‏"مثل الوطن والأهل جيت أنت "

بارت ٣٠

نغم بدون ما تناظره : كم له معاك ؟
بهاج وهو يمسح على جسار : ست سنين
نغم بابتسامه : ان شاء الله طول العمر
بهاج بجديه : بوجودك
نغم اللي بلعت ريقها بصدمه ، شدت على يدها وهي تناظر المكان وهي معجبه فيه بشكل كبير ،
نغم : ودي نشوفه كله
بهاج اللي كان بيرد بس قطعه الاتصال اللي جاه ، ناظرته وهو يرد بدون ما يناظر اسم المتصل

بهاج : هلا
جابر : بهاج ، وينك !
بهاج : هلا هلا جابر ، موجود وش بغيت
جابر : فاضي ؟
بهاج باستغراب : جابر وش عندك !
جابر : ما عندي شيء يابن الحلال بس مشتاق لك ، متى ما فضيت تعال القسم ابي اسولف معك
بهاج : اكيد ؟
جابر بابتسامه : اكيد يابو سعود
بهاج : تم بجيك بس بتاخر شوي
جابر : خذ راحتك
سكر منه وهو يناظرها تناظره ، كانت طول ماهو يكلم كانت مركزه فيه وتناظره ، تعمقت في ملامحه وعيونه ،
صحت على نفسها من لف عليها بصمت
بهاج : بنفر شوي بعدها بحطتس عند خالتس
هزت راسها وهي تمشي معه بهدوء ، بينهم مسافه بسيطه ، كانت ماسكه يدها الثنتين في بعض ، وتناظر المكان بانشراح وراحه ، اما بهاج اللي تعود على المكان ودايم يجيه ، بس يحس هالمره كانه اول مره يجيه ، واول مره يشوفه
<<<<<<<<<<<<<<<>>>>>>>>>>>>

البنات كانو قاعدين بالحديقه ، كان سيد جلوسهم الشاهي ، والمكسرات ، كانت جلسة مريحه جداً ،
وسوالف الهاديه ، للحظه الكل سكت ، وصار الصمت سيدهم ، تنهدت ريم وهي تناظر كاسة الشاهي اللي بيدها

ريم : فاقده نغم تدرون !
شهد : كلنا والله ، مكانها واضح بينا
بشاير : مع اننا ما تعمقنا معها ، بس حسيتها وحده مننا
سارا بابتسامه : الله يوفقها يارب ، ويكون عوضها بعد كل هالسنين
الكل : امين يارب
شهد : طيب خلاص اوف وش فيكم حزنتو بسم الله عليها البنت مع زوجها ومرتاحه ومبسوطه ما درت عنكم
ريم : ان شاء الله انهم مرتاحه ومبسوطه ! بس حنا نسولف عنها يعني عادي
بشاير : طيب ترا جعت انا ، بطني امتلى شاهي وحب خلاص
سارا : قسم بالله احلى عشى هذا
ريم : ماهو وقت عشى مطولين روحي سويلك اي شيء خفيف ، لا تشبعين ياويلك
شهد : بسم الله حتى توها ما قامت شفيك
بشاير : معد ابي خلاص يوه
لفو كلهم من السياره اللي وقفت بالمواقف ، ركزو وهم يشوفون اللي يسوق ، بس من بعد المسافه ما حددوه
بهاج بهدوء : اذا خلصت شغلي مريتس
نغم بهدوء وتردد : طيب عادي اطلب منك طلب ؟ بسيط مره !
بهاج اللي فهى من نظراتها اللي ترجيه وصوتها الهادي وطلبها منه
بهاج بهدوء : انتي اطلبي وآنا أقول تم
نغم اللي بلعت ريقها من نظراته لها ، ونبرته بكلامه
تنهدت بهدوء : تسمح لي انام هالليله عند جدتي ؟
بهاج اللي ابتسم بخفه : تونا اول يوم يا نغم
نغم اللي شدت على يدها بقوه من توترها
بهاج اللي ناظر كيف شاده على يدها بقوه
نغم هزت راسها بهدوء : تمام
نزلت وهي تسكر الباب بهدوء ، ظل يناظرها وهي رايحه
تنهدت وهو يحرك بهدوء ، نغم اللي بلعت ريقها براحه من نزلت من عنده ، البنات اللي شهقو بفرحه من شافوها ، ركضو لها وهم يحضنونها بحب وضحكهم العالي ، نغم اللي من شافت ركضهم لها ابتسمت بقوه وحب لهم ، بعدو عنها وهم يسلمون عليها وياخذون اخبارها ، غطوها وراهم وهم يدخلون البيت بهدوء ، لفت عليهم نشميه اللي كانت قاعده مع نهله بصاله ، شافت وقوفهم وهم يناظرونها بهدوء ،
نشميه : شفيكم واقفين تعالو اقعدو
نغم اللي طلعت من وراهم وهي تركض لنشميه بضحكه ، نشميه اللي انصدمت من حضنتها نغم بقوه ، شدت عليها وهي تغمض عيونها بقوه ، نشميه اللي قعدت ترحب فيها وهي بحضنها ، بعدت عنها وهي تناظرها بتأمل ،

نشميه : يابعد هلي ودنيتي
نغم وهي تحضنها : مشتاقه لتس قد الكون كله
بعدت عنها من سمعت صوت سلطان اللي نازل مع نوره اللي ناظرتها بكرهه ، اتجهت له بابتسامه وهي تسلم عليه وتبوس راسه

سلطان بابتسامه: حي الله بنيتي
نغم بابتسامه : يحييك
لفت على نوره وهي تبتسم لها بهدوء ، نوره اللي ابتسمت لها بكرهه وسرعان ما امحت ابتسامتها
سلطان بهدوء : الا بهاج وينه
نغم بتنهيده : حطني وراح ، عنده شغل
سلطان وهو يمسكها مع كتفها : والله سوا خير يومه جابتس عندنا ، يا مرحبا والله ومسهلا
قعدو وهم يسولفون وياخذون علوم بعض ، نغم اللي كانت الفرحه بصدرها كبيره ، كانت ماسكه يد نشميه طول ماهي جالسه معهم ، كانت مطنشه نظرات نوره لها ونغزاتها لها

<<<<<<<<<<<<<>>>>>>>>>>>>

وقف عند الخيمه وهو ينزل بهدوء ، ابتسمت بخفه من سمع اصواتهم العاليه ،

بهاج بابتسامه : عساكم ما نسيتوني
الكل فز وهم يهلون ويرحبون فيه ، سلم عليهم بحب وهو يناظرهم بشوق ، ناظر همام اللي كان يناظره بشوق كبير ، تقدم صوبه وهو يحضنه وهو يشد عليه
بهاج : يامرحبا بٰـ عضيدي
همام بابتسامه: يامرحبا بك
بعد عنه وهو يجلسه جنبه ، اخذ الفنجال من مطلق وهو ياخذ علومهم ويناظرهم بحب ، من زمان عنهم وعن جمعتهم ، يحس نفسه غايب عنهم سنين طويله
بتال بضحكه : يوه يا بهاج يوه
بهاج ابتسم: يالبيك والله
غيث : اي اخوي بهاج بحكم ان لك يوم من الزواج ، هل تنصحني فيه او لا ؟
مطلق : انت اول شيء شل مسؤلية نفسك عشان تشل مسؤلية حرمه وبيت
نايف بضحكه : اوف يا غيث اوف لو ما تردها له صدقني بتطيح من عيني
غيث : الله وكبر عينك والجنه عاد ، بعدين امون على مطلق شدخلك
بهاج اللي كان مطنش الكل ويناظر همام الهادي وكان يناظرهم بهدوء ، هزه بهدوء وهو يناظره ، همام اللي لف عليه بابتسامه ،
بهاج بهدوء : تعال برا
قامو ثنينهم وهم يطلعون برا الخيمه ، وقف معه وهو يحط يده على كتفه ويناظره بهدوء
بهاج بهدوء : شلونك يا همام
همام بابتسامه : بخير يالله لك الحمد
بهاج : اكيد ؟
همام : تعرفني يا بهاج ، لو فيني شيء قلته على طول ماني مخبي عليك
بهاج : ادري اني بعيد عنك الفتره اللي راحت ، بس
همام بمقاطعه : ما الومك ياخوي ، يشهد الله اني ما الومك ابد ، وادري انك ما تسوي الغلط ، ادري فيك
بهاج ابتسم: كيف الجامعه معك !
همام : بدت اسوي مشروع التخرج ، صار اون لاين
بهاج : واخيراً
همام بضحكه : تشوف ، خلاص بتخرج
بهاج : عسى فال الخير والسعاده يوألفك
همام : امين وياك يارب ، ها علوم العرس
بهاج تنهد : ليلحين ، الوضع مكركب
همام : بتزين ياخوي ، تصبر انت بس ، وخلها على ربك

انتهى