🍃 مشاعر_صامتة 🍃| ( مكتملة )

🌛بارت 83🌜

🌺مشاعر صامتة🌺
                   بقلمي✏️: خولة غزالي🌹
            
بتاسمات ليه و نطقات بنبرة كلها حب تا من عينيها فاضحينها اما قلبها حكاية خرى: راحتي معاك كاينة
عض حنكو من لداخل كابت ابتسامة ديالو تخرج من بين شفايفو و لكن كفاش يقدر يكبت مشاعر ديالو و قلبو لي كيضرب كتر من لقياس حدو نطق بكل حب: كنبغيك
سالا كلمتو و حط شفايفو على شفايفها قبلها قبلة خفيفة معبرة على كلمة لي قال بزز باش وقف ماساخيش بيها كون ماكنتش مريضة كون جمع ليها فم مع حنك مع عين و لكن مرضها شفع ليها
شاف فيها بحب و نطق: انا انمشي تال ليل و نجي عندك صافي
بتاسمات ليه و حركات راسها بايجاب عاضة على شفايفها مخبية خجلها لي مفضوح من حنيكاتها لحمرين اما قلبها حكاية خرى : الله اعونك
بتاسم ليها و نطق: امين
كمل كلمتو طبطب ليها على شعرها بحنان و تم خارج من غرفة و خرج من كنينيك بعد ما علم اناس انه غادي و وصاه عليها مخليها هي قلبها معلق فيه و كيضرب كتحس بلفرحة غمرات قلبها بعد طول دوك الأيام لي كان كتبات باكية او الأيام لي مكانش كيزورها فيهم نعاس بسباب حبها ليه، كتحمد الله على داك العداب لي مادازش عليها غير هكاك و بلا نتيجة

اما عند ناصر لي خرج و توجه نيشان لدار طمأن مو واخا دوا معاها فتيلي الا و ان خوف أم كيبقى تا تشوف بعينيها ولدها انه بيخير و على خير عاد كترتاح و داكشي لي كاين ،خبراتو انها اتمشي مع أسماء يزورو ألاء مامنعهاش بالعكس عجبو لحال كيشوفها كيفاش منجادبة لألاء و باينة عجباتها فراه هادشي بالنسبة ليه كيفرح علاش لا و حنا كيف كنعرفو اي راجل كيبغي علاقة مو و مرتو تكون بيخير (ركزو ليا على مرتو سيد ولا حاسبها مرتو🙂)

توادع مع مو و شد طريقو دقائق قليلة و كان وصل لمركز ، خدا ملف هبط من لوطو و سد لباب قاد سروالو و تم متاجه ناحية لمكتب ديالو ناوي يعيط لثنائي باش يبداو فتحقيق ،مع حل لباب كمش حواجبو راه نية ابلغ من عمل ناوي يكلمهم و هو ناسي انهم مستعمرين ليه مكتب بحال الى هما ما عندهمش بيرو ديالهم
تقدم ناحية ديالهم حيد تيلي من جيبو و حطو فوق لبيرو هو و سوارت و ملف هبط سروالو من جيهة فخاضو و جلس شاف فيهم و نطق بهدوء و هو هاز حاجبو: وليتو كتجلسو فبيرو ديالي كتر ما كنجلس فيه انا
بتاسم ليه إلياس و نطق: ونت بيروك لي فيه راحة امكن داير ليه قبول ياكا
شاف فيه ناصر بحال الى كيقول ليه من نيتك و نطق: خاصني نولي نسدو
إلياس شاف فيه ببراءة و نطق: علينا ياك اشاف غتسدو علينا بحال الى غنشفروك
نطق ياسر بهدوء: غالبا كنجلسو فيه ملي كنبغيو ندويو على شي موضوع سري بحكم بيروك مافيهش كاميرات
نطق ناصر و هو كيحك لحيتو: عطيني شي معلومة جديدة اما هاد معلومة عارفها
شاف إلياس فياسر و ميق فيه بحال الى كيقول ليه ياله زيد خود على قلبك
مد ملف لياسر و نطق: هدا تقرير طبي على لحالة ديالو
شدو ياسر اول حاجة دار مشا نيشان شاف اسم دكتور هز راسو و نطق بتساؤل: اناس و ألاء
هبط راسو لملف و عاود هزو مكمل كلامو بجدية: حالتها صحية باقا عيانة ولكن هي..
ومزال ما كمل كلامو قاطعو ناصر: أصرات على ان تقرير إتكتب ليوما و لمحامي ايجي هو و اناس ليوم حيت فضلات لؤي مايطولش فلحبس خوفا من ان شخصيتو اصلية تختافي بمرة بحكم ان لؤي كيختافي ملي كيحس بضعف و طول ما هو فلحبس ايحس بضعف ادن غالبا شخصية قوية هي لي اتكون دبا فلحبس
اومأ ليه ياسر واخا كيحس بحزن و لكن كيحاول يخفيه و يحضر دماغو و جديتو
تلفتو لعند إلياس لي نطق: ياك اياسر لبارح كنتي ناوي دخل لعندو ملي جبتيني لهنا ،اش بان ليك إنا شخصية حاضرة
ياسر سكت ماعارفش اش ينطق حدو شاف فعينيه نيشان و نطق ببحة: ماشفتوش ماقدرتش ندخل نشوفو
اومأ ليه إلياس فحين ناصر نطق بكل جدية: ياسر من أفضل تحبس قلبك و عاطيفتك و خدم عقلك فهاد قضية حيت هاد قضية بدات محتاجاك كضابط بدكائك و خبرتك فراه الى لحتي عاطفتك و نسيتي انه خوك كنضن غادي تنجح فقضية كتر من انك مفكرو خوك فغادي تكون خايف لا تغلط و غادي توقع فلغلط
تنهد ياسر و نطق تاهو بجدية هادشي لي زوين فياسر و إلياس وقت ضحك ضحك واخا بعض المرات ضحك إلياس باسل و لكن ملي كتكون جدية كيتلقاهم تبدلو 180 درجة: عارف و لبارح مابغيتش نشوفو على اساس خويا اما فتحقيق فهو كيبقا متهم و انا ضابط ضروري نشوفو و نحقق معاه

يتبع...✏️