بلاي حبيت نجديه

40

نجد : واحلى شعور
فهد : وانتي احلى شعور
نجد : انت الحقنا المزرعه اكيد بنسبقك
فهد: من عيوني
ابو سيف: اجل مشينا ولا يحتاج تاخذون شي القهوه والشاهي قدامكم نبي ناخذ اخبار اهل الامارات
مزنه ضحكت و قالت : يا الجوهره ترفه اخيتي وينها
الجوهره: كيف وين فبيتنا
مزنه التفتفت على ابو صالح و ابو سيف وقالت : هالحين يا اخواني وعزوتي وظهري و سندي وراكم مخلين اختنا ولا قلتوا وانا تخوكم تعالي معنا بيت ابو فهد
ابو صالح : عاد يا مزنه تتوقعين نخلي ترفه؟
الجوهره ضحكت وقالت: يا خاله امي جايينها عماتي علشان كذا
مزنه لفت لسلطان وكان مشغول مع ماجد يلعبه وضربته بعصاتها بمزح
سلطان: بسم الله الرحمن علامتس يا عمه
مزنه : وراك ما تخلي زوجتك تروح عند امها تساعدها
سلطان التفت على الجوهره وضحكت بصوت خفيف ابتسم سلطان وضحك وصد
سلطان: افا يا الجوهره تشكيني عند عمتي
الجوهره: ماقلت شي
مزنه: شد حيلك وجب لنا ورع يماشي وليد ساره و وليد ترف و وليد نجد
الجوهره استحتت و وجها حمر صدت و سلطان ضحك وقال: باذن الله
ام سيف : يا مزنه كل شي بوقته زين
مزنه : جيبوا بنيات شبعنا من العيال
نجد ء: افااا مجود جديد يا عمه
مزنه : كلكم بكفه و بنات صالح على كفه هو اللي مبيضها جايب لنا بنتين
صالح: ييااللبى قلبتس يا عمه
سيف: افا جحدتوا عبود اول حفيد والله يا طرتوا فيه
ريمي : عبود اول حفيد لنا كلنا
عبدالعزيز دخل وهو عاصب رايه بشماغه ورافع اكمامه وثوبه دخل عليهم الا هم جالسين قال : للاااااا عادد تستهبلون انتم انا شكلي بموت
سيف غمز لعبدالعزيز بمعنا اقصر صوتك
عبدالعزيز استوعب على نفسه وقال : السموحه مير يالله قبل تغيب الشمس
. اي صح يبه
ركض عبدالعزيز جمب ابوه وقال : تعرف جارنا ابو....
سلطان : قبل شوي بتاكلنا قم وكمل سالفتك هناك
عبدالعزيز: تمون يا العضيد
راحوا كلهم للمزرعه
تقدمت سياره ابو سيف و نادى بصوته العالي : يااا كامل
كامل جاء يركض وقال : سم يا عمي
ابو سيف : سم الله عدوك افتح البوابه وبلغ العمال يطلعون معي اهلي واهل اخيي ابو صالح و اخيي ابو فهد وجهزوا الذبيحه
كامل: على هالخشم
ابو سيف: عليه الشحم ، القهوه و الشاهي جاهزه؟
كامل: افا عليك اكيد جاهزه
ابو سيف: ها افتح البوابه
فتح كامل بوابه المزرعه ودخلت السيارات كلها
ابو سيف: يا كامل سكر البوابه ولا جاء فهد افتحها
كامل: ابشر
نزلوا كلهم وكانت اصواتهم عاليه و ركض الوراعين عبود وجود وريما
نجد : يمه
ام سيف: هلا يا امي
نجد: يمه ماجد ما يكمل رضعته كامله
ام سيف: ذبحتي الورع توه راضع بالبيت اكيد ما يكملها لا تذبحينه
نجد: احسه انغث
ام سيف: وقفيه لا تنومينه علشان ما يستفرغ بالحليب ويرجع على خشمه ولا ينكتم
نجد : لين متى !
ام سيف : شوي بس
نجد : واخاف شوي يجيه شي
ام سيف: لا اله الا الله يا الرفاله عطيني اياه
ام فهد ضحكت وقالت : علامتس عليها تراها ما تعرف
نجد: خلاص بوقفه
دخلوا كلهم وجلسوا على الزل الاحمر الكبير
ابو سيف: يا صالح خل الوراعين وتعال تقهوى
صالح: ابشر ابشر
عبود : لاا عمي صالح لا تروح
صالح: بتقهوى واجيكم انت وجود انتبهوا لريما
بعد دقايق مرهم عبدالعزيز بالخيل
عبدالعزيز: مين يبيني اشوته ماعاد عماني وعمتي وخالاتي لاني احترمكم الباقي لا
سيف: كبرك انا
عبدالعزيز: يوه نسيت بس انا ودي ابرك على نهيان
نهيان: شو سويت لك
عبدالعزيز: ما سويت شي بس كذا
زايد: حدك على اخوي
عبدالعزيز: ترا بتلحق اخوك ، نزل عبدالعزيز من الخيل وربط الخيل قريب منهم بس بعيد
عبود: عمي خلني اركب الحين و اوري بابا. .......،..
عبدالعزيز سكر فم عبود وضحك وهمس باذن عبود: غبي انت بتفضحنا وتخرب المفاجئه
عبود ناظر بعبدالعزيز وضحك وضرب راسه
سيف: شفيكم
عبدالعزيز: ولدك دايخ
العنود: وجهه يعلم فيه شي
سلطان: عزوز ادهم كيفه؟ ( خيل سلطان)
عبدالعزيز: مابه شي مير ترا عاملك عليه ملاحظات
سلطان: ليه
عبدالعزيز : حتى حقي اجودهم عامل سيف
سيف: مسنعه ولا يوم جاء يدربي راسه
ابو فهد : ودكم سباق بالخيول
سيف: يووه يا عمي انا يمكن لي شهر ما سابقت لاكن كل يوم تقريباً اركب خيلي لاجيت الديره بس امشي مشيه المسار ولا كانتر خفيف
( يمشي بخفيف او سرعه متوسطه )
سلطان: اصبروا انا من تزوجت ما قربتها
عبدالعزيز: انا مايحتاج اقول
ابو صالح : اجل اللي من زمان سوا واللي الفتره الاخيره يعرفون سوا
صالح: انا من زمان للاسف
حمد ضحك وقال : انا مع الجديدين
محمد وحمد التؤام
حمد: كل حمد سنع انا من الجديدين
محمد: مايحتاج اقول
نجد : يوه يا محمد انت مدري كيف
ام فهد : بارد صح؟
نجد : مرره زين وصل لسالفتنا
محمد : ههههه ما اتفقنا على كذا
ابو فهد : فهد من الحارين بس ننتظره
ما كمل كلامه الا دخل فهد عليهم رافع يده ويقول بصوته الرجولي الحاد: السلام عليكم
الكل رد السلام
حمد: الذيب على طاريه
فهد : شرواك الطيب وش العلم
عبدالعزيز: سباق فروسيه
فهد : مشروب فنجالها
الكل : اقققعدد
ضحك فهد ومد الاكياس لنجد وقال : ترا ما مريت بيتهم لقيت خال زوجته ماخذ الاثاث كلله وبايعه ومو مخلي شي حتى فلوس سلمان وذهب زوجته ماخذه
ابو سيف: ماهو من حقه كلها تصير حلال لماجد
فهد مد يدينه يبي ماجد وقال : خله ياعمي ولدي ماهو بحاجه لفلوسهم الخير واجد ولله الحمد وربي رازقني وعندي من الخير الكثير
الكل ابتسم من كلمه ولدي
ابو سيف: الله يزيدك وانا عمك
فهد : امين يارب
عبدالعزيز : لا تسوي لي فيها سيف عند راسي امش ورانا تسخين
سيف: مافهمت
عبدالعزيز: مثلك لا شفت عبود
الكل ضحك على عبدالعزيز وهبالته
فهد : اقعد اقعد نتقهوى ماهو طاير الخيل
عبدالعزيز: عبود تعال
راح بعيد مع عبود وقال
عبدالعزيز: اسم انا بجيب لك الخيل هنا وانت اركب وتعال ليييين عندنا شف هنا ( اشر له ) جمب جلستنا ولا قام ابوك قل انا اعرف علي وانطلق ونفس ما عملتك كيف المشيه تشد ظهرك ترخي اللجام رجلينك على قدام وتصوت للخيل تم؟
عبود: على خشمي
عبدالعزيز خلك هنا بجيبه لك
راح عبدالعزيز وسحب خيله
ابو فهد: خله عنك وتعال تقهوى
عبدالعزيز: برجعه بس
راح عبدالعزيز وترك الخيل عند عبود وركبه فيه
عبدالعزيز: اذا ودك امش هنا شوي ثم تعال
راح عبدالعزيز وجلس معهم
عبدالعزيز: سيف ليه ما تعلم عبود من زمان يبي يتعلم
سيف: بعده صغير
عبدالعزيز: يبي يركبه لحالع
سيف: اي متهور
مدت الجوهره الفنجال لابو سيف وقالت : تقهوى ياعمي
ابو سيف: سلمتي
قطع عليهم صوت حوافر الخيل وهو جايهم التفتوا على عبود
سيف: ااخو سلطان عببود تستهبل انتت انزلل
العنود بصوت خفيف وخايفه ؛ يمه وللدي
ابو سيف: اخو ناصر عبود انتبه لا ينطلق بك
عبود ضحك وقال: انا عبدالله سيف عبدالله ال قاايد ما اخاف من شي وانطلق
قام سيف من مكانه ومسكه سيف
سيف: عززووززز فكني من خيلك لا ارميه من بعييد بعدددد ولدي بيطرحه
عبدالعزيز كان مييييت من الضحك
ابو سيف: ضحكتت من سرك ققممم شف ولديي ياولد ناد خليك اخلصص
عبدالعزيز وهو ميت ضحك جلس وهو ماسك بطنه
سيف دفه وكان بيروح بس انصدم ان عبود يعرف و الواضح انه متدرب من الجلسه وتثبيت نفسه ومسكته للجام
سيف: متى علمته ؟
ابو فهد ابتسم وقال : حيي يا عبدالله
فهد : يالبى قلبه
عبود مر من عندهم وقال : يا بابا انا اعرف
صالح: كفو يا عبود
عبود: كفوك الطيب
حمد : رجال صغير
عبود: كنت بقول شرواك بس انت كبير
ضحكوا كلهم والكل انتبهر بفروسيه عبود وكيف يعرف
سيف نزل عبود وحضنه بقوه وقال : ورا ما تعلمني
عبدالعزيز: انا قايل له ما تشوفون اقولكم بنروح المزرعه بنروح المزرعه كله علشان النتيفه ذا
ابو سيف: ومن متى علمته
عبدالعزيز: تذكرون جيه عمي ابو فهد من الشمال قبل زواج ترف
الكل : ايه
عبدالعزيز: من يومها بعد صلاة العصر اخذه واعلمه بس لا راح الرياض يخرب كل شي ويوم تعب بعد بس عبود بسم الله عليه تعلم بسرعه
ابو صالح: بعدي يا سمي الغالي
ابو سيف التفت لابو صالح وقال : الله يحفظك لي
عبدالعزيز: نجد علامتس
نجد بخوف: مدري يممه شوفي وجهه
ام سيف بتوتر : عطيني اياه
فهد بخوف : علامه
سلطان: احلى فهود صاير اب
ام سيف: هوا في بطنه
نجد : وكيف يطلع !
ام سيف: عمليه
نجد :هاه
ضحكوا كلهم على نجد
نجد : ابددد ما يضحك انت وياه
ابو سيف : ما ارضى على نجد ابوها ترا
ام سيف: وانت مصدقه عمليه
نجد : وش الهوا ذا
ام سيف: الهوا يجي الناس كلها عادي
نجد : الا انا صح؟
ابو سيف: اولهم انتي ما ترقدين الليل
نجد ضحكت وقالت : افا
ام فهد : اعلمتس انا اجلسي كذا ( عدلت جلستها) وحطي بطنه على يدتس اليسار وبيدتس اليمين طقي ظهره بخفيف وامسحي عليه كذا
سلطان: ياوك يا الشغله
عبدالعزيز: يا خاله شدراتس يعني احتماليه تعرفين اكثر من سيف الدكتور اللي دارس اكثر من سنه
سيف التفت لعبدالعزيز معقد حواجبه قال : بالله عليك
ام فهد ضحكت وقالت : مافيه ام ما تعرف هالحركه بس من اول ورع يمكن ما تعرف وما هو يمكن اكيد
ام صالح: اذكر بورعي صالح من الخوف اخليه حتى يرقد كذا
عبدالعزيز: ياخاله صالح ماهو ورع
صالح: شدخلك
عبدالعزيز: يا صالح انت لواء و كبير وعندك بنتين و ورعك الثالث بيجي وتصير ورع
ام صالح: لو اشوف احفاده بيبقى ورع
ضحك عبدالعزيز وقال : يالبى قلبك يا خاله
سلطان: القهوه مافيها هيل
ريما ضحكت وقالت : الحمدلله احد تكلم ملاحظه ولا تكلمت
سلطان: الحيا الزايد مايصلح ورا ماقلتي مافيه هيل
عبدالعزيز: لو نجد فضحت فينا مافيه هيل
نجد ناظرت عبدالعزيز وقالت : الله يشفيه ويرد له عقله
مزنه: بتحضرون عرس عقاب
ام سيف بحده: لاني حاضرته ولاني واقفتن عليه
ابو سيف باستغراب : وليه
ام سيف : وليه اجي
ابو سيف: ولد عمي مابها شي
ام سيف استغفرت وقالت: اللي بيروح الله يسهل دربه مير مالي روحه ولا لبناتي روحه
عبدالعزيز: سمعتوا الاخيره
ساره : مين اللي لاعب عليك وقايل مقطعين نفسنا من غير عقاب حاطه براسي ماني رايحه له
ريما : اذبح عمري ولا رحت
سلطان: نجد شكلها تبي تروح
نجد: وين
سلطان: زواج عقاب
نجد:  ووع
الكل ضحك على رد نجد اللي محد متوقعه
ناظرت نجد لابوها وعمها ابو صالح وعمتها مزنه وقالت : اقول يا عمي تركي
ابو فهد وهو يضحك : سمي
نجد : لي مكانن فبيتكم ؟ شكلي بنظرد
ضحكوا كلهم
فهد : افا يا نجد وانا ويني ؟
نجد حمر وجهها وضحكت
ابو سيف: تراه ولد عمي
نجد : عاد يمه شنسوي ولد عمك غثيث
ابو سيف: ها لو ماجد لا كبر يسب عيال عمك صالح
نجد : بربيه !
حمد وصالح : حييي بنت العم
ابو سيف: يعني؟
نجد ضحكت وقالت : لا يبه الموضوع مو كذا بس صراحه عقاب ما يستاهل الروحه بعدين يبه شكلك ناسي من زوجه عقاب الاولى
ابو صالح ضحكت بصوت عالي ومسك ابو سيف وضحك زود
ابو فهد : كبيره كبيره يا عبدالله
ابو سيف مافهم للحين وناسي ان مها زوجه عقاب الاولى اخت ام سيف
عبدالعزيز: اووه الموضوع كذذذا
ابو سيف: علامكم
سيف بهمس لابوه : خالتي مها نسيت يبه زوجه عقاب الاوله وهو بيتزوج عليها تبي امي تحضره
ابو سيف جاته لحظه ادراك متاخره😂
ابو سيف ضحك وقال : علشان كذذا ، مابها شي
ام سيف بحده: ما بها شي انا قلت شي بس زواج ماني مشتهيه احضر
ابو فهد بمزح: ظني خواتس ام فهد وام صالح بيروحون ويتركونتس
ام فهد : وش يوديني ؟
فهد : هههههههههه اميي الدفاع عن خالتي ام سيف
ام صالح: ليا صار ماعندي عقل رحت
صالح : حيي الفزعه
ريما : خالتي صابرتن عليه لو مكانها والله ما ليطلقني قبل يتزوج الثانيه
حمد بضحك: ما يسويها سميي
حمد ٢: ما اسويها يا ريما
ريما استحت وحست بحراره وقالت : مو قصدي اتكلم بالموضوع بشكل عام