရှင်းပြလိုက်သည်:

"ဒီလှံနည်းစနစ်က အမည်မရှိဘူး... ဒါပေမယ့် ရန်သူရဲ့ အားနည်းချက်ကို ရှာပြီး တစ်ချက်တည်းနဲ့အနိုင်ယူတဲ့အကွက်... တကယ်လို့ အရှင့်သားတတ်မြောက်သွားရင် အရှင့်သားရဲ့ ခွန်အားက မိုးထိုးသွားလိမ့်မယ်"

ချင်ကျင်းပြုံးလိုက်သည်။ သို့သော် အကြောင်းအရာသေးသေးလေးတစ်ခုကိုတောင် လွတ်သွားမည်စိုးသည့်အလား ကွမ်ယု၏ လှုပ်ရှားမှုများကို ဂရုတစိုက်ကြည့်နေလိုက်သည်။

ထိုအခါ ယန်မော့ပိုင်က ယန်စန်းကိုကြည့်ပြီးမေးလိုက်သည်:

"မင်းကော မှတ်မိလိုက်လား"

"မှတ်မိလိုက်တယ်... ဒါပေမယ့် ကျွန်တော်မှ လှံနည်းစနစ်ကိုမကြိုက်တာ"

ယန်စန်း ကအမှန်ကို ခွန်းတုန့်ပြန်လိုက်သည်။ ထိုနှစ်ယောက်မှာ အသံကို မနှိမ့်ထားသောကြောင့် လူတိုင်းကြားလိုက်ရပြီး ချင်ကျင်း၏ နှုတ်ခမ်းများပင်လှုပ်သွားရသည်။ တဂျီမှာတော့ ပြုံးလိုက်၏။

ငါသည်းခံရမယ်..

ချင်ကျင်း တွေးလိုက်သည်။ သူ့တွင် ကမ္ဘာမြေမှ ကိစ္စများရှိနေသောကြောင့် သူ့အတွေးများမှာရှုပ်ထွေးနေပြီး ယန်စန်းလို ကြည်လင်မနေခဲ့ပေ။ ထို့ပြင် ယန်စန်းမှာ ဒဏ္ဍာရီလာ ပြိုင်ဘက်ကင်းပါရမီရှင်ပင်ဖြစ်နေသေးသည်။