بلاي حبيت نجديه

52

ابوسيف وعياله بالحوش ويشربون شاهي ويسولفون
ابو سيف: نجد نامت بدري
ريما : اي دجاجه وتقول قولي لامي تقومني لصلاه الفجر
ام سيف: بقومها اكيد
ام سيف: امي بتجي
الجوهره: خامس رمضان صح؟
ام سيف: كانت بتجي خامس رمضان بس اخوي احمد جاي جاي لديره باتسر وامي بتجي معه وقلت لها تجي عندي
عبدالعزيز: خالي فيصل ماهو مخليها تقعد عندنا
الجوهره: ايه ابوي بيقوم الدنيا
ام سيف: لا ماعليكم حليتها انا
عبدالعزيز: وخالتي ام فارس ؟ ماقالك يا يبه عقاب متى بيجي
فهد : اتوقع قال عاشر رمضان
ابو سيف: شتبي بخالتك
عبدالعزيز: يازينها تسوي حلى بطل ولا فوقها تعزز لي
ريما : تطيرك بالعجه انك مزيون
عبدالعزيز: اجحديها اني مو مزيون !
ام سيف: الا مزيون ونص
ريما: يمه شهاده زور !
سلطان: احس دخت بعد السحور
فهد : حتى انا ماعاد اشوف
عبدالعزيز: من مسوي السحور حاط لنا شي
ريما: من زينكم علشان احط لكم شي بس مايشمل كلامي عبدالله وشيخه
فهد : وحنا
ريما : تستاهلون
ابو سيف ؛ والله من اللبن اللي بعد الكبسه
ام سيف: غريبه على سيف
اما سيف رجع العنود لبيتهم وراح لبيتهم ودخل عليهم وسلم
ابو سيف: وعليكم السلام وينك فيه عساك تسحرت
سيف: اي الحمدلله تسحرت ومعين الله خير
ريما : تعال شاهي
سيف: دامه شاهيك صبي
جلس سيف وقال : اهخخ يا التعب
ام سيف: بسم الله عليك علامك وش تعبه؟
سيف ضحك وناظر امه قال : ابد لا شفتس يا اميمتي راح التعب
سلطان: عزوز بعد راسك لا اشوتك
عبدالعزيز: سلطان انقلع تراك متزوج
ام سيف طقت عبدالعزيز بخفه وهمست له : عيب وش هالكلام !
سلطان: تبي اقص لسانك؟
فهد : خالتي ضعيفه تكسرت من روس عيالها
سلطان: عزوز بعد لا ارنك مخمس
عبدالعزيز: سلطان خل الكلام اللي ماله داعي انا حاجز حضن اني قبلك
سلطان: تعقب ما قلت انا حطيت راسي قبلك
سيف: صجيتونا الله يصجكم
ام سيف: خلاص واحد هنا و واحد
عبدالعزيز : لا معليش انا لحالي
ابو سيف ضربهم بالعقال على رجولهم وقال : قم انت وياه امكم كسرتوا رجولها لعنه تلعنك هذا كبرك انت وياه وش ذا الحركات
سلطان: كبرتها يا الوالد ما سوينا شي
ابو سيف: مافيها شي مير هواشكم اللي فيه شي
سيف: قم انت وياه بعدوا
جاء سيف وانسدح وحط راسه بحضن امه وقال : فيك خير انت وياه تعال
سلطان: تمون علشانك اخوي الكبير
عبدالعزيز: شقصدك يعني انا ما احترمك!
سلطان: ايه
عبدالعزيز: كذاب والله اني احترمك
ابو سيف: قولك له كذاب اول دليل
ام سيف: هالحضن كفاكم وانتم صغار ما يكفيكم هالحين ؟
سلطان: لا راس عزوز كبر
عبدالعزيز: سلطاانن !!
ضحك سلطان وباس راس عبدالعزيز وقال : قسم بالله احبك
عبدالعزيز بحماس باس خشم سلطان وقال : جعلي ادفن معك
ام سيف: وجع يوجع العدو لا تشوفك عيني تقول هالكلام
ريما : ازين نفتك منهم
سلطان: استغفرالله هذا بدال ما تقولين بعد عمرن طويل يا اخووااني
عبدالعزيز بعبط : افااا هذا وحنا ظهرتس و عزوتس وسندتس
سلطان: واخوانتس من امتس وابوتس
ريما : مادريت احسبك من زوجه ابوي الثانيه
سلطان: اقعد متى دريتي ان ابوي متزوج
ام سيف: هاه؟
عبدالعزيز: يبه هج مباحث
سيف: أمي تدري
ام سيف: وش ادري عنه
فهد : عمي متزوج وحده ثانيه
ام سيف: ايه خير ان شاءالله
ريما : ياااعيني ياعيني على الثقه
ام سيف: والله وانا امتس الرجاجيل لا تثقين فيهم والله وانا امتس الحين معتس باتسر مع غيرتس
سلطان: اوب اوب اوب
ابو سيف: اففاااا
الجوهره: على قوله : ام خوله
ريما ضحكت وقالت: ام خوله تعجبنييي
ابو سيف: منهي ذي
ام سيف: زوجه متعب
سلطان: الله لا يحيها نقاله العلوم
الجوهره: لا هالحين تعطي محاضرات تقول زوجتس قال روحي يمين انتي روحي يسار قال روحي يسار روحي يمين
ريما بتقليد لصوتها : هالرجال ملعونن والدين هما لا شفتيه اتفلي في وجهه
ام سيف ضحكت من تقليد ريما بقوه لين دمعت عيونها
سيف: طيب ترانا رجاجيل هالحين
ريما : مو حنا نقوله ام خوله
الجوهره حمر وجها من الضحك وقالت : رييما كيف قلدتيها
ريما : لعبتي التقليد
ابو سيف ضحك وقال : ترا ماهو زين اللي تسويه تخرب بيوت الناس
فهد : عسى نجد ما تجلس معها
ريما وهي ميته ضحكت : ابشرك دايم جمبها
فهد : افا
ام سيف: يارب تجعله ضحك خير ياربي
ابو سيف: الامور هذي تضحكين منها مير ما نقدر نقول دوم
ام سيف : لا ضحكتني ريما يوم تقلدها
سيف: ما انتبهت الا لحركه اليدين
الجوهره : نفس حركاتها
سيف: اخبارها عمتي جميله يبه؟
ابو سيف: شفتها قبل اسبوعين بخير ونعمه ليه علامها
سيف: لا اسال وين ساكنه فيه؟
ام سيف عرفت السالفه وان سيف يبي يروح لها قطعت السالفه وقال : سيف حبيبي امي ماعليك امر جيب لي التكايه اللي وراك
ريما انتبهت وقالت : بروح انام
ام سيف: بكره امي بتجي عانيني ذكرتس لا تقولين نسيت
ريما : ابشري
فهد: ماعاد اشوف من النوم
سلطان: وانا بعد مييت
عبدالعزيز: شكلي بلحقكم
ابو سيف: ناموا وراكم صلاه فجر
راحوا كلهم ماعاد ابو سيف وسيف وام سيف
ام سيف: يمه سيف رح نام يا امي عندك سالفه خلها الصباح ابوك بيرقد
ابو سيف فهم على ام سيف انها تبيه بسالفه
سيف: ابشري تصبحون على خير
ابو سيف وام سيف: تلاقي الخير
ابو سيف: سمي يا شيخه عبدالله
ام سيف: اقولك السالفه لحالنا ازين ومو هنا
ابو سيف: ابشري تعالي
راحوا لغرفتهم وابو سيف نزل طاقيته و عصاته حطها ورا الباب اما ام سيف نزلت برقعها وقفلت الباب وشالت طرحتها
ابو سيف: دام البرقع انشال بعدها نومه شكله ما تحتاج السالفه طلعه
ام سيف ضحكت وقالت : خلك من برقعي هالحين بعلمك شصاير
ام سيف علمت ابو سيف بكل اللي صار من كلام جميله للعنود و الواضح ان سيف عرف وهي خايفه انه يروح لها بالبيت
ابو سيف: جمليه ذي لسانها متبري منها
ام سيف : وش السوات
ابو سيف: انا بنفسي اكلمها
ام سيف : المشكله ان العنود الضعيفه مالها دخل مو هي اللي تختار حملها
ابو سيف: لحول الله
ام سيف: علشان كذا قلت لك السالفه قبل سيف علشان تحبها
ابو سيف ناظر ام سيف وابتسم
ام سيف ضحكت وقالت : علامك
ابو سيف: اشتقت لوجهتس
ام سيف: هالحين علشان فهد فيه
ابو سيف ابتسم وقال : اشهد بالله وجهتس يشفي كل عله
ام سيف ضحكت وقالت : يوه يا عبدالله ما تخلي كلامك
ابو سيف : صدقت ما كذبت عز الله اني اخترت وجبت بنات نفس امهم مزيونه
ام سيف: وجبت عيال مثل ابوهم مزيون وهيبه وله كلمته و مكانته عند العرب وكلمته ما تصير ثنين
ابو سيف: اهههخخ يا شيخه اعمارنا راحت ولهالحين اذا احد جاب طاريتس قلبي بيطير من مكانه كاني توي حبيتس
ام سيف ضحكت وقالت : جعله دوووم
ابو سيف: افا عليتس دامتس حطيتي قلبتس عند النجدي ارقدي وامني الخيانه عنده عيب وحرام
ام سيف: يا بعد هالدنيا يا عبدالله الله يحفظك لي ولا يحرمني منك
ابو سيف ابتسم وقال : امين
________________________
الساعه 4:30
نجد قامت وجت عند ريما وقال : رييما قومي اشربي مويه
ريما وهي ميته نوم : شوي شوي
نجد : ماباقي شي و ياذن وانتي تقولي شوي
ريما : كم الساعه
نجد : اربع ونص باقي ربع ساعه وياذن قومي نشرب مويه ونقرا قران لين ياذن ونرقد مره ثانيه
ريما : زين بس قومي اخواني
نجد : قوميهم انتي انا بروح لامي
ريما : زين زين بس ترا فهد فيه اذا بتتغطين
نجد: زين
راحت للمجلس اللي فيه فهد و عبدالعزيز وقفت عند الباب وطقته
ريما : عزوز فهد قوموا اشربوا ماء ماباقي لصلاه شي
عبدالعزيز: هممم
ريما : علمتك تراني
نجد طقت باب غرفه امها وابوها وقالت : شيوخه ادخل ؟
ام سيف ماردت لان كانت تصلي
نجد استغربت وطقت الباب مره ثانيه ابو سيف وهو طالع من الحمام( يكرم القارئ) و متوضي وبيدينه المنشفه : ادخلي يابوتس
تقدمت نجد وقالت : صح نومك يبه
أبو سيف ابتسم وقال : صح بدنتس عيون ابوتس
نجد : خذ جبت لك مويه انت وامي
ابو سيف : طالع طالع بقرا قران وبشرب مويه برا و بنتظر الصلاه
نجد : لا تتعب نفسك وتروح ارجع نام بعدها ولاحق روح الظهريه
ابو سيف: على تسع ابروح باذن الله
ام سيف سلمت وناظرت نجد وابتسمت تقدمت نجد وهي تبوس راسها ويدينها وقالت : صح نومتس ياميمتي
ام سيف حضنتها وقالت : صح بدنتس يامي شبعتي نوم شكلتس
نجد : لا باقي فيني نوم بس بنتظر الصلاه
ام سيف: ايه يا امي عطي ربي حقه وارقدي
نجد : من عيوني
ابو سيف: نظارتي وينهي؟
ام سيف: هذا هي جمب مصحفك هنا
ابو سيف: نجد يبه قومتي اخوانتس ؟
نجد : قومت سيف وسلطان بس طقيت عليه الباب
ام سيف: وعزوز وفهد؟
نجد : قلت لريما تطق عليهم الباب
ابو سيف: ماهم قايمين عساهم يشربون ماء بس
نجد : بروح اشرب مويه
ام سيف: عطيني مصحفي قبل تطلعين
نجد : ابشري
راحت نجد لغرفتها و شافت ريما منسدحه على السرير بجلال الصلاه وبيدها المصحف ضحكت نجد وجابت لها مويه وقالت بصوت خفيف : ريما
ريما : همم
نجد : اشربي مويه بس
شربت ريما وهي مغمضه عيونها وحطتها جمبها
نجد : نامي نامي
غطتها و شالت المصحف جمبها و جلست نجد تقرا قران
بعدها بنص ساعه اذن صلت نجد و قومت ريما تصلي
ابو سيف : يا عيال قوموا صلوا
سلطان طلع من غرفته ومغمض عيونه من النوم
ابو سيف: وضيت؟
سيف طلع من غرفته وحاله من حال سلطان
ابو سيف: سلطان اعلمك انا !
سلطان: سم يبه احسبك تكلم ذا
سيف: هاه؟
نجد طلت من شباك غرفتها وضحكت وهي تناظر فيهم ( الوحيده اللي نامت بدري😂)
ابو سيف : عزوووزز يااا عزوز انت وفهد
فهد وهو ميت نوم : سمم
ابو سيف: الصلاه وانا ابوكم الصلاه وينهو عزوز
عبدالعزيز : يبه خل نصلي بالبيت جماعه كلنا
ابو سيف : اقول امش قدامي
طلعوا كلهم اما البنات رجعوا ناموا كلهم