Ms. Mafia & Ms. CEO (မာဖီးယားခေါင်းဆောင်ရဲ့ ဧကရီ) Season (1) (Complete) 🌷💖

အခန်း (၄၈)

Tulip Group ရုံးချုပ်တွင်ရှိနေသော မေ တစ်ယောက်မှာလည်း စာရင်းများကိုစစ်ဆေးနေလေ၏။ ဆူးလေရုံးခွဲကစာရင်းမှာ အနည်းငယ်ကွာဟနေသည်ကိုတွေ့ရလေသည်။ ထို့ကြောင့် ကဗျာကိုခေါ်လိုက်လေ၏။

"ကဗျာ ဆူးလေရုံးခွဲက စာရင်းကဘာလို့ကွာနေရတာလည်း။ ဒီရုံးခွဲက တော်တော်များနေပြီ။ ငါကိုယ်တိုင်သွားစစ်ပြီး မန်နေဂျာကိုပြောင်းသင့်ရင်ပြောင်းရလိမ့််မယ်"

ကဗျာလည်း မေ့ လက်ထဲကစာရင်းကိုယူကြည့်လိုက်ပြီးခေါင်းငြိမ့်လိုက်လေသည်။

"ဟုတ်တယ်နော် မမ။ ဆူးလေရုံးခွဲကစာရင်းကခဏခဏမှားနေတော့ အဆင်မပြေဘူး မမ"

"အေးဟုတ်တယ် ကဗျာ။ ဒါဆို ငါတို့နှစ်ယောက်ဆူးလေရုံးခွဲကိုသွားရအောင်"

"ဟုတ် မမ"

ထို့နောက် မေ နဲ့ကဗျာနှစ်ယောက်လည်း ဆူးလေရုံးခွဲသို့​သွားရန်ရုံးခန်းထဲမှထွက်ခဲ့လိုက်လေသည်။ မေ လည်း ကားပေါ်ရောက်မှ မောင့်ဆီကိုဖုန်းဆက်ပြီးလှမ်းပြောလိုက်၏။

"မောင် ကဗျာနဲ့ ဆူးလေရုံးခွဲကိုစာရင်းတွေစစ်ဖို့ သွားနေတယ်နော်။ အဲဒါ မောင့် ကိုလှမ်းပြောတာ"

တစ်ဘက်က သျှားလည်း မေ က ကဗျာနဲ့ဆိုတော့ စိတ်မပူတော့ပါ။

"အင်းပါ မေ ရဲ့။ ဒါဆို စာရင်းတွေစစ်ပြီးရင် ချက်ချင်းပြန်လာခဲ့နော်။ မောင်က သဝဏ်နဲ့စကားကောင်းနေလို့"

"ဟုတ်ပါပြီ မောင်ရဲ့။ ဒါဆို မေ ဖုန်းချလိုက်ပြီနော်"

မေ တစ်​ယောက်ထိုသို့ပြောပြီးဖုန်းချ၏။ထို့နောက် ကားကိုမောင်းထွက်ခဲ့လိုက်လေသည်။

ရွှေမင်းဝံ Cafe မှာရှိတဲ့ သျှားနဲ့သဝဏ်မှာလည်း ခေါက်ဆွဲစားပြီး ကော်ဖီသောက်ကြလေသည်။

"အော် ဒါနဲ့ သဝဏ် ဒေါ်လေးက နှင်းဆီပန်းခရေဇီနော်။ သူက နှင်းဆီပန်းဆိုရင်အရမ်း​ကြိုက်တာ။ သူ့အခန်းထဲမှာဆိုရင် နှင်းဆီပန်းနဲ့ နှင်းဆီပန်းအနံ့ရှိမှကြိုက်တာကွ"

သျှားစကားကြောင့် သဝဏ်လည်းပြုံးမိလိုက်လေ၏။ အန်တီက နှင်းဆီပန်းအရမ်းကြိုက်တာလား။ နှင်းဆီပန်းလေးတစ်ပွင့်လို နူးညံ့လှပပြီး သိပ်ကိုမြတ်နိုးဖို့ကောင်းတဲ့အန်တီပါလား။ ဘေးနားမှာဆူးတွေဝန်းရံနေပေမယ့်လည်း အဲဒီ့ဆူးတွေကိုဖြတ်ပြီး သဝဏ်အန်တီ့ဆီကိုလာခဲ့ပါ့မယ်နော်။