——— بطلنا ———
-بهاج بن سعود
-٢٨سنه
-بنعرف شخصيته اكثر مع البارتات- .
>>><<<<>>>>><<<<<>>>>
الساعه ٧ المغرب بتحديد بخيمة مطلق -
مجتمعين على الضو وحولهم براد شاهي واكيد جلستهم ما تخلا من البلوت وازعاجها '
وليد : ياعيال يبي لنا سفره سنعه نضبط لها
مطلق : وين نسافر ونخلي الديره
وليد : ما قلت نخليها قلت نروح نغير جو ننبسط
خالد : تراها مب شينه يا عيال فكرو فيها شوي
مطلق : اقول على شحمه انت وياه وخلونا نلعب
وليد ؛ وين نلعب شايف عددنا كم هذي حتى كوره ما تكفي عددها
مطلق : ياكثر هرجك على غير سنع
خالد : صدق وين باقي العيال غريبه ما جو
مطلق : ماردهم بيجون وين بيروحون يعني
تم الصمت بينهم وكل واحد جلس على جواله
بعد دقايق سمعو صوت سيارات توقف برا ظن ببالهم ان اخوياهم جو ' بس للاسف ظنهم خاب "
دخلو مجموعة رجال ملثمين وواضح جيتهم ماهي يم الخير ابد '
مطلق : اخوك ياصبي وش العلم
: خيمة همام سعود ؟
وليد : من انت ؟!
: عن الحكي الزايد وعطونا العلم هاذي خيمته ولا لا
مطلق رفع حاجبه : واذا كانت خيمته وش بتسوي ؟
: انا ماني جاي اضيع وقتي معكم عطوني الزبده ولا
مطلق بمقاطعه تقدم صوبه : وش بتسوي يعني ؟
خالد : ياعيال تعوذو من ابليس ما توصل
: ان ما تبونها توصل لكذا عطوني مكان هالكلب
:""""""""""""
: من الكلب اللي تقصده ؟
لفو على راعي الصوت وزاد القلق بوجيه اخوياه
: من انت بعد ؟
بهاج : ودك تعرفني معرفه حلوه ولا تمسح بك الارض ؟
مطلق : تعوذ من ابليس يابهاج ما يستاهل ترا
بهاج : دامه ما يستاهل خل يعطيني عرض اكتافه
: طالع بس خذوها مني لي رجعه ثانيه والرجعه ماهي عاجبه الجميع الا اذا الشخص المقصود وراني وجهه بينكم
تم الصمت بينهم وطلعو الشباب وبقو العيال يناظرون بعض بحيره وقلق وكيف بيقولون له ان المقصود اخوه !
بهاج : اقعدو وعلموني وش صار من البدايه
قعدو وكل واحد واضح على وجهه التوتر ! هم اللي يعرفون عصبية بهاج ومتاكدين منها ،
قطع الصمت مطلق : وش تبي بهم عيال مهبل مايدرون عنهم اهلهم ووقتهم كله بشوارع
بهاج : وش يبون جايين عندنا هنا طيب
وليد : ياكثر تحقيقك يا بهاج خلاص قلنا لك عيال شوارع جايين يدورون مشاكل بتعطيهم اهميه ؟؟
ناظرهم بهاج وقطع السالفه وسكر عليها : وين باقي العيال ؟
خالد وهو يعدل الجو : الا بسالك اخوك هالتيس ورا ما تقوله يخمد بدري تراه يقروشني الصبح وانا رجال مستعجل
بهاج : وش عنده المستعجل ترا جامعتك وجامعته وحده مستعجل على وش ؟ ان تاخرت تاخر هو بعد
خالد : وانت عاجبك الوضع كذا دايم متاخرين ؟
بهاج : خلاص الله يسد نفسك
مطلق : دقو على العيال خلوهم يجون كلهم يجون
وليد : ليه ؟ بضحكه : بيجتمع القائد ؟
مطلق : ياحبك للهذره صدق وياليتها على سنع المهم دقو عليهم خلوهم يجون ضروري
بهاج : وش علمك انت ؟
مطلق : ياخي انا ما اخاوي الا اللي يهذرون على غير سنع صدق قلت لكم دقو عليهم خلهم يجون وخلاص
قام مطلق وطلع برا الخيمه
بهاج : شفيه ذا
خالد : وراه شيء صدقوني وشيء كايد
بهاج رفع حاجبه بتعجب من الوضع وهو مو مرتاح من اول ما شاف الشباب اللي متلثمين
>>>>>><<<<<<<>>>>>>><<<<>>>>>
الساعه ٩ ونص الليل
بوسط المطبخ وبحوسة المواعين والطبخ موجوده
الجده نشميه : يانغم هالقلب وينس ابطيتي علي
نغم بابتسامه تتوسط شفايفها من صوت جدتها اللي تعشقه وتدعي دايم ان هالصوت ما ينقطع
نغم : لبيه ياجده ثواني وانا عندتس
وصحيح بعد ثواني اجتمعت مع جدتها بالمجلس الصغير اللي يتوسط الحوش واللي ترتاح فيه وتحبه حيل
نشميه : اقول يامس ما ودتس تزورين اميمتس
نغم : بكل اسبوع اتصال عليها واشوف اخبارها
نشميه بعصبيه خفيفه : الاتصال وش يفيد يامس ؟
الا روحي لها برجليس وخليها تشوفس وتشوف كيف كبرتي وكيف صرتي
نغم : حاضر ياجديده ما طلبتي شيء من عيوني بس انتي ريحي نفسس وتبشرين باللي يرضيس
نشميه : اي يامس هالكلام اذاني ودها تسمعه من زمان ' بس شوفيني ان كانس تسكتيني بهالكلام ترا بزعل عليس وانتي عارفه زعلي كيف مايحتاج اقولس
نغم : الا بالله اعرفه واشهد به كل شيء الا وزعلس
كملو عشاهم بكل حب وسوالف وضحك وسعادة غيم بجدتها عميقه ولا تنوصف ' تحبها وتشوف الدنيا فيها وتعتبرها امها الصدقيه بحق انها مربيتها ومكبرتها وتعتبر عايشه معها سنينها كلها ' بعيد عن امها اللي حملت فيها تسع شهور اشد البعد ' تشوف الدنياااا فيها وتعبها يتعبها وضيقتها تضايقها وسعادتها تسعدها ' بخص انها ما عاشت شعور حب وحنان واهتمام الاب ! بس شافته بجدتها خلتها تنسى وجود الاب ' صارت لها الاب والام والاخت والاخ والسند ' امتنانها لجدتها عميق ومحد يقدر يوصفه ولو بذره
أنت تقرأ
"مثل الوطن والأهل جيت أنت "
Random(ألهامي الاول )...🧡 اهلن بكم يالرفاق اتمنى ان تنال اعجابكم روايتي وقراء ممتعه🌷 للكاتبه:دانا تشرفوني بحسابي الانستا: eev.39 اي شي يخص الروايه بينزل هناك مستمرة
