‏"مثل الوطن والأهل جيت أنت "

بارت ٢٦

-الاربعاء ، قبل الزواج بيوم-
الساعه ١١ الليل

دخلت غرفتها بتعب وهي تطلع عبايتها ، انسدحت وهي مصدعه ، طول الايام اللي راحت كانت تجهز كل شيء ، ولو بيدها ما سوت كل هالاشياء ، بس البنات معها يعني مستحيل تتكلم او ترفض شيء ، مسكت جوالها وهي تفر بالبرامج باهمال ، فزت وهي تصارخ بخفه من اتصل بهاج ، من يوم اخر مره اتصل عليها ومن سكرت بوجهه معد اتصل ابد ، هدت نفسها وهي ترد بهدوء

نغم : الو
ابتسم لا ارادي : ارحبي ، شمسويه
نغم بابتسامه : بخير الحمدالله
بهاج وهو بنفس الابتسامه : وانا بخير وطيب
نغم مسكت راسها بفشله
بهاج : جاهزه لبكره ؟
نغم : باذن الله
بهاج : متوتره ؟

نغم لا ارادي : اذا انا طول الايام اللي راحت متوتره وماسكه بكيتي كيف بكره بكون ؟ يمكن يغمى علي
سكتت من سمعت ضحكته ، استوعبت على نفسها وهي تعض شفتها بخفه ،
بهاج بهدوء : بسم الله عليك
نغم بابتسامة خجل من كلمته
بهاج : سلطان يقولي إنك طلبتي العرس عائلي !
نغم بوهقه : ايوه ، انت كنت تبغاه كبير ؟
بهاج : لا عادي ، وأساسًا كنت بخليه عائلي ، بس انتي سبقتيني
نغم ابتسمت بهدوء ، بهاج اللي سكت من هدوءها وكلامها اللي ما يطول ، تنحنح بهدوء
بهاج : توصين على شيء ؟
نغم : سلامتك
بهاج ابتسم : انتبهي لعمرك بكره ، لا تطيحين عليهم
نغم ضحكت بهدوء : هذا اللي خايفه منه
بهاج اللي تأمل صوت ضحكتها الهاديه والناعمه ، لاول مره يسمعها من عرفها ، نغم اللي ابتسمت بخجل من سكوته ،
بهاج : ودعتك الله
سكرت وهي تمسك وجهها بفشله ، بهاج اللي تنهد من سكرت وهو يطلع زقارته بابتسامه ، مبسوط فيها ،
ينتظر بكره بفراغ الصبر ، ويبيه يجي بسرعه

<<<<<<<<<<<>>>>>>>>>>>

لارين اللي كانت ماهي مصدقه اليوم كله ، وكانت مبسوطه جداً ، ومرتاحه من تقبلوها على طول ، ومن عطوها رقمهم ، وكلمة بهاج اللي تدور بـ مسامعها
( لا تستحين مننا ، حنا اخوانك ، اي شيء تبينه دقي ولا تستحين ) ابتسمت بحب وهي تنزل بروقان ، ما لاحظت عدم وجود امها اليوم كله ، وهي شبه تعودت على اختفاءها ، سوت لها كوفي وهي تطلع للحديقه ، صارت تمشي بهدوء وهي تتذكر احداث اليوم ، امنيه من امنياتها تحققت ، وهالشيء مريحها ، مسكت جوالها من جيبها وهي تطلع من اتصل ، ابتسمت وهي ترد بهدوء

لارين بروقان : أهلاً أهلاً
هنوف : اوف اوف شكل الروقان عالي اليوم ؟
لارين بابتسامه : واصل لمرحله عاليه بعد
هنوف : روقيني معاك
لارين : ماهو الحين ، خليني اقابلك بكره بمكان واعلمك
هنوف : تم بس وين ؟
لارين : برسلك الموقع انا بكره
هنوف : تمام

لارين : اصبري نسيت اسالك
هنوف : ايش !
لارين : وش صار على المستشفى ! سويتي اللي قلت لك ؟
هنوف : ايوه سويته وقالو لي نرد لك الاثنين
لارين بزعل : الاثنين ! مطول مره ، وانا قعدت البيت ما احبها تطفشني
هنوف : تصبري ماعليك ، واذا على الطواله بالايام تعالي زوريني ، بيتي من زمان ما جيتيه ، واشك انك ناسيته بعد
لارين ضحكت : حرام عليك ، بس انتي ياختي اخوانك ماشاءالله كثار ! وكل شوي طالعين وداخلين وانا استحي منهم
هنوف : خليهم يشوفونك يمكن واحد منهم ياخذك وتجين تسكنين عندي
لارين بشهقه : ياويلي منك ! يلا يلا روحي خليني في روقاني لا تخربينه
هنوف : بكره بعرف سبب هالروقان بكره ، مردي بعرفه
سكرت منها وهي تبتسم بحب ، بس تلاشت ابتسامتها من شافت سواق امها يوقف بالمواقف ، وقفت وهي تتنهد ، ليلحين حازه بخاطرها التصرف ، واللي زاده من تجاهلتها ولا اعتذرت لها ولا كلمتها من اخر مره ،
شافتها تجي قدامها وتناظرها ،

مزن : وش موقفك هنا ؟
لارين بجديه : امشي
مزن : واحد يمشي هنا ! روحي الحديقه الخلفيه امشي فيها ، مو هنا قدام الشارع لا عبايه ولا شيء ،
شافتها تتجاهلها وتدخل البيت ، ضحكت بصدمه من انفجرت بوجهها على طول
لارين بصدمه : قلت شيء غلط انا ؟
هزت راسها وهي تكمل مشي ، مطنشه الكل واولهم امها ، اللي ناظرتها من الدريشه وهي تشوفها تكمل مشي ومطنشه كلامها

<<<<<<<<<<<<<<<>>>>>>>>>>

-الخميس ، الساعه ١٢ الصبح-

صحت من النوم بروقان ونشاط ، دخلت تتروش على طول ، طلعت وهي لافه الروب عليها ، وقفت قدام المرايه بشعرها المبلل ، رطبت وجهها وهي تشوف نفسها ، اليوم عروسه ،

اليوم بتدخل حياة جديده ، وبتعيش مع شخص جديد ، هالفكره لحالها مخوفتها عن الليله كلها ، كملت لبس وهي تنشف شعرها على السريع ، تعطرت وهي تنزل وتحصل الكل قايم ويجهز ،
راحت المطبخ وهي تسوي لها فطور ، افطرت وهي قاعده تشوف تجهيزات الكل ، شافت شهد تنزل بسرعه
تقدمت صوبها على طول

نغم : بشويش لا تطيحين
شهد بسرعه : الارتست وصلو وصلو
نغم اللي تنهدت بتوتر من استوعبت ان الموضوع بدا
يصير جدي ، كانت تكذب على نفسها وهي تهديها طول الوقت ، بس من شافت الميك اب واجهزة الشعر ، بدا توترها يزيد ، نشميه اللي ما شافتها من صحت ، كانت مشغوله مع شيخه بالتجهيزات ، غزيل ونوره اللي رايحين لصالون مع بناتهم ، كالعاده بكل مناسبه ما يتجهزون مع الكل ، لحالهم فقط

-يوم الخميس ، يتثبت من الأيام السعيده ، لاجل يثبت هالزواج للكل " بهاج بن سعود ، نغم بنت عبدالله "
انكتب الاسم بالاسم ، وتبخر هالاسم المرتبط للجميع
للقريب وللبعيد ، نغم حرم بهاج بالاسم والشرع والقانون ،

انتهى