‏"مثل الوطن والأهل جيت أنت "

بارت٥

قامت وهي تعدل نفسها وتطلع من الغرفه ' حصلت جدتها تضبط القرص ' والشاهي '
دخلت وهي تحضنها من ورا بخفه ' باست راسها وكتفها '
نشميه بابتسامه : ياصباح الدنيا
نغم بنفس الابتسامه : صباحي انتي '
نغم بشهقه وهي تلف نظرها للعجين : قرص بدوني ؟ ما هقيتس تخونيني افا بس
نشميه بضحكه : وهالقرص من بياكله معي ؟ ما به غيرتس يونسني بلقمتي ووحدتي
نغم : مانتي وحيده ' انا معتس ' بعدين المفروض تنتظريني انا اسويه مو تقولين احبه من ايدتس ؟ ولا تجاملين ؟
نشميه : ما عّينتي غيري يجامل ؟ بس يامس ذبحني الجوع وأنتي ماشاءالله عليتس نايمه لين بعد صلاة الضحى
نغم : امس ما نمت الا بعد ما صليت الفجر
نشميه : ماعليه انا وانتي واحد ' وهالحين شيلي السفره ووديها للحوش
نغم : من عيوني
شالت السفره وودتها للحوش وهي تفرشها على الفرشه
سمعت الباب يدق وهي تستغرب دقته ' محد يدق الا اذا طلبو شيء ونادر يطلبون ' راحت ورا الباب وبنبره ناعمه جداً وبهدوء '
نغم بهدوء : مين !
رفع عيونه من الصوت الهادي وناعم ' عمره ما سمع نفس هالنبره ابد ' ما يخفي انه عجبته ووده يطق الباب مره ثانيه لاجل يسمعها اكثر
تنحنح وهو يحط الاغراض عند الباب '
ويركب سيارته ' وقف وهو يشوف الباب يفتح بهدوء ' وده يوقف ويشوف اليد اللي بتشيل الاكياس ' بس تنهد وهو يحرك بدون ما يسمع لقلبه
' استغربت من سمعت اصوات اكياس عند الباب ' ومن سمعت باب السياره يتسكر فتحت الباب بهدوء ' شافت اكياس خضره واكياس فواكه ونواشف ' شالتها بسرعه وهي مستغربه هالرجال ' راحت للمطبخ ركض
دخلت الا نشميه تلف عليها بسرعه
نشميه : بسم الله عليتس شفيتس تركضين
نغم بتعب من الركض : جده فيه رجال طق الباب وحط هالاكياس وراح
نشميه باستغراب : عرفتي منهو ؟
نغم رفعت اكتافها : لا ولا حتى تكلم حطها وركب سيارته وانا فتحت الباب ما عّينت احد
نشميه وهي تمسك الاكياس وتفتشها
نشميه : ظني انه فاعل خير
نغم : وليلحين في فاعل خير ؟
نشميه بإبتسامه : فيه ' بس نادر تعّينينهم
نغم : الحين كيف نعرفه ؟
نشميه بنظره : وانتي شعليتس منه ؟
نغم بتبلعم : ها لا ولا علي منه ولا شيء ' بس اول مره تحصل عشان كذا مستغربه بس
نشميه : ايييي خلي عنتس الحكي ورتبي الاغراض وتعالي نفطر ' ما بقى شيء على اذان الظهر شيء '
نغم وهي تمسك الاكياس وترتبهم ' ما تخبي انه شاغل بالها من الاغراض ' سمعته وهو يتنحنح بدون ما يقول كلمه وحده ' عرفت انه رجال بمعنى الكلمه ' من سمع انها بنت وهو ما نطق بـ كلمه وحده ' تنهدت وهي تطلع من المطبخ وتروح تفطر وتشيله من بالها
<<<<<<<<<<<<>>>>>>>>>>>
-الجامعه-
طلع من غرفة الاداره بعد التعهد اللي خذاه تنهدت وهو يلف على خالد اللي طلع وراه
همام بضحكه : حلوين كلنا تعهد
خالد : يابن الحلال فداك التعهد
همام : وانت شايف انه شيء يرفع الراس ؟
خالد : قسم بالله ما تستاهل
همام : طيب الوضع كيف الحين
خالد : وش فيه
همام : بهاج
خالد بتذكر : يووووه صح ' مب لازم تعلمه طيب
همام : صاحي انت ما اعلمه ' انت خابر اني ما اخبي عليه شيء
خالد : اجل تحمل اللي بيجيك
همام : امش امش نطلع قسم بالله كتمه مب طبيعيه
خالد : عازم ولا معزوم ؟
همام : ولا واحد على الاستراحه يلا
خالد بتأفف : امش الله يسد نفسك
طلعو وهو يتجهون للاستراحه ويتصلون على العيال ويشوفون اخبارهم '
مطلق : تعالو مجهز لكم غداء يحبه قلبكم
همام : قسم بالله انك تفهم يا مطلق
خالد : اكيد ما همك الا بطنك وياليت تسمن
همام : قل ماشاءالله لا تحسدني

خالد : احسدك على وش ' يلعن بليسك تاكل ليل ونهار حتى كرش ما عندك يهب صدق
همام وهو يضرب كتفه : وجع انت لا تحسدني
مطلق اللي نسوا اتصاله بصوت عالي
مطلق : ورع ورع هي انت وياه بزران ' امشو اخلصو ودقو على الباقي خلهم يجون '
سكرو وهم يكملون اتصالات العيال ' رد الكل الا بهاج
بهاج اللي مشغول وماهو يم جواله ' حاطه على الصامت وحاذفه على المرتبه ' كل ما بدا شغله يحطه صامت لاجل ما يشغله احد '
<<<<<<<<<<<<>>>>>>>>>>>>
-لارين & ناصر-
دخل الغرفه وهو يتجه صوبها ' لفت من ناظرت وجود ابوها وعرفت انه جاي لاجل يعرف اللي صار ' تنهدت وهي تقعد على حافة السرير وهو يجلس قدامها
ناصر : وش اللي صار ؟ ووش اللي خلا امك تطلع من طورها وتعصب ؟
لارين بتنهيده : بابا ! انت عارف ماما ' وتعرفني برضو '
ناصر : اعرفكم كلكم ' بس علميني وش اللي صار
لارين : سالت عن اخواني !
ارتفع ناصر من سمع كلمة ( اخواني ) وهو اللي يعرف مدى عصبية مزن بهالموضوع
ناصر : اخوانك ؟
لارين : اي اخواني ' ليش مالي حق اعرفهم ؟
ناصر : مو كذا الموضوع ' الموضوع ليش من الاساس فكرتي فيهم ؟
لارين : بابا ؟ انت كمان ؟ وش اللي صارلكم ! تراهم اخواني اخواني من لحمي ودمي ولي الحق فيهم
ناصر : لارين بابا ' اعرف انهم اخوانك ' بس انتي ما جاء ببالك انهم ما سؤال عنك ؟ ما يدرون ان عندهم اخت ؟
ارين : وليش ما تقول انهم يدرون ؟ ويسالون عني ؟ ويعرفون بوجودي مثل ما اعرف وجودهم ' بابا انا ما طلبت المستحيل طلبت اعرف اخواني مين ' أسماهم عمرهم اشكالهم حتى ما اعرفهم حتى صور مافيه لهم ' لهدرجه ماما مطلعتهم من حياتها ؟ ليش وش سوو لاجل تسوي كل هذا لهم وتكرهم وتنساهم ؟
نزل راسه ناصر من اقتنع بحكي لارين ' بس مستحيل يقنع مزن بهالحكي ' راسها عنيد وجداً
لارين بحنيه : بابا انت اكثر شخص يعرف اني اتمنى يكون لي اخ او اخت ' ساكته طول سنين عمري وكنت خايفه اتكلم عنهم ' بس لي متى بسكت ' ليش ما اعترف فيهم واشوفهم واعرفهم ' هم برضو اكيد يبون يشوفوني ويعرفوني ' صح بابا ؟
هز راسه ناصر : صح يا بابا ' وانا اوعدك وعد ' انك تشوفين اخوانك '
ابتسمت لارين : صدق بابا ؟ طيب انت تعرف اسماهم ؟ او قد شفتهم ؟
ناصر : اي ' اعرف اسماهم واعرف شكلهم
ابتسمت لارين اكثر : وش اسماهم ؟ وكم عمرهم ؟ وكيف شكلهم علمني كل شيءٍ ' ووين يدرسون ووين ساكنين ؟

ضحك ناصر : كل هذا تبين تعرفينه ؟ مو واجد ؟
لارين : مو واجد ' يلا يلا علمني
ناصر : اخوانك ثنين ' بهاج ' همام '
لارين ابتسمت بحب : واو ! كم عمرهم ؟
ناصر : بهاج على ما اعتقد ٢٨ او ٢٧ ' وهمام ٢٤
لارين : همام اكبر مني بسنه !
ناصر : اي ' مو ساكنين بالرياض ' ساكنين بديره تبعد عن الرياض ثلاث ساعات ' اسمها ديرة نجد ' بهاج يشتغل بشغله الخاص ' ما نعرف ايش هو ' اما همام '
يدرس بالجامعه واتوقع اخر كورس هالسنه له '
لارين تنهدت : ابغا اشوفهم !
ناصر : من عيني ذي قبل ذي ' بدق عليهم واضبط يوم واخذك تشوفينهم '
لارين : عادي تعطيني رقمهم ؟
ناصر : لا ' اذا شفتيهم اطلبي منهم بنفسك '
لارين : اه يارب عجل
ناصر : بس شوفي ' عطيني وعد ' امك لا تعرف بكل هذا ' اذا عرفت صدقيني ما راح تشوفينهم ولا حتى تسمعين  صوتهم ' سامعتني !
لارين : لهدرجه ماما تكرهم ؟
ناصر تنهد : امك ما ينعرف لها ' ولا اعرف مشاعرها لهم '
ناصر قام : وعد ؟
ابتسمت لارين : وعد
هز راسه وهو يطلع من الغرفه ' اما لارين اللي الحماس ما تركها ابد ' متحمسه تشوفهم ومتحمسه تجلس معهم ' امنيتها بتتحق ' بتشوف سندها بدنيا ' هالشيء عندها يسوى الدنيا كلها '

انتهى:؛