بلاي حبيت نجديه

49

ريما : نجد نجد قومي
نجد فتحت عيونها وقعدت
ام صالح : صح النوم
نجد ابتسمت وقالت : صح بدنتس
ساره : قومي بنتقهوى ومسوين حلى
ابتسمت نجد وقامت لبست عبايتها وطلعت بسرعه غسلت وجها وحطت روج وكحلها الاسود و دخلت بسرعه علشان فهد لا يشوفها
ام فهد : الحلو حلو حتى لو صاحي من النوم
نجد: ياعيوني يا خالتي ، مجود وينه؟
ام فهد : جمبتس نايم
ام سيف: عطيني اياه يازينه زيناه اشتقت له
نجد : ماغير نايم
ام فهد : ورع المفروض اذا ما نام تخافين مو اذا صار ناسم
ريما وهي تصب القهوه مدت الفنجال لام صالح
ام صالح بهمس : حظك يا حمد
ابتسمت ريما واستحت وحمر وجها
ام سيف: مها بتجي 10 رمضان
ام فهد : عاد يوم بنمشي
ام سيف: ما ودي تروحون
ام فهد : ما ودنا كلنا مير اهلنا هناك ولزوم نصوم عندهم ونعيد هناك
نجد : يمه بالعيد تروحين لخوالي؟
ام سيف: اي مير ثالث يوم بنروح علشان ابوتس واخوانتس
ريما : ورمضان ؟
ام سيف: عاد روحتي برمضان ماني ماخذه غير عزوز
ساره : يمه عزوز شايب وش تاخذينه!
ام فهد : تحسبينه ورع تاخذينه
ام سيف: زين يوم سافرت لمها ما اخذته معي
نجد : لازم نزوجه
ام سيف: شكلي لقيت زوجته
الكل مستغرب
ام صالح: عاد مافيه وحده منا عندها بنات ولا فيه كل بناتنا متزوجات
ام سيف: ماهي منا
ام فهد : من بنات اخوانتس؟
ام سيف: لا جارت مها اختي يا عندها بنات ماشاءالله تبارك الرحمن يقولون للقمر قوم واجلس مكانك
نجد : تحمست اشوفهم
ام فهد : بتغطين عليهم انتي
نجد ضمت ام فهد وباست راسها وقالت : يابعد عيوني يا خالتي
ام فهد ابتسمت وقالت : تسلم لي عيونتس تقهوي وخلي الصداع يروح
نجد ضحكت وقالت : ابشري
ام صالح: وعزوز علمتيه
ريما : عزوز مو يقول ماني متزوج لين اتوظف ونسكن بالرياض ؟
ام فهد : بيوتنا تبني ما يهل رمضان الجاي الا وحنا فيه
ام سيف: ماهو لازم يتزوجها هالحين يخطبها ويملك عليها بسم الله عليها الرحمن الكبيره تهبل طول رقبه وعيون واسعه
ساره : وش اسمها
ام سيف: حنين
نجد : اسمها حنين وبتزوجينها عزوز الدفش !
ام سيف: حرام عليتس وعلامه عزوز
ريما : وهي صادقه عزوز للحين ما عقل امس يحارش نجد
ام سيف: نسيتوا سلطان كيف كان وكيف صار
ام فهد : يووه قبل عرسه يتهاوش مع العيال ومن بكره عرسه العقل جاه
ساره : يا بنات بالعقل زوجته بيسوي كذا بعدين يمزح معتس مو نفس مزحه مع زوجته
نجد : اقنعتيني
ريما : هالحين خلونا نخلص من عرس نجد
ام فهد : ونخلص من عرستس
ام صالح: يوه نسيت اقولتس يا شيخه
ام سيف: عساه خير
ام صالح: خير ان شاءالله مير بكره العصر بيملك حمد على ريما
ريما حمر وجها زود وسكتت
ام سيف: حياكم الله
_____________________________________
عقاب: السلام عليكم
الكل رد السلام
عبدالرحمن: يا نوره سويلي عشا ميت جوع
عقاب : سلم طيب
عبدالرحمن: تمون يا النسيب مير ميت جوع
عقاب : قايل لك خلنا نمر لنا مطعم قريب
سعاد : ياحليلك ديرتنا مافيها مطعم تحسب حنا بالرياض
ضحك عقاب وقال : اللي هو ماعلينا جهزتي يامنيره؟'
عبدالرحمن: اقعد تعش معي بتروح وانت جوعان
عقاب : ماعليه يارجال
عبدالرحمن : يا منيره رجلتس جوعان وتخلينه؟'
منيره : افا يخسي الجوع بروح اسويلك عشا
ابتسم عقاب وقال : ماهو لازم هنا بالبيت
عبدالرحمن: اقعد اقعد خلنا نكمل كلامنا على ما يسوون العشا
عقاب: اسلم
عبدالرحمن: الارض هذي على طريق تجاري لو نقلبه مطعم احلف لك يجونه الناس من كل ديره يكفيك هالحين راجعين وميتين جوع
عقاب: هو كم مساحته
بعدها بدقايق جت منيره ومعها العشا وقالت : جعله عافيه تعشوا
عقاب: الله يعافيتس
__________________________________
الساعه 11:30
ابو سيف: ياا ولد يا ام سيف مشينا
نجد : يوه بدري
ساره : الحمدلله انا بجلس وان......
ما كملت كلامها الا وصالح يقول : ساره مشينا
ريما ضحكت وقالت : اجل بتجلسين
ام فهد : والله بدري
ام صالح: من تعلمين
ابو صالح: يا ام صالح تاخرنا
ام فهد ضحكت وقالت: كلهم سوا
طلعوا كلهم مع بعض وفهد كان يحاول يشوف نجد اشغلته جود اللي موصيتها نجد تلهيه لين تطلع
جود : فهد فهد
فهد : سمي
جود : حلاوتي كانت هنا وينهي
فهد : والله مدري يا جوجو شوفيها دوريها هناك
جود : مافيييه شي
فهد : طيب ابشري بجيب لتس بكره جديده
جود : انت اكلتها
فهد ضحك وقال : والله ما اكلتها
صالح : جود امشي
جود : بروح مع خاله ريما وخاله نجد
صالح: راحوا سبقوك
فهد بقلبه: سوتها بنت عبدالله
_______________________
الكل نام ماعدا سيف وسلطان وعبدالعزيز ونجد وريما كانوا جالسين بالحوش ويسولفون
سيف: اقصروا اصواتكم ابوي لا يقوم
سلطان: انا جيتكم ادربي راسي وزوجتي تركتها
عبدالعزيز: بقول ابيات قالها فهد توصف حالك
نجد انتبهت من قال فهد وكانت تبي تسمع كل حرف يقوله
سلطان: اسلم
عبدالعزيز:
والله ان الشوق فاق تحملي
ياشوق رفقاً بالفؤاد الا تعي
حاولت ان اخفي هواك وكلما
اخفيته بالقلب فاضت ادمعي
واني اهيم شوقاً ان مر بخاطري
ذاك الحبيب الذي بعده الم
سلطان: اقععد يا فهد والله انه شاعر
عبدالعزيز: ايه مليعين
نجد : الشاهي لا ينكب سيففف
سيف صفق عبدالعزيز وقال : ماتشوف ؟
عبدالعزيز: شدراني ما انتبهت
ريما : اقول عزوز
عبدالعزيز: قولي
ريما : تبي نزوجك؟
عبدالعزيز: ما ودي لين اتوظف
سيف: توظف
عبدالعزيز: وابوي؟
نجد: طيب اخطبها وملك بعدها تزوجها بعدين
عبدالعزيز: اتزوجها ! من ذي
ريما : امي شافت وحده وتمدحها مدح تقول تاخذ العقل لا تفوتك ياخوي
عبدالعزيز: طيب ما شفتوها انتم
نجد: ماعليك بنشوفها
ريما : يعرس نجد بتجي
سيف: خلوكم من السوالف ذي انا جاني النوم
نجد: خل النوم بكره نبيك تودينا عند العنود انا وريما
سيف: بكره بودي عبود العصر تروحون
ريما : ايه تم بس بقول لامي
سيف: امي بنفسها بتروح
عبدالعزيز: اهخخ يا رعد
نجد: هذا اللي بنزوجه همه خيله
عبدالعزيز : بعلم زوجتي على الخيل
سلطان : امشوا نرقد بس
الكل نام ذيك الليله الا مها
فارس : ماما زعلتي علشان قلت لك وش سوت فيني
مها: ابوك ما قالها شي يوم مدت يدها عليك ؟
فارس :مدري بس بابا عصب بالاول منه
مها: طيب نام الحين
فارس: على خشمي ( قرب وباس راس امه)
مها: اهخ يا امي جعلي اشوف بركم واشوفكم اعلى المناصب
فارس: امين بصير دكتور نفس سيف او بصير نفس بابا لواء وكلهم يحترموني
مها: الاحترام يجيك لو كنت محترم ماله دخل وش بتصير عرفت ياقلبي ؟ فارس هز راسه بمعنا ايه
مها لحفته وقال : تصبح على خير
فارس ابتسم وقال : بحفظ الرحمن
مها ابتسمت وقالت : بحفظ الرحمن يا امي
___________________________________
الساعه 7:30
عقاب: منيره تاخرنا
منيره: هذاني خلصت
عقاب: نوصل العصر ولا نهايه المغرب
منيره : يوه ياويلنا من الطريق
عقاب : ماعليتس يسهلها ربتس
ركبوا و مشوا لرياض
_______________________
اما سلطان راح وجاب الجوهره وهم بالطريق
سلطان: افا يا جوهره قلبي شكلتس منتي مشتاقه لي
الجوهره: ومن قال؟ الا والله بس كيف بقولك قدام ابوي واخواني
سلطان: تصدقين ودي نروح الشرقيه على طول ماش حنا ما اخذ راحتي معتس واجد
الجوهره: الله يستر من هالراحه
ضحك سلطان وباس يدينها وقال: الله لا يحرمني منتس
الجوهره: ولا منك وجعل عيونك ما تشوف غيري
سلطان: اممميين أصلاً ما ابي غيرتس
الجوهره: نقول ان شاءالله
سلطان: افا مافيه ثقه
الجوهره ضحكت وقالت : تتوقعها مني
سلطان: مستحيل
________________________
ام سيف: ورانا ترتيب البيت كله رمضان يا باتسر يا بعده
نجد: على من السحور
ريما : انتي
نجد: تعقبين عليتس انتيي
ريما : مالي دخل دايم اول يوم عليي
نجد: كذابه السنه اللي راحت كان علي
دخلوا سلطان والجوهره
سلطان: بس انتي وياها اصواتكم لين برا ما تخلصون من هواشكم دايم
ام سيف وهي طالعه من المطبخ : خواتك ما تعرفهم
الجوهره ابتسمت وجت عند ام سيف تسلم عليه
ام سيف: هلا هلا بالغاليه
الجوهره: هلابتس
ام سيف: شفيتس انتي وياها
نجد: مين بيسوي السحور ؟؟
ام سيف: ريما لانها الكبيره وبعدها انتي
ريما: يمممه دايم انا اول بوم لييه
سلطان بحده : انا شقلت اصواتكم ما تصير عاليه
الجوهره: خلاص انا بسويه اول يوم
ام سيف: وانا عندي بنتين شفايدتهم
الجوهره: ماعليه يا خالتي
سلطان: يمه وين ابوي و اخواني
ام سيف : ابوك بالمجالس وعزوز بالمحل و سيف اتوقع عند العنود
سلطان : شكلي بتكي مع سند توصون على شي
الجوهره: سلامتك
نجد: ايه مر على سوير قلها نجد تقول تعالي ساعدينا
ام سيف: ساره الضعيفه قايمه فبيت عمتس
سلطان: هالحين اقولها ولا
ام سيف: لا بس دامك فاضي قل لابوك شصار على ذبيحه رمضان
سلطان: على خشمي
ام سيف ؛ عليه الشحم يا امي
طلع سلطان وبطريقه شاف عيال ابو فهد وابو فهد و ابوه واقفين بيمشون
سلطان: افا ياعمي بتروحون خلاص
محمد: الديار تطلب اهلها
سلطان ابتسم وقال : عرس فهد ونجد نشوفكم
ابو فهد: وكاد قبلها باسبوع
ابو سيف: تامر على شي يا خيي؟
ابو فهد : سلامتك مير فهد ولدي انتبه له
ابو سيف ضحك وقال : اللواء فهد اللي عرسه بكره
ضحك ابو فهد وقال : لهالحين اشوفه ورع
ابو سيف: على هالخشم
ابو فهد : عليه الشحم يالله استودعكم الله
ابو سيف: في امان الله
راحوا اهل ابو فهد الا فهد اللي كان بداومه
سلطان وابو سيف وهم بطريقهم للمجالس
سلطان: يبه شيوخه تقولك وين الذبيحه
ابو سيف: يوووه انا كيف نسيتها
سلطان: سهالات
ابو سيف: انا مشغولن بشي ثاني
سلطان: يبه ودي اشتزي من المحل وقاسم و ولده ابراهيم يقولون قل لابوك اول قبل تدفع !!
ابو سيف: لا تدفع شي
سلطان: يبه كذا حرام
ابو سيف: انا سامحن لك
سلطان تنهد وقال : اكيد ؟
ابو سيف: رح ولا تعيدها
راح سلطان وهو كان يبي يشتري الجوهره ذهب علشان اول رمضان معه اختار لها اسواره كانت حلللوه و عريضه وثقيله ومن العيار الثقيل
اخذها و سلم على قاسم وابراهيم وطلع وراح لبيتهم
سلطان: ياولد
نجد : تعال مافيه غير زوجتك العنود مو فيه
سلطان: وينهي الجوهره
ريما: بغرفتها ترتب اغراضك
سلطان: زين
ام سيف: قلت لابوك؟
سلطان: ايه يقول نسيت وكنت مشغول
ام سيف: الله يستر من هاللي شاغله
سلطان ضحك ودخل الغرفه وكانت الجوهره فاله شعرها الاسود الطويل اللي لين نهايه ظهرها وريحه الغرفه كلها عطرها و ملامحها الهاديه اللي تجذب الواحد
ابتسمت سلطان وقال : يا حلو اللي ترتب اغراضي
الجوهره ناظرته وقالت : وياحلوك والله شفيك رجعت؟
سلطان: ما تبين ارجع؟
الجوهره: مو كذا بس استغربت
سلطان سحب يديها وجلسها على السرير وقعد قدامها وقال : تراني احبك
الجوهره ابتسمت وقالت : وانا اعشقك والله اني احبك مدري كيف اخذت قلبي
سلطان: الحمدلله ان ربي كتبتس من نصيبي
الجوهره لاول مره تجرأت وضمت سلطان بقوه اما سلطان الابتسامه شاقه وجهه وانبسط و قرب وجهه من رقبتها و باسها وداهمته ريحه المسك و العطر الخفيف ابتسم وقال بهمس : الله يحفظتس لي
الجوهره بعدت منه وقالت : ويديمك ليي
سلطان قربها ويدينه كانت على خصرها وقال ؛شوفي وش جايب لتس
الجوهره عقدت حواجبها باستغراب وقالت : وشو
طلع الاسواره سلطان وقال : تزهاتس
الجوهره بحماس: تجننن مررره
سلطان ابتسم وقال : عجبتتس اهم شي؟
الجوهره: تاخذ العقلل
ناظرته الجوهره وعينها بعين سلطان قالت : ليه كلفت على عمرك؟
سلطان وهو ضااايع بعيونها قال : انا وكل ما املك فداتس كل اللي اسويه علشانتس
الجوهره ابتسمت وقالت : يابعد عيوني انت
سلطان: عطيني يدتس بلبستس انا
مدت يدها الجوهره ولبسها سلطان الاسواره وقال : يدتس اللي مزينتها
الجوهره كانت تتامل الاسواره وهي مبتسمه
سلطان : علشان اول رمضان انتي معي جبتها لتس