Ms. Mafia & Ms. CEO (မာဖီးယားခေါင်းဆောင်ရဲ့ ဧကရီ) Season (1) (Complete) 🌷💖

အခန်း (၂၆)

သျှားတစ်ယောက် ရန်ကုန်အပြည်ပြည်ဆိုင်ရာလေဆိပ်သို့ရောက်ရှိလို့လာခဲ့လေသည်။ လေဆိပ်ရှိ ခရီးသည်များကိုကြိုဆိုရာနေရာသို့ ရောက်ရှိလာပြီး လက်ကနာရီကိုတစ်ချက်ကြည့်လိုက်လေသည်။ တော်ပါသေးရဲ့။ အချိန်မှီလေးမို့လို့။ ထိုစဥ် လေယာဥ်တစ်စီးဆိုက်ကပ်လာပြီး လေယာဥ်ပေါ်မှ များပြားလှသော ခရီးသည်များလည်းဆင်းလာလေသည်။

သျှားလည်း ခရီးသည်များကို သတိထားကြည့်ပြီး တစ်ဦးတည်းသောဒေါ်လေးကိုရှာဖွေနေလေသည်။ ဟော။ တွေ့ပါပြီ။ ဒေါ်​လေးကိုတွေ့ပါပြီ။ အနီရောင်ရင်ဖုံးလက်ရှည်ဝမ်းဆက်လေးဖြင့် သိပ်ကိုလှပကာ သိမ်မွေ့လွန်းလှသည့် သျှားရဲ့​ဒေါ်လေးကို ခရီးသည်တွေ​ကြားထဲမှာ ထင်းခနဲတွေ့ရပါသည်။

ဒေါ်လေးက နေကာမျက်မှန်အမဲကိုစတိုင်ကျကျတပ်ဆင်ထားကာ လည်ပင်းတွင်မူ ပဝါအဖြူရောင်လေးဖြင့် မြန်မာအင်္ကျီအနီရောင်ရင်ဖုံးလက်ရှည်ဝမ်းဆက်လေးနဲ့ ခရီးဆောင်အိတ်ကိုဆွဲလာကာ အိန္ဒြေရရလမ်းလျှောက်လာသည့်ဒေါ်လေးပုံစံမှာ သိပ်ကိုလှပနေလေသည်။ နက်မှောင်သောဆံနွယ်ရှည်များကို သေသေသပ်သပ်ထုံးဖွဲ့ထားကာ အသက်လေးဆယ်ကျော်ဆိုတာမယုံနိုင်စရာပါ။ ဒေါ်လေးက သိပ်ကိုနုလွန်းကာ လှပနေလေသည်။ဒေါ်လေးအရပ်ကလည်း ငါးပေခြောက်လောက်တော့ရှိမယ်ထင်သည်။ မေ့ အရပ်နဲ့တူတူလောက်ဘဲရှိလိမ့်မည်။

ဒေါ်​လေးက သျှားကိုတွေ့တွေ့ချင်း သူ့ခရီးဆောင်အိတ်ကို သျှားထံသို့ပေးလိုက်သည်။ သျှား လည်းဒေါ်​လေးလက်ထဲမှ ခရီးဆောင်အိတ်ကိုဆွဲကာယူလိုက်သည်။

"ငါ့တူမက အချိန်တိကျသားဘဲ ဘယ်ဆိုးလို့လည်း။ လာ။ မင်းအိမ်ကိုသွားမယ်"

ဒေါ်​လေးက ပြောပြောဆိုဆိုနှင့် သျှားရှေ့ကနေ အရင်ထွက်ချသွား၏။ နောက်က သျှားကလည်း ခရီးဆောင်အိတ်ကိုဆွဲကာလိုက်ရတာပေါ့။ သို့နှင့် ကားဆီသို့ရောက်၏။ ခရီးဆောင်အိတ်ကိုကားနောက်ခန်းတွင်တင်ပြီး ကားရှေ့သို့သွားကာ ဒေါ်လေးကို ကားတံခါးအရင်ဖွင့်ပေးလိုက်၏။ ပြီးမှ မောင်းသူဘက်မှ မိမိကတက်ကာ ကားကိုမောင်းထွက်ခဲ့လေသည်။