بلاي حبيت نجديه

الجزء الثاني

الساعه 5:00 ص في القريه -نجد-

قاموا على صوت الاذان وصوت ابوهم

ابو سيف بصوت عالي : اصبحنا واصبح الملك لله لا اله الا الله الصلاه ياعيال الصلاه

ام سيف صحت ودخلت غرفه العيال

ام سيف : سلطان يا امك قم اذن الفجر
سلطان: يمه تكفيين انا طالبتس ميت من النوم مارقدت زين
ام سيف : قم ياولد والله ان جاء ابوك وانت نايم لايوريك
سلطان: يمه تكفين خمس دقايق بس
ام سيف : لحول الله خمس دقايق ذي تصير ساعه لزوم تلحق على الصلاة
لفت على عبدالعزيز وقالت : عزوز يمه قم الله يصلحكم قم وراك شغل
عبدالعزيز: سمي يا ميمتي ابشري
ام سيف : الله يرضى عليكم

طلعت وشافت ريما بالمطبخ ركضت ريما وهي تبوس راسها
ريما : صبحتس الله بالخير يا المزيونه
ام سيف : صبحتس الله بالنور يامتس من متى وانتي قايمه
ريما : من اذن
ام سيف : الوكاد خلي نجد تقوم

طلعت ريما وهي تسمع صراخ نجد

نجد : سلطانووه اطلع ولا اعلم امي عليك
سلطان: وان ما طلعت وش بتسوين
نجد : سلطان لا تصير ورع ولا يوصل عند ابوي
سلطان: ورع انتي تستفزعين بابوي دافعي عن نفسك
ما كمل كلامه الا وابو سيف ضربه بالعصا
سلطان: اخوو ساره علامك علي يبه
ابو سلطان: اترك اختك لا اعلمك ان ربي حق
ضحكت نجد وضمت ابوها صباح الخير يا احلى واطلق شيخ القريه
ابو سيف : تصبحتس الله بالنور يانور ابوها صليتي ؟
نجد : ايه افا عليك انا مانيب نفس عيالك الهاملين
كملت كلامها وركضت لامها علشان ما يلحقها سلطان وهو ياشر لها بمعنى اوريك

* رجعوا من الصلاة *
دخلوا على ريحه الخبز و الحليب و القهوه و شبه النار

ابو سيف : شيخه
ام سيف : لبيه
ابو سيف : لبيتي حاجه يابعد عيني
عبدالعزيز : ياعيييينييي على الغزل اناا
ابو سيف : ولد ارفع علومك
عبدالعزيز: سم طال عمرك
اجتمعوا على الفطور
نجد تركض وجلست جمب ابوها قبل سلطان
ريما : نجد ماتكبرين على ذي الحركات
نجد: شعليتس
ابو سيف : هههه الا نجد ابوها مالكم دخل فيها
قام سيف يقلد حركات نجد وانسدح بحضن امه
قال : شعليتس
ضحكوا كلهم ونجد حذفت المناديل عليه
نجد : سااامجججج
ابو سيف : اليوم على عزمت اخوي ناصر واهله على الغدا على سلامه حمد
ام سيف : باذن الله ابشر بالغدا اللي يبيض وجهك
ابو سيف : ماهي غريبه عليتس
_____________________
فبيت ابو صالح
اقبلت عليهم ساره ومعها الفطور ونزلته
ابو صالح : سلمتي
ساره : الله يسلمك
ام ناصر دخلت بالحليب : ساره وانا عمتك صالح راقد لهالحين ؟
ساره : لا يا عمه قاعد يبدل
اجتمعوا على الفطور و وريما بحضن صالح و جود بحضن جدها

ابو صالح : اليوم اخوي عبدالله عازمنا على الغدا علشان سلامه حمد اجهزوا بدري
حمد : الله يكثر خيره ماكان له داعي يكلف على نفسه
صالح : هذا هو عمي يقدر الكبير والصغير الله يطول بعمره
الكل : امين
دخل صالح لغرفته ولحقته ساره
ساره : اقول صالح
صالح : ياعيون صالح امريني ياقلبي
ساره  استحت وقالت: تسلم لي عيونك بس ودي اروح لاهلي اساعدهم بالغدا تعرف امي ماعندها احد يساعدها نجد مدلعه محد يقولها سوي شي وريما باررده 
صالح: ابشري البسي وانا بنتظرك برا
ساره : تبشر بالجنه بس خل جود وريما يجون علشان ابدل لهم
اشر صالح على عيونه وطلع و ساره تلبس عبايتها
جود : ماما خالو سيف بيجي
ساره : ما ادري يا ماما بس بسرعه تعالي علشان ما ناخر بابا على دوامه