‏"مثل الوطن والأهل جيت أنت "

بارت ٦٨

على طاولة الطعام يقضون وقت الغداء ، وكالعاده مافيه إلا اصوات الملاعق والشوك ، الكل كان ملاحظ غضب سطام وباله المشغول ، سرعان لف الجميع على سهم اللي نزل من درج بوقت متاخر عن الغداء ، واللي الكل يدري بغضب سطام من التأخير بالجمعات العائليه
سهم اللي قعد بعد ما القى السلام ولف نظره على سطام اللي ما انتبه لوجود سهم ودخوله المتأخر ، ابتسم بخفه تحت أنظار الجميع المتوتره بسببه ، سهم اللي ناظر فهد اللي يناظره باستغراب ، غمز له وهو يبتسم بخفه ، فهد اللي هز راسه بعدم فهم وهو يكمل غداءه ، أشياء كثير تثير الاستغراب اتجاه سطام اللي اول مره يشوفون حالته هذي ، وهم اللي يعرفون شخصية سطام كيف ، واصراره على احترام المواعيد ، الجميع كمل اكل وأنظارهم اللي ما تحركت من على سطام اللي ما انتبه لاي شخص منهم
واللي تفكيره وباله مع بهاج ، اللي مستغرب شخصيته اتجاهه ، اول مره يمر عليه شخص نفس بهاج ، وهالشيء هو اللي تارك فكره وباله معه

<<<<<<<<<<<<<<<<>>>>>>>>>>>>

وقف أمام بوابة المول ، لف نظره على داخل المول ولحظتها ما خطر بباله دخوله اللي كانت هي سببه ، نغم اللي من شافته يناظر المول ابتسمت بخفه من عرفت بانه تذكر موقفهم سوا ، لارين اللي شافت صمتهم ومستغربته ، تقدمت بخفه وهي تلف نظرها على بهاج

لارين : بهاج
بهاج وهو يلف عليها بصمت
لارين : شرايك تنزل معنا ؟
بهاج : لا مالي فيه
لارين : ليه ؟ والله المطعم حلو لازم تجربه
بهاج : مره ثانيه ماهي هالمره
لارين بتركيز : وعد !
بهاج اللي ابتسم لها : وعد
لارين : نغم شاهده صح ؟
لف نظره على عيون نغم اللي كانت تناظرهم بتمعن
نغم وهي تلف نظرها على بهاج : شاهده
بهاج اللي ركز بعيونها ، للحظه حمد ربه بانها لابسه نقاب
وهو بعيونها فقط تركته ينسى نفسه ، كيف لا صار وجهها قباله بهالموقف ! صعب عليه كثير
لاحظت لارين اللي تنزل ، لفت لاجل تنزل لكنها وقفته مسكت يده لذراعها ، لفت عليه وهي تشوفه يناظر لارين اللي شافتهم وبعدت لعند بوابة المول وتناظر جوالها
لف عليها يناظرها تشوفه باستغراب ، ما فك ذراعها وهو يحط يده الثانيه بجيبه ، شافته يطلع بوكه وهي اللي تقريباً فهمت ، مد لها بطاقته الصراف وهو يناظرها

بهاج : لا يقعد بخاطرتس شيء
نغم وهي ماتدري وش تقول بهاللحظه ، شاف سكوتها وعيونها المركزه بعيونه
بهاج : لا تقولين شيء ، خذيها وبتوصلني الاجابه
نغم : بس أنا مابي شيء
بهاج : تبين ولا ما تبين ، خليها معتس ، ولا إذا بترديني هذا شيء ثاني
نغم اللي ابتسمت وهي تاخذها من يده ، بعد عنه وهو يحرر ذراعها ، ويبعد عن عيونها اللي أرهقته ، واللي يعترف بهالشيء
حطتها بشنطه وهي تنزل من السياره ، سكرت الباب وهي تشوفه يناظر جواله واللي كان يتهرب من شوفتها ، رفع نظره صوبهم من دخلو للمول ، تنهد وهو يحرك من مكانه ، رفع يده وهو يشيل غترته وعقاله ويحذفهم وراء
شد شعره وهو يدخل أصابعه بين شعره ، مايدري بهالفترة وش وضعه ، لكنه اللي يعرفه بانه مرتاح راحه شديده ، وهالشيء يكفيه

<<<<<<<<<<<<<<>>>>>>>>>>>>>

الجميع مجتمع بصاله بعد الغداء ، والكل بيده كوب الشاهي الساخن ، ماعاد سطام اللي من بعد الغداء دخل غرفة مكتبه وقفل على نفسه ، وهالشيء اللي ترك الجميع يتاكد بانه حصل شيء قوي ، ولا ماهي من عادة سطام بـ هالوقت يغيب عنهم

فهد : يمه
هيا : هلا
فهد : ابوي ماقالك وش فيه ؟
هيا : لا ما قالي
العنود : ابوي صاير له شيء بس مايبي يقول لاحد
سهم : وابوي من متى يقول وش فيه ، حتى زوجته ما قال لها
هيا : سهم !
سهم : وانا صادق ، انتو ما شفتوه يوم جيت متاخر على الغداء ما درا عني ولا طق لي خبر ، ولا بالعاده اللقمه تنشب بحلقي من كلامه وصوته العالي
العنود : احمد ربك ما انتبه لك اليوم ولا كان نشبت
سهم : تكفين لي فتره ما كليت زين نفس هاليوم
هيا : تعال نفس ما يجون اخوانك وتاكل زين
سهم : غداكم مبكر شسوي بنومي المتأخر
فهد : إلا غدانا نفس وقت غداء الناس الطبيعين إلا نومك اللي ماهو حول الطبيعي
هيا : بس لا يسمعكم ابوكم مب فاضين صياح وهواش
العنود : وين يسمعنا يمه وهو من بعد الغداء مقفل على نفسه بمكتبه ، حتى الشاهي اللي دايم يشربه بوقته ولا يتغير نظامه ، اليوم غيره ولا شربه
سهم : اني قايل فيه شيء قوي ، ولا ماهي عوايد سطام
هيا بصراخ : يووه انتو ، فيه شيء فيه شيء ، مافيه إلا العافيه يمكن شغله زايد هاليوم او مشغول باجتماعات كثيره
صجيتو راسي خلاص

<<<<<<<<<<<<<<<<>>>>>>>>>>>>

قاعدين بالمطعم بعد ما تممو طلبهم ، كانو يناظرون المحلات الكثيره والناس المنتشره بالمول ، وأصوات الأطفال الكثيره ، لارين اللي لفت على نغم اللي شارده بنظرها وبالها وحاطه يدها خدها ، اشرت لها وسرعان ما ناظرتها نغم من صحت من تفكيرها

لارين : ودك بعد الغداء نتسوق ؟
نغم بهدوء : أنا مابي شيء ، إذا تبين انتي عادي نروح
لارين : لا تبين ياروحي تبين ، مع لارين والسوق مستحيل ما ترجعين البيت إلا ومعك شيء
نغم : يايمه من لارين
لارين بضحكه : والله صدق خلينا نتسوق ونشوف المحلات تراني من زمان ما رحت لسوق دايم اونلاين
نغم : خلاص تم ما عندي مشكله
لارين بابتسامه : ومنها تاخذين فستان لك لحفل تخرجي
نغم بصدمه : بتسوين حفل ؟
لارين : وحفل كبير بعد ، بعزم كل الناس كلهم ، تخرج من الجامعه بعد تعب وارهاق كيف ما تبيني اسوي حفله ؟ مستحيل
نغم : تمام سوي حفله بس وش له الفستان عندي فساتين كثيره و
لارين بمقاطعه : مافيه اعذار حبيبتي ، بتأخذين لك فستان وافخم فستان بعد ، بخليك تبرقين حتى بحجزلك معي بصالون ، اخت لارين كيف ما تبين تطلعين فخمه ؟
نغم بصدمه : لارين !
لارين : نغم ! خلاص مالك شغل انتي عطيني نفسك وبس
تنهدت نغم وهي اللي بتتعب كثير وهي تقنع لارين آللي إذا حطت بمخها شيء تسويه تسويه ، ولو تكلمت من هنا لأسبوع مافيه فايده ، هذي لارين صعبه

•انتهى•