‏"مثل الوطن والأهل جيت أنت "

بارت٢٩

-نغم-

لابسها فستانها اللي لونه وردي هادي ، مع شعرها اللي فاردته وعلى طبيعته ، اكتفت بالبلاش وطبطبت روج خفيفه ، تعطرت بعطرها المعتاد ، واللي يشبها بنعومتها ، تنهدت وهي تقعد على الكرسي وتناظر نفسها بالمرايه ، تذكرت اللي حصل امس ، اول ليله تجمعهم على سقف واحد ، وعن قرب ، حتى لو بينهم مسافات بسيطه ، تذكرت بعد ما قبل راسها ولاول مره ، حست بشعور لاول مره بحياتها تحس فيه ، وما تدري بايش تصنفه ، وما تنسى نبرته بكلامه لمًا قال
( بقدر خوفتس وبتركتس على راحتس، ومستحيل يصير شيءٍ بدون رضاتس، نامي على السرير ، الكنب يوسعني)
ابتسمت بخفه من تذكرت لما صحت الفجر وهي تشوفه نايم بعمق ، واضح من ملامحه بالنوم انه كان تعبان كثير ، وما ذاق النوم ، صحت من عمق التفكير وهي تقوم وتتجه للمطبخ ، صبت لها مويه وهي حرفياً فاقده وجوده ، من صحيت ما حصلته ولا شافته ابداً ، ترددت تتصل عليه بس قبلت ترددها وكنسلت الاتصال ، خذت كاس المويه وهي تقعد على الكنب المقابل التلفزيون ، مسكت الريموت وهي تنتقل بين القنوات بملل ، فزت بخفه وهي تدور جوالها ، مشتاقه موت لجدتها ولصوتها بذات ، مسكت جوالها وهي تتصل وتتنهد براحه ،

ثواني وهو يوصل لها صوتها ، غمضت عيونها بشوق وهي تكتم دموعها اللي متعبتها بنزولها السريع ، وانها ما تقدر تسيطر عليها ابد

نشميه بلهفه: يامرحبا بهالصوت وراعيته
نغم بابتسامه كبيره : جديده !!
نشميه بابتسامه: يا روح جدتس انتي
نغم : مشتاقه لتس كثير كثير كثير
نشميه : ماهب كثر شوقي لتس ، شخبارتس يامي
نغم بابتسامه: بخير الحمدالله
نشميه : شخبار رجلتس
نغم بابتسامه خفيفه من الاسم : بخير ماعليه
نشميه : ما ودتس تسيرين علي ؟
نغم بلهفه: وهذا سؤال ينسال يا جديده ؟ الا ودي وخاطري مره ، بس مادري عن وضعه
نشميه : ماهو عندتس ؟
نغم : لا
نشميه : اجل خليها بكره عشى
نغم بصدمه : عشى ؟ منهو له ؟
نشميه بضحكه : لي انا ! لتس انتي ورجلتس
نغم : وش له داعي يا جديده
نشميه : هذي الاصول يامتس ، بعدين تعالي انتي حاكيتي امتس ؟

نغم بهدوء : مو انتي تدرين اني عزمتها للعرس ، ولا جت
نشميه بضيقه : ماتدرين عن الظروف يامتس
نغم : ظروف ؟ وش الظروف اللي تمنع الام من حضورها لزواج بنتها البكر ؟! اذا هي أساسًا من درت بزواجي حتى كلمة مبروك ما قالتها ، وش تبيني اكلمها فيه وهي مضايقتني بيوم زواجي !
نشميه بزعل : بكلمها لتس ، وبشوف وش اللي منعها بس
نغم بمقاطعه : جديده اذا تحبيني ، لا تكلمينها خليها بحياتها مع زوجها وعيالها
نشميه تنهدت : على هواتس يامي ، توصين على شيء ؟
نغم بابتسامه: سلامتس جديده ، وطلبتس لا تزعلين من حكيي ، ما قلت الا الصدق ومحد يلومني
نشميه بابتسامه: محد يلومتس يامي ، يحق لتس ، بس انا قلته لان
نغم بمقاطعه : ما قلتي شيء غلط ، بس انا اللي تحمست وعصبت
نشميه : سلمي لي على رجلتس ، فمان الله
نغم : فمان الله ياجديده
سكرت منها وهي تتنهد بزعل ، بس فزت على طول من شافت بهاج الواقف عند الباب والواضح انه سمع كل شيءٍ دار وحصل