بلاي حبيت نجديه

51

نجد : شكل السالفه تاليف جملوه ولا سيف منصدم
ريما: وحنا اغبياء فيه احد يصدق جملوه!
نجد: مدري بس تعالي نسوي شاهي مضبوط
ريما : ياروحي الجوهره بتنام وبتخرب نومها علشان تسوي السحور احس عيب
نجد: مو تحسين الا اكيد بعدين مدري عروس واول سنه ونخليها تطبخ !
ريما : خلاص انا بسويه
عند العنود اللي كانت طول الليل تصيح ومنقهره من كلام الحريم و تفكيرهم فجاه سمعت صوت عمر اخوها يقول : حلفت لتقلط
سيف: يارجال لا تقوم الناس بس شف لي العنود نايمه ولا
عمر: اتوقع قايمه
سيف: خذ لي طريق
عمر : تعال ما قدامك احد
دخل سيف وراح غرفه العنود
عمر : لا جيت تطلع قل للعنود عاد
سيف: ما تقصر
طق الباب سيف وقال : العنود ادخل؟
العنود مسحت دموعها وفتحت الباب
سيف: مافيه الله حيه؟
العنود باستغراب شجابك اخر الليل
سيف: البسي عبايتس
العنود باستغراب: لييه !
سيف: البسي بدون ليه انتظرتس
العنود: تستهبل انت وعبود ؟
سيف: عبود نايم بعدين البيت مليان ماراح يروح مكان ثاني البسي انا برا
العنود استغربت ولبست عبايتها وطلعت وركبت مع سيف
سيف: حي الله عنودي
العنود ابتسمت وقالت: الله يبقيك
سيف شغل اغنيه ابو نوره ورفع الصوت ويناظر العنود ومبتسم
بعدها بدقايق وقف بالبر
العنود: وش يجيبنا هنا ! لا وبعد هالحين
سيف:بدون نقاش خاطري بكشته قلت اخذ حبيبتي وعيوني وروحي وام ولدي
العنود ابتسمت وصدت وقالت بقلبها ياليت عيالي مو ولدي
نزل سيف وفتح صندوق الجيب و نزل الفرشه و الحطب و شب النار وحط الفرشه و نزل العزبه جت العنود وجلست وهي تتامل الغيوم و سيف
سيف : مرتاحه؟ ولا متضايقه من الجلسه
العنود: ايه مريحه
سيف راح و نزل عزبته الثانيه و تلطم من البرد واخذ فروته وحطها فوق العنود وقال البسيها
العنود بابتسامة ونظرات الحب قالت: سيف
سيف:هلا ابوي عيوني وقلبي وروحي تدللي ياااا بعد الدنيا شتبين لبيه يا امي؟
العنود ابتسمت وقالت: احبك
سيف: يييووووهه وانا مو بس احبك الا اعشقك ! ياخي انا محظوظ وش انا مسوي تتوقعين
ضحكت العنود وسكتت وسيف حط الابريق و حط المويه والشاهي و السكر ولف على العنود وقال : على ما يجهزابي اخذ سوالفك
العنود: ابد انا ما عندي سوالفك السوالف فبطنك
سيف: انا؟ والله لا سوالف ولا شي حتى سحور بتسحر معتس
العنود: كان قلت لي اجيب لك اكل سنع!
سيف: افا عليتس جايب عزبتي معي
العنود : ماينخاف عليك
سيف ضحك وقال : اييه افا عليتس
العنود : رحت اليوم مكان
سيف : رحت بيت عمي ابو فهد قلت لتس كان فيه عشاء وابد الصباح رحت لمجالس ابوي و العصريه عندتس
العنود: عبود الله يهديه متغييير
سيف باستغراب: افا علامه
العنود بضحكه : صاير يضرب ولا همه
ضحك سيف وقال : افااا من يضرب
العنود: بنات خواتي وعيالهم مير بنات عبدالرحمن اخوي ما يقربهم
ضحك سيف رقال :. جييد يضبط مستقبله من بدري
العنود: والله معذبهم الله يهديه
سيف: يابعد عيوني انتي اي وهذاتس خذيتي علومي عاد ابي اخذ علومتس
العنود: ماعندي علوم قاعدتن بالبيت وطفشانه من التعب اللي جاني
سيف: ماعليه ياعيوني تذكري كم يوم وتصيرين بخير
العنود : باذن الله
سيف: وجهتس فيه شي من وحنا طالعين وش السالفه
العنود: انا؟ مافيني شي
سيف: عليي انا
العنود سكتت
سيف: خذي كوب هالشاهي وتعالي نمشي شوي
قامت العنود وتمشي جمب سيف وكان مغطيها بفروته معه
سيف: هناك القمر والنجوم تصير واضحه
سيف وهو حاضنها وراسها على صدر سيف و يتاملون القمر و سيف وهو يتامل النجوم ويلعب بشعرها وحاضنها بقوه قال: قوليلي اللي بقلبتس ماحنا قايلين محد يسكت ويعلم الثاني
العنود لفت وناظرت عيون سيف ونزلت دمعتها وصدت
سيف قلبه ولع ناار لان كل شي عنده الا العنود ودمعتها قال بحده: شفيتس
العنود طاحت بحضنه تبكي
سيف: علمينيي بكلل شي والله والله لاخذ حقتس
العنود: اهخخ يا سيف وصلت فيهم انتهم يطلعون علي كلاام
سيف بحده: يعقب من يقول عنتس لو حرف وش قايلين
العنود بقهر : عمتك ما ادري شفيها علي تقول من هالكلام ولا تدري وش بعده تخييل ان المجلس كله حريم وتقولي سيف بيتزوج عليك لانك تعبانه ولا تجيبين عيال وان جبتي طيحتيه !!
سيف حس كلامها بقلبه مثل السكين وتغيرت ملامح وجهه وقال: انا اوريتس فيها
العنود: والله يا سيف حتى محد جاب طاري الوراعين ابد ولا بعد قد ضريتها ولا سويت لها شي تعرفني يا سيف انا حالي حال نفسي وتجي ذي تطلع علي من هالكلام قدام حريم الديره وانت ما تعرفهمم يقطعونك بالكلام وبصير سيره على كل لسان
سيف سحب العنود بحضنه وهو ساااكت عكس اللي بقلبه كان وده يصاارخ ويضرب و يهاوش لان الموضوع مو بيده وفوقها حاطينها براس العنود اللي تسوى الدنيا عنده ومافيها وهم فوق ذا كله يحس انه خرب حياه العنود مثلها مثل اي بنت تبي يصير عندها عيال وبنات بس هو من حادث بسيط ضيع من عمره سنين رفع العنود وقال : ناظريني طيب حطي عينك بعيني ياقلب سيف انا مو قد قلت لتس قبل قسم بالله بتمرين باشياء اكثثر وانا ازق بعد الناس هذا طبعهم ملاقيف بعدين دامتس حملتي يعني امرنا بالسليم تصدقين خفت ما اسمع كلمه بابا غير من عبود واحاول اربيه احسسن تربيه كنت اقول لو بس تطلع من ذي الدنيا بولد واحد لازم اربيه احسن تربيه وكنت ممشي الدنيا لييين ذاك اليوم اللي زياد قالي فيها مبروك اهخخ يا العنود يا ذا الكلمه اني ادورها كنت ما اسمع غير كلمه للاسف بكل عمليه اسويها الا عمليتي الاخيره وكنت طاااير من الفرح وتذكرين انتيي والله يمكن فرحتي بحملتس الاخير اكثر من عمليتي
العنود وهي تصيح وصوتها متقطع : بس اللي كنت طاير علشانه طاح
سيف: واذا طاح؟ مادام ياقلب سيف حملتي باذن الله نقدر نجيب غيره
العنود: بس انا الغلط مني ما حافظت على نفسي زين
سيف: مالك دخل انتي يابنت الحلال كل شي مقدر ومكتوب باذن الله العمر طويل قدامنا انتظرنا اربع سنين ما ننتظر شهرين ؟
العنود ضحكت من بين دموعها وقالت : حيوان مو قصدي كذا
ضحك سيف وقال بعبط : وتسوين نفسك ما تبين اللي خبري خبرك
العنود بحياء وضحك : سسسييف ! مو كذا قصدي عيب
ضحك سيف وحضنها بقوه وقال: ابشري باللي يسر خاطرتس دامني حي
العنود: ما يسر خاطري غير وجودك انت و عبود قدام عيوني وبخير
سيف ابتسم للعنود ومسك يدينا وباسها وقال : تعالي بسوي عشاك وسحوري رمضان ذا مريحه طال عمرتس
ضحكت العنود وقالت : تبيني اسويه عنك
سيف: لا افا عليتس كبسات البر لعبتي مشينا
————————————————————————
ابو سيف كان يصلي الوتر وخلص دخلت ام سيف وقالت: تقبل الله
ابو سيف لف لام سيف وابتسم وقال : منا ومنكم صالح الاعمال
ام سيف : السحور جهز
ابو سيف: فهد جاء ؟
آم سيف : ايه واح مع عزوز يجيبون لبن
ابو سيف: اجل حطوه على ما يجون حنا يا العيال لحال و البنات لحال حطوه بالمجلس
ام سيف: ابشر مير عينت سيف ؟
ابو سيف: لا وينهو
ام سيف: مدري قومت العيال ولا لقيته بغرفته
ابو سيف: رجال ويعرف مصلحه نفسه
ام سيف: على قولتك
جهزت نجد الاكل وحطته بالمجلس وراحت لغرفتها تركض
ريما : غبيه غبيه لو مكانتس حتى عبايتي ما البسها فهد زوجتس خلاص وتكتمين عمرتس بالبرقع
نجد: كيفي وبعدين ترا سبقتكم بالسحور بقرا قران وانام قولي لامي تقومني على الصلاه
ريما : بكيفتس
طلعت ريما ى نجد صلت الوتر وجلست تقرا قران
الجوهره: الله يهديتس يا ريما مو قايله لتس يسويه عنتس
ام سيف: خلاص يا بنات تعالوا نتسحر بعدها نسوي شاهي ونضبط الفرشات
ابو سيف: فهد مداوم باتسر
فهد: باذن الله ياعمي
ابوسيف: الله يعين ماعليه اجر وانا ابوك
فهدد: الفريق هذا يعسر على المسلمين قلت له يا رجال اهلي بالشمال قالي ما اقدر اسمح لك قلت خويي بيمسك عني قال لا لو ميسرها علي ابرك
سلطان: صب لبن عزوز
ابو سيف: اهم شي يا فهد لا ترد عليه علشان ما يحطك براسه
فهد: هذا اللي بيصير
عبدالعزيز: يبه لبن هالحين ولا لا خلصت
ابو سيف: هالحين
عبدالعزيز: ابشر
__________________________________________
عند مها سوت السحور لها و بعد ما خلصت تروشت ولبست لبس مرتب وكشخه لرمضان لونه سكري وفيه تطريز ذهبي وفكت شعرها الحرير وحطت ميكب خفيف يبين ملامحها الحلوه وحطت عطرها المفضل ورتبت البيت وحطت البخور و روشت ريان وفارس وبدلت ملابسهم وجلسوا كلهم حول الاكل
مها: ريان جيب كوب انتظرك
بعدها بدقيقه انفتح الباب ودخل عقاب ومعه منيره
عقاب: السلام علييكم
مها : وعليكم السلام
ريان بحماس جاء يركض لابوه
عقاب: هلا هلا بعيون ابوه
تقدم فارس و باس راس ابوه وقال : لا تعبت
عقاب ابتسم وقال : لا ندمت
مها وهي مطنشه عقاب ومنيره قامت تحط لبن لفارس وريان تقدم عقاب لمها وباس راسها مهما راح ومهما تزوج يبقى يحب مها وبقلبه غير بس يحب يلعب ويتزوج
عقاب: اخبارتس
مها: الحمدلله بصحه وعافيه
عقاب: دوم يارب عاد ما تسحرنا طريق للسفر طويل ماشين من الصباح
مها: الله يعين
اما منيره انصدمت من مها كانت حللووه وجميله ومعروفين بنات سليمان بالحلاوه ونفس الوقت هيبه ورزه نفس ام سيف اكبر مثال
ونفس الوقت انبسطت منيره ان علاقتها مع عقاب الواضح ماهي حلوه قطه تفكيرها عقاب وقال : تعالي يا منيره ماعاد باقي على الاذان شي وذوقي اكل مها وعطينا رايتس
مها : اكلي واعرفه مايحتاج له راي
جلسوا كلهم على سفره وحده عقاب ويمينه مها ويساره منيره وقدامه فارس و ريان
عقاب: فروس شخبار المدرسه
فارس: رحت اليوم
عقاب: بطل
ريان : انا ابي مدرسه
عقاب: اقعد تبي المدرسه تراك ورع باقي سنه وسبع شهور احسبها انت و وعد ادخلك
ريان: وفارس ليه يروح
عقاب: فارس كبير ، المهم باذن الله 10 رمضان بنمشي لديره عند ابوي وعيال عمي واخواني
منيره: ابشر اللي تبيه يصير
مها ناظرتها بحده وسكتت
عقاب: تبشرين بالجنه
فارس: يبه ابي اروح عند وعمر و نادر و ثامروسالم عيال خالي فيصل
عقاب: لا رحنا الديره وكاد مرينا بيت خالك فيصل
فارس: يمه متى جده تجي؟
عقاب: ماشاءالله عمتي بجي؟
مها : باذن الله بتروح بيت اخوي فيصل خامس رمضان وبعدها بتروح عند ابو سيف عاد تعرف اني تروح للي يحبونها من عيال بناتي وابو سيف مايقصر
عقاب حس من ورا كلامها شي وقال : توصل بالسلامه
مها خلصت وقامت وغسلت يدينها وكلهم قاموا
مها شالت الصحن و السفره وباقي البن و الاكواب
وجلست تصب شاهي
جت منيره وقعدت جمب عقاب
عقاب: ما تشوفين الاكواب ذي شيليها
منيره: انا اشيلها
عقاب: ايه انتي كلكم تتساعدون
مها مدت الشاهي لعقاب
عقاب: سلمتي
مها : منيره
منيره: شكراً
مها : ريان انت وفارس روحوا ناموا
فارس: ماوريت ابوي
عقاب: وشهو
فارس راح يركض وجاب شهادته يوريها ابوه بحماس
عقاب: ماشاءالله تبارك الله بعدي بعدي
فارس: ولد جيرانا بندر جاب الثاني وانا الاول
مها: شاطر دايم ابيك الاول
فارس: ابشري
عقاب: اخباركم
مها : بخير الحمدلله
عقاب باستغراب: هالحين محد منكم يعرف اسم الثاني كيف بتسكنون سوا !
مها : على قولتك ساكنين لاحقه اعرف اسمها وسمعت اسمها منك يعني عرفته
منيره باستحقار ونبره كره : انتي مها اسمك صح
مها: بالضبط مها
عقاب: بنام ولاجاء وقت الصلاة قوميني يا منيره
منيره انبسطت انه اختارها ما اختار مها اما مها عارفه باللي يصير راحت وغسلت المواعين و نومت فارس وريان وهي تدعي بغرفتها وتقرا قران