« المستشفى ، قسم الجلديه »
متوتره ولا تنكر وخصوصاً كفها الي بكف فهد الحين ، رفعت عينها على دخول الدكتوره وابتسمت الدكتوره من لاحظت خوفها ؛ لا تخافين فحوصات بسيطه وترتاحين تماماً .
بلعت ريقها وناظرها فهد وشد على كفها ؛ ما توقعت انك خوافه لهدرجه .
ناظرته هي بهدوء تحاول تثبت رجفة يدها ؛ من بعد ما دخلت السجن انا كليّ تغيرت .
لانت ملامحه وصد هو وابتسمت الدكتوره ؛ انت تقرب لها ؟
هز راسه بالايجاب ؛ زوجها .
رفعت عينها له وجات وقع الكلمه قوي عليها وعلى قلبها وكيف انه يقول زوجها بكل بساطه ، مثل قبل سنين كان يقول لهم انها زوجته وهاهو نفس اليوم نطق انه زوجها قدامهم ، ابتسمت الدكتوره وناظرت ليان ؛ نزلي عبايتك والهودي الي عليك .
بلعت ريقها تناظر فهد وتنهد فهد ومسك طرف عبايتها ونزلها بكل هدوء ، ومسك طرف الهودي ونزله لها وعيونه لا زالت في عيونها ، جلست بالبدي وكفها في كف فهد من برودة الغرفه يدها ترتجف ، شد فهد عليها ، تركت راسها على كتفه وغمضت عيونها بألم من لمسات الدكتوره على ظهرها شد فهد على كفها يهمس لها ؛ دقايق بس .
بلعت ريقها من قربه ، وتنهدت الدكتوره ؛ ودك نسوي عملية تجميل لظهرك تخفي اثار الضرب ؟
ما ردت ليان ابداً لانها مو قاعده تستوعب الي يحصل معها ، وشد فهد على كتفها بهدوء ؛ ليان !
همست له ؛ بموت برد .
ناظر فهد بالدكتوره ؛ قفلي التكييف .
هزت راسها الدكتوره وقفلت التكييف ، ورفع راسها فهد وناظر عيونها الي تعبت من انها تمسك دموعها وتنهد هو يناظرها ؛ تسوين عملية تجميل لظهرك ؟ بس تخفي الاثار لك .
هزت راسها بالنفي وناظر فهد الدكتوره ، وهزت راسها الدكتوره ؛ براحتك ، بعطيك كريم بيخفف لك الالم وبيزيل لك الاثار لكن لوقت طويل ، انا اقترحت عمليه تجميل علشان تكون الازاله سريعه ، لكن رأيك اهم .
تنهدت ليان وتركت راسها على صدر فهد ، وناظر فهد الممرضه الي بدت تحط الكريم الاول ، ومن شدت ليان على كفه بألم واضح منها هو ناظر الممرضه ؛ خفي شوي .
بدت الممرضه تمسح على ظهرها بشكل كامل ، وهو لا شعورياً قبّل راسها بهدوء ؛ كلها دقايق بس .
دموعها نزلت غصبً عنها ، مو دموع الم كثر ما كانت دموع شوق وحنين لحنيّة فهد القديمه ، الي استرجعها الموقف البسيط هذا مسح على اكتافها بهدوء وهو اعتقاده كله انها تتألم ؛ وش داعي الدموع الحين كله بيخف مع الوقت بس اهدي شوي !
تنهد فهد وهو يشد عليها ، انتهت الممرضه وابعد فهد ليان يناظر عيونها وكيف كانت محمّره وتمسح هي بنفسها دموعها ، رفع عينه على الدكتوره من نطقت ؛ التقرير بيوصل للمحامي على طول .
هز راسه فهد بالايجاب ؛ اعطيني نسخه منه .
هزت راسها الدكتوره ، ووقف فهد واخذ الهودي ولبّسه ليان بكل هدوء ، واخذ عبايتها واعطاها ياه ، من شاف تألمها هو اخذ العبايه يلبّسها واخذ الطرحه يتركه على راسها وشد هو عليها ؛ ما تنزلينها على اكتافك .
ناظرته هي ولا كان لها حيل تعاند ، كل حيلها استهلك من الم ظهرها ، طلعت معه وهو للحين كفه بكفها ، ويده الثانيه يكلم فيها ، ولاشعورياً شدها يمّه من مرّ رجال جنبهم وغمضت هي عينها بألم من شدته ، التفت عليها يناظر عيونها ولازال يكلم بجواله ؛ العقد بيكون بكرا ان شاء الله ، انا بجي !
قفل من المكالمه وناظرها ؛ اوجعتك ؟
هزت راسها بالنفي وهمست له ؛ عادي اروح لبيت رتيل ؟
ناظرها كيف كانت تطلبه وكأنها تخشى الرفض رغم انها تحب العناد وتسوي الي براسها بدون اذن من احد ، لكن الي اكتشفه انها فعلاً كلها تغيرت من بعد دخولها للسجن ، هز راسه بالايجاب ؛ روحي .
