بلاي حبيت نجديه

42

طلع فهد وام سيف راحت للمطبخ
ام سيف: شعندتس يا نجد ما تروحين له
نجد : بس كذا مافيه شي
ام سيف: زين اخلصوا يمكن باتسر اروح لاختي او بعده بنجهز كل شي قبل اروح
ريما : وكم يوم تاخذين
ام سيف: من بكره عرس شين الحلايا ابوتس يمشي لرياض و يمرني
نجد : الله ياخذه عقابوه ما اواطنه
ام سيف: خلي السوالف و جيبي الخضار لبرا نقطعها
ريما : بلحقكم بالسمبوسه نلفها
طلعت ام سيف وضبطت جلسه الحوش وجلست
وجت نجد و ريما
ريما باستغراب: وين العنود و الجوهره ؟
ام سيف: مدري عنهم
عبدالعزيز طلع من غرفته وقال: يمه وين ابوي
ام سيف: يا عند ابو غزيل ولا بمحله ولا بالمجالس
عبدالعزيز: ياليللل
ام سيف: علامك
عبدالعزيز: بطلع مع اخوياي
نجد: في ذا الليل !!
عبدالعزيز: وش ليله الساعه تسع
ريما : تسع وشو مو ليل؟
عبدالعزيز: شدخلتس هالحين
نجد: عزوز تراك متغير علينا ترانا خواتك
عبدالعزيز : يمه بطلع ترا لا جاء ابوي علميه
ام سيف: ماني معلمته لا بغيته رح له
طلعت الجوهره من غرفتها وقالت : السلام
الكل رد السلام
الجوهره: كان علمتوني اساعدكم
ام سيف: عادي وانا خالتس
نجد: شعندي بالغرفه يعنني متزوجه
ريما : خير نجد وحده وزوجها شتبين
الجوهره ضحكت وقالت: كنت ارتب ملابس سلطان
نجد: من عرفتس ترتبين ملابسه
الجوهره: بلاك ما شفتيه اذا يبي يطلع شي واحد قلب الدولاب فوق تحت
ام سيف: ولدي واعرفه
عبدالعزيز وهو طالع من المطبخ وبيده عصير
نجد : عصيري عزوزز مالك داعي
عبدالعزيز: راح عليتس الا يا الجوهره زوجتس وينهو
الجوهره: بالغرفه مشغول باوراقه
عبدالعزيز: انا شكلي بموت
ام سيف: وش هالكلام
طلع سلطان وهو معه الاوراق و معصب وقال : شعندك شفيك بعد
عبدالعزيز: بطلع مع اخوياي
سلطان: الحين !
عبدالعزيز: ياليل تراني ماني ورع بس اعطيكم خبر ما استاذن
سلطان: ومنهم اخوياك
عبدالعزيز: ريان و مجيد و عساف ونادر و عمر
سلطان: عساف منهو ولده
عبدالعزيز: سلطان ما اخبرك نفس ابوي
سلطان تنهد وقال: منهو ولده
عبدالعزيز: ولد صقر عيال ذوي عون
سلطان: اي عرفته
عبدالعزيز: بروح ولا جاء ابوي قله
سلطان: ومتى ترجع
عبدالعزيز: الصباح
سلطان: وين تروحون
عبدالعزيز: يم عزبه ابو نادر
سلطان: فلوسك معك
عبدالعزيز: هالله هالله
سلطان: انتبه لنفسك
عبدالعزيز: على هالخشم
قرب عبدالعزيز وباس راس سلطان وطلع
نجد : سلطاني وراك معصب
سلطان وهو مشغول باوراقه وبيدينه القلم و وماسك راسك : ماني معصب شتبين
نجد : شدعوه سلطان انا نجد حبيبه اخوها تقولي شتبين
سلطان: والله يا نجد مبتلش بالاوراق اللي كثر شعري ومرتفع ضغطي
نجد : سم
الجوهره اشرت لنجد بمعنا لا تكلمينه معصب
راحت نجد للمطبخ وسوت شاهي بالنعناع
ام سيف: الجوهره
الجوهره: سمي يا خالتي
ام سيف : امتس مختفيه علامها
الجوهره: عماتي كلهم عندنا علشان كذا
ام سيف: الله يكون بعونها
جت نجد بالشاهي و صبت لامها و لسلطان ومدت الكوب لسلطان وقالت : احلى واطلق و الذ شاهي بالنعناع لاحلى سلطان قلب اخته
ابتسم سلطان وباس راسها وقال: ياا بعد عيوني انتي سلمتي جاء بوقته
جاء ابو سيف وقال: السلام عليكم
الكل رد السلام
سلطان: يبه
ابو سيف: هلا يابوك
سلطان: عزوز توه من نص ساعه طلع مع اخوياه انتظرك ولا جيت يقول بيروح مع اخوياه لم عزبه ابو نادر
ابو سيف: فلوسه معه
سلطان: ايه و وصيته على نفسه
ابو سيف: الله يحفظه
التفت ابو سيف على البنات وام سيف وقال : لا تعبتوا
كلهم : لا ندمت
ابو سيف: ترا نمشي بكره لرياض
ام سيف: وش معجلك ؟
ابو سيف: عيال عمي قالوا وعدنا بكره الساعه 11 نمشي للجنوب
ام سيف: نمشي متى حنا
ابو سيف: ثمان ونص و نوصلهم عشر
ام سيف: على خير
ريما : يبه ماله داعي تروح احس
ابو سيف: ليه
ريما : والله احس مدري
قطع عليهم صوت الباب
سلطان: عبود قم افتح الباب
ركض عبود فتح الباب
عبود: هلا محمد
محمد: ناد لي عمي ابو سيف
ابو سيف: اقلط
محمد: لا ياعمي جاي اعطيكم مهر نجد و اغراضها و فهد يعتذر عنده دوام ولا قدر يتاخر و ابوي رايح يعزي خوين له و وصاني هو وفهد اني اوصل المهر
ابوسيف : مابه خلاف وانا ابوك
دخل صندوق كبييير و فوقه ظرف وطلع
ابو سيف: تعال يا سلطان
سلطان: جاك
دخله سلطان وقال: الله عليتس يا دنيا ماعرفتس يا نجد
ام سيف: خلنا نشوف الذهب
ريما بحماس : بغسل يديني
___________________________
عند مها كانت تصلي الوتر و هي تصيح بحرقه وكانت تدعي ربها
مها : ياارب ان كان زواج عقاب فيه شر لي اصرفه عني و ما يتم ومن غير شر على الجميع ويارب انك تجبر قلبي جبر يتعجب منه اهل السماوات و الارض
( فوق ان عقاب ظلمها ومعاملته معها شينه الا انها ما كانت تدعي عليه ولا على زوجته طيييبه مررره وحنونه ولا تغلط على احد )
مسحت دموعها وفتحت المصحف وبدت تقرا
وصلت لسورة المعارج وكانت تقرا لين وصلت عند ايه
( فأصبر صبراً جميلا )
وانهلت دموعها قطع عليها صوت عقاب وهو داخل
عقاب : السلام
مها مسحت دموعها وقالت : وعليكم السلام
عقاب: ياليل هالحين كل ذا علشان بتزوج تراني مو اول ولا اخر واحد !
مها بحده : ومن قالك كل ذا علشانك ! قاعده اعبد ربي وادعي لنفسي ولعيالي لايكون تحسبني اصيح علشانك ههههه ياحليلك يا عقاب اخر همي تراك
عقاب انقهرر وقال بحده : جهزي العشاء ولا يكثر حكيتس
مها تعوذت من الشيطان ونزلت جلال الصلاه وراحت جهزت العشاء
وحطته قدامه وسكتت
عقاب : وش فيتس؟
مها : مافيه شي
عقاب: تكلمي واضح ودتس تقولين شي
مها: لين متى يا عقاب ؟ لين متى وانت تتزوج وتطلق ترا مو حب فيك لا علشان بنات الناس اللي تتزوجهم وتطلقهم
عقاب: بكيفي انا رجال واللي اسويه محد يحاسبني عليه
مها ضحكت وقالت : يوه يا عقاب منت اقوى من ربك
عقاب سكت وقال : صح اني اتزوج واطلق بس ما سالتي نفستس انتي ما اطلقتس ليه؟
مها والابتسامه شاقه وجها علشان تنرفزه وهي من داخلها تحترق
عقاب : لاني ما اقوى على فرقاتس
مها ضحكت وقالت : العبها على غيري
عقاب: عالعموم بزواجي ذا ماني مبيت نيه طلاق وباذن الله بتقعد عندي
مها: باذن الله
قالتها والغصه حابستها
عقاب: رايح انام
___________________
ام فهد : مالها لزوم روحتك والله لو تطيعني وتقعد
ابو فهد : وراتس كلها ثلاث ايام وراجع وعندتس العيال حمد ومحمد
ام فهد : و فهيدان بيروح
ترف : ينه عاد نادر بيجي بكره
ابو فهد : نادر ماهو غريب و محمد وحمد يقومون بواجبه
حمد : على هالخشم
محمد : افا عليك لا توصي
ام فهد : واعيباه ورا ما وديت مهر نجد انت
ابو فهد : انشغلت مع خويي اعزيه بولده و فهد المعرس وينهو
ام فهد : اجل ماعليه
___________________
ام سيف : تبارك الرحمن الذهب يهبببل
ابو سيف : نجد ورعتي هي اللي مزينته
سلطان نزل نظارته و ابتسم وقال : ملبوس العافيه يا اخيتي وتستاهلين اكثر
ريما : تجنن كلهاا ماشاءالله يووه نجد تكفين تحمست لزواجك
الجوهره: مرره حلوه الاطقم تهبل ماشاءالله عاد لا تضيعينها تلحق سلاسيلك
نجد : احس بصييح
ابو سيف ضحك ومد يدينه لنجد وقال : تعالي في ذرى ابوتس تعالي
نجد جت بحضن ابوها وحضنته وقالت :عاد لا تنسى بنتك
ابو سيف: اقدر انسى ام ماجد؟
نجد ضحكت وقالت: الله يحفظك لي ويطول بعمرك
____________________
الساعه 7:30 الصباح بنجد العذيه
ابو سيف: يا شيخه تاخرنا
ام سيف: وش معجلك تونا
ابو سيف: يااا سيف
سيف: سم سم
ابو سيف: انتبه لاخوانك وخواتك
سيف: لا توصي حريص
ابو سيف: عزوز خفف لي روحاتك مع اخوياك
عبدالعزيز: على خشمي
ام سيف: ريما القهوه وش صار عليها
نجد: يمه سلمي على خالتي وقولي البنات ميتين على شوفتس بس انتي رديتينا
ام سيف ضحكت وقالت: زين يا امي انتبهوا لنفسكم
طلع ابو سيف وام سيف ومشوا طريقهم لرياض
ام سيف صبت القهوه ومدته وقالت : تقهو
ابو سيف: سلمتي
ام سيف: عاد مو اسمع بك تلعب بينهم بسيفك
ابو سيف ضحك وقال: وليه
ام سيف: بس
ابو سيف مد فلوس لام سيف وقال : باذن الله تكفيتس ولا ازيدتس
ام سيف: ما يحتاج معي
ابو سيف: لزوم تحتاجينها خليها معتس
بعد ساعات وصلوا لرياض تحديداً بيت عقاب
نزل ابو سيف وسلم على عقاب
عقاب: اقلطوا اقلطوا
ابو سيف: مو وقت تقليط يابن عمي ماعاد به وقت نمشي؟
عقاب: افا وين عيالك
ابو سيف: بيجي سلطان باتسر اما الباقي عند خواتهم
عقاب: عذرهم و وصل الا شخبارتس يا ام سيف
ام سيف بحده : بخير من منول
عقاب: دوم يارب
دخلت ام سيف على مها وقالت : مها
مها: هلاا هلا هلا باخيتي
ام سيف: يا قلب اخيتس شخبارتس
مها: بخير شعلتس بخير تعالي تقهوي
ام سيف : احرق قلبتس يا بنت امي وابوي يا بنت سليمان ؟
مها: ما يحرق قلبي الا ثباتها
ام سيف: بتلحق اللي قبلها
مها: اههخخ يا خيتي ما ظني
ام سيف: وين ريان و فارس
مها: يا عيال سلموا على خاله
جاء فارس وسلم و باس راس ام سيف وكتفها و ريان كان يقلده
ام سيف: شخباركم
فارس: بخييير و الحمدلله يا خاله انك جيتي علشان ننبسط