‏"مثل الوطن والأهل جيت أنت "

بارت ٨

الكل وصل بنفس الوقت ، والكل لف من شافو سيف وشيخه داخلين ، شافو اللي وراهم وعرفو انهم نشميه وحفيدتها ، نغم اللي من شافت عدد الحريم والبنات والعيال توترت وقربت تمسك يد نشميه ، نشميه اللي الدموع تجمعت بعيونها من شافت سلطان وسطهم وجنبه عياله وحريمه ، من زمان تتمنى هالجمعه تصير وتجتمع مع اهلها ، عاشت اغلب حياتها بعيد عنهم وعن جمعاتهم ، وهالشيء عندها شي كبير بنسبه لها
تقدمت وهي تسلم عليهم وهي تمسك دموعها غصب
نغم اللي وقفت جنب شيخه بهدوء وخوف ، تشوف نظرات الجميع لها وكانها غريبه بينهم ، هالشيء ترك داخلها خوف من انها تتعايش معهم ، شافت خالها سلطان يقرب صوبها وعرفت انه من قرب راح يعرفها عليهم ، توترت وهي تمسك يدها ، سلطان اللي قرب جنبها ومسكها مع كتفها بخفه ،
سلطان : نغم عبدالله ، هذولا حريم خالك وعيالي
قدمها لهم وهي تسلم على نهله وغزيل ونوره ،
من نظرات غزيل ونوره عرفت نيتهم على طول ،
وعرفت انها بتتعب معهم كثير ، وصلت للبنات اللي واقفين بزاويه ، ابتسمت من ورا النقاب بخفه من شافت ابتساماتهم لها وهي مقبله عليهم ، ريم اللي تقدمت اول وحده وهي تحضنها ، قربت من اذنها بخفه
ريم : واضحه من يدك الرجفه ، هدي
نغم اللي استغربت من ريم وهي حتى للان ما تعرف اسمها وقاعده تهديها ، الكل بدون أستثناء كان طاير عقله بعيونها ، كانت طبيعيه بحت ، رسمتها الربانيه
رموشها الطبيعيه لونها البني الغامق ، كل شيء طبيعي
وقفت جنبي نشميه وهي تتنهد من خلصت منهم ،
سلطان وهو يبتسم بإبتسامه جانبيه ، نوره وغزيل اللي ما شالو نظراتهم ونغزاتهم من نغم ،
سلطان : حياكم الله تفضلو
تقدمو جميع وهم يدخلون وينتشرون بالبر والمخيم
الجو كان جداً جميل ، غيوم وهواء هادي ، نشميه ونغم اللي ماشين ورا شيخه وهي توديهم لخيمتهم ، الكل مستغرب كيف صار عندهم خيمه فجاه ! بس توقعو ان سلطان كان مفكر من زمان ومجهز كل حاجه من اول
هذا سلطان السيف ،
دايم غامض ودايم قراراته تصدم
الجميع ، دخلو خيمتهم وهم يشوفون كل شيءٍ يحتاجونه موجود ، كان صدق كل حاجه مهمه موجوده وكانها مرتبه من زمان ،
شيخه : توه ما نور هالمخيم
نشميه : بنوركم يابعد حيي
نغم وهي ما تدري عن نظرات اعجاب شيخه لها
نغم بهدوء : به عيال ؟
شيخه بضحكه : به ؟ به عيال خالك
نغم بحياء : عندهم مخيم خاص فيهم صح ؟ يعني ما يجون عندنا
شيخه بصدمه من صوتها الناعمه وبحته الحلوه
شيخه : اي ياحياتي انتي عندهم بس يجون هنا بين فتره وفتره او لضروره ،
هزت راسها نغم وهي تبعد انظارها عن شيخه اللي شوي وتاكلها بعيونها ،
شيخه : عن اذنكم اخليكم ترتاحون
بعد ما طلعت نشميه لفت على نغم
نشميه : مبسوطه ؟
نغم بابتسامه بعد ما طلعت النقاب : مدري ، احس الوضع غريب منيب متعوده
نشميه بابتسامه: بتتعودين عليهم ، هذا البدايه بس
نغم : بس ، في ثنتين نظراتهم ما جازت لي ، من بدايتها يعطوني نغزات ونظرات ، ما ارتحت لهم
نشميه تنهدت باسى وهي عرفت مين تقصد
نشميه : نوره وغزيل ، حريم خالك هذولا عمرهم ما تعدلو ، من يوم اخذهم لي يومك هذا وهذي هي طينتهم ، لا تعطينهم وجه وابعدي عنهم ، بتتعبين لا تناقشتي معهم
نغم : طيب انا غريبه عليهم مب من بدايتها كذا حركاتهم
نشميه بضحكه : عشرة عمر معهم انا ، وشوفيهم ليلحين اسلوبهم معي ما تغير ،
نغم بتغير الموضوع : ماعلينا طيب الحين كيف
نشميه : وشهو اللي كيف
نغم : اقعد بعباتي ونقابي ولا وش ، كل اللي جايبته فساتين ناعمه وما تدفي وواضح من الجو ان بالليل بيبرد زود
نشميه : بيحلها ربتس ، قومي الحين طلعي عباتس وضبطي شعرتس خلينا نروح لهم ، عانيهم حطو الجلسه
نغم اللي طلعت عبايتها وهي لابسها فستان بيج بزخرفه
على الكتف ونهاية الفستان بلون وردي فاتح ، كان مربوط من جهة الخصر والبطن ، موضح جسمها النحيف وخصرها الصغير ، طالعه جميله زود ، والفستان الكيوت جملها اكثر ، فتحت شعرها اللي يوصل لنهاية ظهرها باللون الاسود الغامق ،
وشالت الخصلتين اللي قدام وربطتهم ورا بحركه تعطيها طفوله وجاذبيه اكثر ، حطت بلاشر خفيف باللون الوردي الفاتح وطبطبة روج خفيف على شفايفها لاجل يطلعها طبيعيه اكثر ، انتهت من رشة عطرها اللي يمثلها ويمثل نعومتها ، خذت طرحتها وحطتها على راسها بخفه وكتوفها ، لاجل يطلع شعرها من ورا بحركه تجذب
طلعت من شافت نشميه تطلع قدامها ، مشت بهدوء من شافت الكل مجتمع بالجلسة الخارجيه ، والقهوه والشاهي والحلويات والتمر وسطهم ، توترت وهي تشوف نظراتهم لها واللي واضح منصدمين منها ،
تقدمت صوب جدتها بسرعه وهي تتكلم بخفوت
نغم : انا برجع الخيمه
نشميه : حصني نفستس وتوكلي على الله ، لا تخافين ما ياكلون بشر
نغم بنبرة بكي : بس ياكلون بعيونهم يا جديده
ابتسمت نشميه وهي تقعد جنب شيخه من اشرت لها
ريم اللي شافت نغم بتجلس جنب نشميه وهي اللي تمسك يدها بخفوت ، لفت نغم وهي أساسًا ودها تحصل شيءٍ تبكي عليه لاجل ترتاح وتفتك
ريم بابتسامه : تعالي جنبي
نغم اللي ما قدرت تقول شيءٍ وهي تحس صوتها اختفى فجاه ، جلست جنبها وهي تتنهد من قعدت قدام غزيل ونوره بضبط ، ريم بهدوء من شافت رجفة يدها
ريم : ودك نمشي ؟ تخففين عن روحك هالرجفه
نغم وهي معد تقدر تمسك نفسها اكثر وقالت بكل عفويه
نغم : ودي اهج من هالمخيم بكبره مب بس امشي
ريم اللي ضحكت من عفويتها ونظراتها اللي فيها دموع
ريم مسكت يدها ووقفتها معها ، غزيل اللي لاحظت صداقات ريم ونغم اللي فجاه قوت وهم اول مره يتقابلون
غزيل : ما يمدي يا ريم هالصداقه ، خلي ضيفتنا تتقهوى ، نغم اللي لا ارادي شدت على يد ريم من تكلمت غزيل
ريم : ضيفتنا تبي تتنفس الظاهر هواء ربي بهالمكان انشفط من كثر الحش فيه

-الساعه ٦ ونص المغرب-

البلوت اللي ما وقف من العصر ، والشاهي اللي هذي ثالث مره يشغلون عليه ،

مطلق : قسم بالله انكم ما تستحون على وجيهكم
بتال : افا ليه
مطلق : ليه ؟ لعنبو بليسكم من العصر وانتو تزطون من هالشاهي وهالبلوت ، طالعين مخيم ليش ؟ اقعدو بالاستراحه ابرك
غيث : يعني وش تبينا نسوي ؟ بر وجو زين وهواء حلو وش نسوي فيه
مطلق : قلت كل شيء الا انك وش تسوي ، قومو شفو لكم فعاليه نسويها دبابات شييء بدال هالبلوت التعبان
همام : هي حدك على البلوت
مطلق : ياخي انطم انت اكثر شخص يلعب ولا يطفش وياليت يفوز بعد
همام بشهقه : انا ما افوز ؟ بهاج كم مره فزنا عليهم كم
مطلق : عشان بهاج معك فزتو بس لو معك احد غيره كان حتى ريحة الفوز ما شميتها
بهاج اللي ضحك وهو يشوف نظرات همام لمطلق
نايف : قلت لكم خلونا ناخذ دبابات من جارنا ذاك بس محد طاعني
بهاج تنهد : ياليل السرى ، سوو اللي تبون مالي دخل
مطلق : همام وخالد روحو كلمو الرجال
خالد : ورا ما تروح انت ! انت اكبرنا مفروض انت اللي تروح
مطلق : حسستني شايب عندك وش اكبركم
همام : بهاج
بهاج : لعنه روحه مانيب رايح
بتال : اسمع الرجال طيب
بهاج : اني اعرفه واعرف وش يبي ، بس يبّطي
همام : افا بس ، هذا وانا اخوك الوحيد
غيث : وحنا وين ذلفنا
همام : ياليل التبن
بهاج : انا وبتال نروح اشوف ظل واحد فيكم وراي حشيت رجوله حش ،
همام : عز الله يعزك ياشيخ
بتال : وين اللي يبّطي ! اول واحد قام انت
بهاج : قم قم انجز قبل اكسر الدبابات فوق روسكم
قام بتال وهو يضحك من معاملة بهاج المتناقضه ،

خذو الدبابات وبدا الكل ياخذ دبابه ، بدا لعبهم برا وبدا الازعاج والضحك العالي بينهم ، كانو مستمتعين جداً
محد كان يفكر وقتها الا بسعادته الطاغيه اللي قاعد يعشيها ومرتاح فيها ،

<<<<<<<<<<<<<<>>>>>>>>>>>>

ريم : ارتحتي ؟
هزت راسها نغم وهي صدق ارتاحت من بعدت عنهم
ريم بتأمل لعيونها ووجهها الطفولي
ريم : جميله !
ابتسمت نغم وهي تنزل راسها بخجل
ريم بضحكه : انا نسيت اعرفك على نفسي
نغم بابتسامه : اسمك ريم
هزت راسها : وانتي نغم ، اسمك حلو ، وله معاني كثيره حلوه وعميقه زيه
نغم بابتسامه أسى : ابوي اللي سماني
ريم ابتسمت : الله يرحمه ، طيب اسمعي انتي ليلحين ما عرفتي الباقي صح
هزت راسها نغم بـ لا
ريم : انا اعرفك عليهم ، شوفي الله يسلمك ابوي متزوج اربع ، لا تنصدمين عادي تعودي مثلنا ، امي نهله ، زوجة ابوي الثانيه ، اخواني من امي وابوي ثنين
سلمان وسارا ، انا اصغر من سلمان بسنتين ، واكبر من
سارا برضو بسنتين ، عمتي شيخه زوجة ابوي الاولى اللي جابتكم مع اخوي سيف  ، عيالها سيف وبشاير وشهد
اما نوره الثالثه ، بنتها وصايف ، وغزيل الرابعه ، بنتها سلاف ، اساميهم قريبه من بعض من الصداقه اللي صارت فجاه بين امهاتهم لا تساليني كيف
وهذي شجرة اهلي
نغم اللي ضحكت بخفوت : ماشاءالله بس كيف كلكم ساكنين في بيت واحد
ريم : تعودنا ، وكلنا انا واخواني وخواتي على قلوب بعض مابينا عداوه ولا شيء ، الا وصايف وسلاف نفس طينة امهاتهم وهم بنفسهم اللي مبعدين عننا
نغم :

•انتهى•

اعتذر جدا على التاخير اتمنى عوضتكم 🙂♥️♥️

اعطوني رايكم ؟🤔