بلاي حبيت نجديه

البارت 22

ساره : يمه ودي اروح السوق باخذ لي اغراض
ام سيف : اشوف ريما صايرتن سنعه
ريما : حرام عليتس يمهه والله مو قصدي كذا!
نجد : مدري اروح معكم ولا
ساره : وش وراتس غيري جو
ام سيف : واعبيها وترف
ساره: بناخذها ترف
ام سيف هذانا وصلنا لناس
طقوا الباب وفتح لهم فهد لا شعورياً ابتسم وناظر بام سيف و نجد وقال : ياهلا ياهلا ارحبوا ارحبوا
ام سيف : الله يبقيك
فهد : معليش محد يدخل حالياً
ام سيف: اقول ابعد عن وجهي
فهد : ههههههه ابشري ابشري شكلتس ضايقه علشان بنروح حايل
ام سيف وهي تمشي داخل البيت : ايه ايه عزوز الثاني عندي
ساره : وش الجديد امي كل ما جيتوا تمشون تضيق وشوي وتصيح
فهد : عاد الديار تطلب اهلها
نجد : الله واكبر عليك وش فيها ديارنا !
فهد : لا بالله نجد العذيه مابها عذروب مير حايل خذت قلبي هي واهلها
نجد : ايه اجل رح حب اهلها
ريما : وي نجد شدخلتس بالولد وش يحب بكيفه
فهد: وراكم واقفين ادخلوا انا بطلع واخواني معي
ساره : لا تطلع لا شي بناخذ ترف وبنروح السوق
فهد : ماشاءالله وانا اخر من يعلم
ريما: دام عمي عنده خير مالك دخل
فهد : اوب اوب ونجد معكم؟
نجد: مدري
فهد اشر لها بعينه بمعنا لا تروح
نجد : ماتوقع بنات بروح راسي مصدع وابي اتقهوى
ساره : لاحقه على القهاوي
وريما : صايره عجيز
ترف : عسى ما تاخرت
فهد : ماشاءالله تبارك الله
ترف : عندي ابو وزوج ها طس عني
فهد : قلت شي انا؟ ، المهم انتبهوا لنفسكم زين
دخلت نجد عند الباب وقفت ورا فهد و الباقي راحوا
لف فهد عليها وقال يالبى لابس الاحمر امس
نجد بصدمه : خير متى شفتني !
فهد : امس بس بالغلط ! كنتي مع عبود مو يمي
نجد غطت يدها بفشله وقالت : وووعع كان شكلي يفشل
فهد : تعقبين يفشل وانتي خذيتي عقلي !
نجد بزعل : بتروح وتخليني هنا ؟ كيف بتقوى؟
فهد : اهههخ يا نجد قلبي بس ادعي اللي فبالي يصير
نجد : اوهو من اللي فبالك حتى مب راضي تعلمني وشهو
فهد : شي بيعجبني ويعجبتس
نجد : الله يستر منه
فهد : امهليني ثلاث ايام بس
نجد : امهلك وليه ما امهلك ، ايه صح خذ
فهد : وشو؟
نجد مدت له مسبحه
فهد : ياللبيييه وراتس مكلفتن على نفستس؟
نجد : لا كلافه ولا شي شفتها واعجبتني وقلت ما تحلى الا عليك
فهد : الله يجعلني ما افقدتس يا عيون فهد
نجد : فليتها بالسوالف بروح لامي تحسبني رحت معهم
فهد : ههههه على خشمي
نجد : عليه الشحن
دخلت نجد للبيت و بعدها بدقايق دخل فهد
فهد : السلام عليكم
الكل وعليكم السلام
فهد : يمه وين عيالتس لي ساعه انتظر برا
ام فهد : تعلم من
ام سيف : خلهم تلقاهم رقود بعد العرس
فهد : وفهد اللي ينكرف ياخاله لحاله
ام فهد : وش شغلك؟
فهد : يمه ما تعرفين ابوي حالف ما يبقي شي الا يجيبه لعمامي مو كان اللي هنا بحايل
ام فهد : دام الموضوع لعمامك منت طالع من الموضوع
فهد : خليها على ربتس شوفي ، فتح كم ثوبه وكان فيه شف من فوق الكف لين كوعه
ام فهد : ياويلي هذا وشش
فهد : من الحطب اللي زوجتس مخليني اشيله
نجد :طيب وراك حاط كم ثوبك عليه !
فهد : تعودنا
نجد : ماله دخل تعودت ولا بس مو زين
ابتسم فهد و نجد انتبهت على نفسها وسكتت
ام سيف : عقبال ما نحضر عرسك
فهد : امين يارب
ام سيف : لزوم تعزمنا
فهد : مايحتاج عزييمه اصلاً
نجد حست بحراره من الفشله وسكتت
ام سيف : اكيد حنا اهل
ام فهد : بس لو ربي يفكك من بنت عمك اللي ابوك ربطك فيها
فهد : الله يستر عليها مافيها قصور مير ماني بماخذها
ام سيف :ابوك كلمه بالهداوه مو بالعناد
فهد : ما ذبحني غير عناد ابوي
ام فهد : دامني حيه ما ياخذ فهد الا نجد
ام سيف بضحك : يابنت الحلال النصيب وين يودي راضين فيه
اما نجد اللي استحت وتسوي نفسها مشغوله بالفنجال وما سمعت وفهد من الوناسه الابتسامه شقت وجهه وهذا بس كلام امه كيف لا تزوجها
ام فهد : يووه يا نجد ما عرفتس وانتي مستحيه وتسوين نفستس منتس يمنا
ام سيف : عاد احرجتيها وقدام فهد بعد
قطع كلامهم ابو فهد وهو ينادي بكل صوته : ففففههههددد يا فهددد ياعيااال
قام فهد من مكانه مسرع للباب شاف ابوه ساند ابو سيف عليه
ابو فهد : خذ طريييق اخذ طريق
فهد فتح المجلس وحطوا ابو سيف وابو فهد سانده على كتفه
ابو فهد : جب موييه
فهد : سم سم
ركض فهد برا واخذ مويه من المطبخ وركض لابوه وعطاه المويه وطلع وقال : مممممممححححممممددددد حممممدددددد محمممدددددد
ام فهد طلعت ركضت : شفيكم علامكممم شفيه ابوك ينادي
ام سيف ونجد بالمجلس
ام سيف : ظني جيناهم بوقت غلط
نجد : يمه احس فيه شي
ام سيف : كل بيت وفيه شي
نجد : لا يمه اكيد صاير شي
دخلت عندهم ام فهد و وجها متغير لونه
ام سيف : عسى محد فيه شي
ام فهد : لا بس ابو سيف تعب شوي وهذا هو بخير بالمجلس
ام سيف بخوف : علامه؟؟
ام فهد : مدري بس استهدي بالله مافيه شي ان شاءالله
نجد طلعت بدون تغطي وجها كانت خايفه ولا هي حاسه بنفسها
وقبل تروح للباب ( باب فاصل بين حوش بيتهم الاساسي وحوش المجالس )
صكت فهد
فهد : نجد شفيتس !
نجد : فهد بعددد
فهد : وين رايحه هناك رجاجيل واجد
نجد ما مسكت نفسها ونزلت دموعها وقالت : تكففى فهد تكفى ابي اشوف ابوي
فهد : ابوتس مافيه شي يابنت
نجد بعدت فهد وفتحت الباب وقبل تطلع سحبها فهد بقوه وقال بحده : شقلت انااا ماتفهمين
نجد لا شعوريًا طاحت بحضن فهد وقعدت تصيح فهد سحبها معه للحوش الخلفي
فهد : نجد ابوي انتي امي عايني فيني ابوتس مابه شي
نجد بصوت متقطع: فهود تكفففى  تكفى بشوف ابويي
فهد : ابشريي والله انتس تبشرين مير الرجاجيل بالمجلس وعلى قص رقبتي تدخلين عندهم
نجد ارتمت بحضن فهد وقامت تصيح اكثر
فهد في هذي اللحظه قعد يتاملها وش كثر كانت جمييييللللله وملامحها الهاديه وعيونها الناعسه وكيف جت عنده وهي بدون حتى تغطي وجها شافها بحضنه تصيح وكانها تحس بالامان عنده
فهد مسح دموعها وقال : شكل المزيونه ما تدري انها بدون غطا
نجد بعدت منه وغطت وجهها بسرعه وبعدت منه
نجد : فهدد
فهد : عيون فهد وروح فهد وعمره ودنياه يا امي انتي امريني امري وش بغيتي ؟
نجد وهي تصيح: ابي اشوف ابوي ولعنه على اللي فيه لا تردنييي
فهد : الله ياخذ اللي يردتس امشي
نجد عدلت عبايتها و طرحتها وضبطت برقعها وطلعت
فهد بحده : غطي عيونتس !
نجد : محد بيميي ترا
فهد : غطيها لا اوريتس
توجهوا للمجلس فهد بحده : اهل ابو سيف بيدخلون ماله داعي وجودكم هالحين وماقصرتوا وبيض الله وجيهم
سند و كايد : وجهك ابيض
طلعوا و وقف سند وشاف نجد
فهد بحده : ولد اهلنا !
سند : ياخوي كيف صاروا اهلك
فهد : صد لا اعلمك ان ربي حق
طلعوا سند و كايد برا
نجد ركضت عند ابوها
ابو فهد : مابه شي ابوتس يتدلع علانا
ابو سيف : ياازين بنيتي تعالي يابوتس
نجد : شجاك يبه؟
ابو سيف : مافيني غير العافيه يابوتس بس جاني شي غريب
نجد : وش حسيت به؟
ابو سيف : مدري يابوتس حسيت نغزات بقلبي بعدها قلبي قام علي ماغير يوجعني وكل شوي يزيد يزيد لييين ما عاد اشوف اللي قدامي واسمع قلبي كيف ينبض و هاه طحت وصحيت على وجهتس
ابو فهد : افااا وانا انتظر تقول وجه اخوي
ابو سيف : ههههه الله لا يخليني منك يا اخيي
ابو فهد : مقبوله منك
فهد : ياعمي شرايك نوديك المستشفى يتاكدون بس
ابو سيف : لا لا لا مابي المستشفيات ولا طاريها
ابو فهد: بس ياخوي ..........
قطع كلامه ابو سيف وهو يتالم : اههخخ
نجد : يبيه شفيكك
ابو سيف بصوت متقطع : مافيه مافيه شي
ام سيف : السلام عليكم
كلهم. وعليكم السلام
ابو فهد : امش يا فهد وطلعوا كلهم
ام سيف بخوف وهي تمسح على صدر ابو سيف : بسم الله عليك الرحمن الرحيم علامك وش تحس فيه
ابو سيف ابتسم ومسك يدها وقال : ياجعلي ما افقدتس مافيني غير العافيه
نجد بصوتها الباكي : الا يمه قبل شوي يقول قلبي يوجعني
ام سيف خافت مرره وتجمعت الدموع بعيونها وقالت : رحت المستشفى ؟
ابو سيف : يابنت الحلال ماله داعي داخلني برد اكيد
ام سيف: ويمكن ماهو برد تكفى لا تردني وتروح المستشفى
نجد : ايه يبه تكفى بس علشان نتطمن عليك
ابو سيف : انا اشوف العافيه لا شفت عيالي حولي
نجد : وحنا حولك يبه ولا حنا بعيدين عنك
ابو سيف : مشينا لبيتنا ضيقنا على الناس
ام سيف بعدت من ابو سيف وسندته يوقف ونجد وراهم
ابو سيف : ياخويي يا تركي
ابو فهد : جيتك
ابو سيف : بروح لبيتي
ابو فهد : افا وبيتي وش بلاه؟
ابو سيف : مابلاه شي مير ابي عيالي حولي وصعب.........
ابو فهد بعصبيه : لا صعب ولا شيي عيالك هم عيالي وبناتك هم بناتي وبيتي هو بيتك و انا واهلي الطالعين وانت الداخل علمتك وكلمتي يا عبدالله ما تعودت تكسرها بترقد عندي وانت ما تشوف الدرب ولا انت رايح لبيتك الا وانت بخير الا اذا تشكك بخوتي معك
ابو سيف : لا اله الا الله ابك ابشر يا اخوي على خشمي وطلعه ماني بطالع وهذاني جلست
جلس ابو سيف وابو فهد صد وضحك
ابو سيف : ايه شعليك تمشي كلامك علي واهو اقدر اقولك لا؟
ابو فهد : شسوي فيك
ابو سيف : ها روحوا جيبوا اغراضكم
ساره : السلام عليكم
الكل وعليكم السلام
ساره: بسم الله فيكم شي؟
ابو سيف: لابس قلت اختبر غلاتي عندهم
نجد : يبه اكيد ما تحس بشي الحين
ابو سيف : ياعين ابوتس انتي مافيني شي
ريما : تكلموا شصاير !!
ابو فهد : مافيه الا العافيه ان شاءالله بس تعب بسيط جاه وجبناه للبيت وبترقدون عندي كلكم ليييين ابوكم يصير بخير
فهد : عزوز وينه؟
ابو سيف : زقن يبي يسري لشرقيه
ام سيف : يعقب يسري لشرقيه وابوه تعبان !
ابو سيف : ان قوى قلبه يروح ماعلي منه
نجد : يبه تدري ان عزوز لو يدري انك تعبان بيقعد
ابو سيف : ما قعد يوم قلت له لا تروح
ريما : يبه الله يحفظك لنا تدري رايح علشان يعتمد على نفسه ويتوظف بكره لا تزوج وش يسوي
ابو سيف : وانا مقصرن بشي ؟ هذا هو سيف تزوج وخليته يروح وسلطان تزوج وبيروح عني ويكمل علي عزوز
ساره : يبه مهما كان بتلقانا حولك من بعد الرياض حذفه حجر اما عزوز وظيفته كم سنه وينقلونه لرياض وبعدين انت قلت فتره وكلنا ننقل لرياض كلها ساعه ونص طريقها
ابو فهد : ابلغ ابو صالح باللي صار؟
ابو سيف : لالا تخوفون اخوي على الفاضي يكفيه ما جاه ومتحملني من يوم اني ورع هالحين يشيل همي وانا شايب وجد !
فهد : بس ياعمي بيضيق علانا
ابو سيف : انت بالذات لو تقولي طب بالنار طبيت
فهد : ههههههههههه الله يسعدك ياعمي ويطول بعمرك
ابو سيف : ويحفظك لي
ابو فهد : ابك ولدي !
ابوسيف : قدك خذيت سيف و نجد
ابو فهد : هماني قلت عيالي هم عيالك
ابو سيف : انشهد
ابو فهد : محمد وحمد وينهم لا بارك الله فيهم من عيال والله لا اربيهم والله
ابو سيف : علامك علاهم
ابو فهد : وينهم ليلي كله اصيح ما فزع لي غير فهد
فهد : وفوقها ما ساعدوني وانا لحيلي اشيل الاغراض وهاه شف ( فتح كم ثوبه وبين جرحه ) شف ذا من الحطب وهم راقدين هاا يا يبه لا تلموني لا صفقتهم
ام فهد : فهد علامك على اخوانك انت
فهد : صادق مخلين كل شي علي
ام سيف: لا بارك الله فيهم عاد تراني ما ارضى على فهد
ابو فهد : وينهم هم؟
ام فهد : امس ما شفتهم بالليل اكيد راقدين
ابو فهد : اطلع فوق يا فهد وشفهم الثنين وتلهم تل
فهد : ابشر
قام فهد وراح فوق فتح غرفتهم وانصدم ان مافيه احد قال فباله معقوله؟ معقوله ما تابوا وانا مهددهم
( محمد وحمد كانوا يسهرون مع اخوياهم اللي فهد وابو فهد ما يطيقونهم راعين شراب وغيره  بس عيال ابو فهد ما يشربون بس يماشونهم ويسهرون معهم وابو فهد مايبي عياله يماشونهم) نزل فهد وسكت وقعد
ابو فهد : وينهم هما قلت لك تلهم تل
فهد : خلاص يبه بعدين
ابو فهد : شبلاك ؟
فهد : مافيه شي
ابو سيف: كيف مافيه شي و وجهك منقلب
فهد : لا بس محمد وحمد ماهم فيه اكيد انهم بالحاره بروح ادورهم
ابو فهد : وشهوو مو غبه ومن متى وهم برا البيت