Ms. Mafia & Ms. CEO (မာဖီးယားခေါင်းဆောင်ရဲ့ ဧကရီ) Season (1) (Complete) 🌷💖

အခန်း (၁၄)

ဒီနေ့စနေနေ့ဖြစ်သဖြင့် ရုံးပိတ်ပါ၏။ ရုံးပိတ်ရက်ဖြစ်သော်လည်း သျှားတစ်ယောက်ကတော့ မနက်ကတည်းကအစောကြီးနိုးနေပြီး မီးဖိုခန်းထဲတွင် ကြီးကြီးမိုးတို့နှင့်အတူ မနက်စာကူပြင်ပေးနေသည်။

"သမီးသျှားလေး မလုပ်ပါနဲ့။ သမီးပျိုက သျှားကို ဘာမှမလုပ်နဲ့လို့မှာထားတယ်လေ။ သမီးပျိုသိရင် တစ်အိမ်လုံးအဆူခံနေရပါအုံးမယ်"

" ရပါတယ် ကြီးကြီးမိုးရဲ့ ။ မေ အတွက် မနက်စာကိုသမီးကိုယ်တိုင်လုပ်ပေးချင်လို့ပါ။ ကြီးကြီးမိုးတို့ကို အဆူမခံစေရပါဘူး။  ဒါပြီးရင် ကြက်ဥကြော်မယ်နော်"

သျှား တစ်ယောက်ချစ်သူလေးအတွက် မမောနိုင်မပန်းနိုင် မနက်စာ​ပြင်ပေးနေလေသည်။ မေ က သောကြာနေ့ နေ့လည်က သျှားလက်ရာ U.K ထမင်းကြော်က စားကောင်းတယ်ဟုပြောသည်။ ထို့​ကြောင့် ဒီနေ့ မနက်စာကိုတော့ ပသျှူးထမင်းကြော်လေးလုပ်ပေးထား၏။ ပြီး မေ့ အတွက်ကော်ဖီပါအသင့်ဖျော်ပေးထားလေ၏။

မကြာမီ မေ တစ်ယောက် အောက်ထပ်ကိုဆင်းလာလေ၏။ မီးဖိုခန်းထဲတွင် မနက်စာပြင်ပေးနေသော သျှားကိုတွေ့ရလေသည်။ သျှား က မေ့ ကို​​ မြင်သောအခါ ချစ်ချင်စဖွယ်ကောင်းအောင်ပြုံးပြလေ၏။ မေ့ ရဲ့ ဘယ်ဘက်ရင်အုံက စောစောစီးစီးအလိုက်ကန်းဆိုးမသိ ခုန်လာပြန်ပြီ။ ဒီကောင်မလေးကတော့။ ထို့နောက်  မေ တစ်ယောက် ထမင်းဝိုင်းထိုင်ခုံပေါ်တွင်ထိုင်လိုက်လေ၏။

"မေ ဒီနေ့ ပသျူးထမင်း​​ကြော်ထားတယ်နော်။ ပြီးတော့ မေ့ အကြိုက်ကော်ဖီခါးခါးလေးကို ကျွန်မကိုယ်တိုင်ဖျော်ပေးထားတယ်။ ထမင်းကြော်ကို စားကြည့်ပါအုံး။ မေ ​ကြိုက်မယ်ထင်တယ်"

သျှား ကထိုသို့ပြောပြီး မေ့ ဘေးနားကထိုင်ခုံပေါ်တွင် ဝင်ထိုင်လိုက်၏။ မေ လည်းမငြင်းတော့ဘဲ သျှား ပြင်ပေးသောမနက်စာကိုစားလေသည်။ စားကောင်းသားဘဲ။ ဒီကောင်မ​လေး မလုပ်တတ်တာမရှိတော့ဘူးလားမသိဘူး။ မေ့ မှာမသိမသာ​လေးသက်ပြင်းချမိလိုက်၏။ သျှားကတော့ မေ မနက်စာစားနေတာကို ပြုံးပြီးကြည့်နေလေသည်။ ကြည်နူးနေတာကိုး။ ချစ်သူလေးက သူပြင်ပေးတဲ့ မနက်စာကိုစားနေတာဆိုတော့။