تغرق ومالها للغرق نجاة في دوامة الكوابيس من كان عمرها 12 وهي ما تعرف للراحه في النوم عنوان تشوفهم قدامها يصرخون باسمها ينادونها لكنه ما تعرف سبب بعدها عنهم قامت مفجوعه موسعه عيونها على الاخر تسمي بالله من كوابيسها الي ما تفارقها من يومها صغيره
قامت تترنح بتروح للحمام لكن استوقفها درعمة روحها رتيل بدون ما تستئذن وتدخل للغرفه كعادتها
استوقفت مكانها منصدمه من وقوف ليان ؛ غريبه المفروض اجي اقومك واجلس ساعه احن فوق راسك علشان تقومين اخلصي بسرعه ترا ما بقى شي ويبدا الدوام مالنا خلق نتأخر وتزعجنا ابتسام بصوتها مدري وين كان عقلهم يوم سموها ابتسام وهي بياض اسنانها ماشفته.
ابتسمت لها بتعب ما تهتني في نومها ابد فقدت لذاذة النوم من سنوات وتجاهد على نفسها تاخذ من المنومات لعل كوابيسها تهجد لكنها حالفه ما تتركها ابد لين تهد حيلها كله ، دخلت الحمام تاخذ لها شاور واستوقفت تشوف وجهها الذبلان في المرايا ما تتذكر متى اخر مره شافت في وجهها حياه الا بوجود رتيل وغير ذلك هي ميته ما تعرف للحياه وضحكها طعم ، طلعت من الحمام وشعرها مبلول وجففته ومشطت شعرها متوسط الطول وقسمت خصلاته البنيه الفاتحه قسمين ورفعت نصه وتركت الباقي على حريته وكانت ذي طريقتها في شعرها وما تغيرها ابد، لبست مريولها الكحلي و طلعت من غرفتها وجهزت شنطتها هي ورتيل وتركتهم قريب من الباب وجهزت عبايتها هي ورتيل وخلتهم على الكنبه وراحت متوجهه لطاولة الاكل وجلست على الكرسي تصب لها في كوبها شاهي وتسمع لحلطمة رتيل ؛ تخيلي كلينا تبن الفواتير نازله مال امهم داعي شذا فاتورة الكهرباء 1700 خيررر والله لو انها فاتورة العماره كلها و المويا 750 وجوالتنا 228 لي 228 لك وايجار الشقه 1500 اوووف وشذا والله لو كنا عايله ما صار ذا كله .
ما كانت معها ابد غارقه في هواجيسه تسترجع كوابيسها وتفكر بصراخهم " لهدرجه مقصره بحقهم يمكن علشان كذا يصارخون قدامي ؟ "
لفت نظرها لرتيل من ضربتها برجلها من تحت الطاوله ؛ هيه اكلمك انا من وين بندفع ذا كله ؟
تنهدت بقل حيله ؛ يحلها ربك ، اخلصي البسي بنطلع .
{ في احد احياء الرياض }
يقومه بعالي صوته ولكن لا مُجيب ؛ فههدددددددد قوم ياخي لي ساعه فوق راسك اصحيك قوممممممم فهدددد .
قام من فوق راسه من شافه نايم ولاهو حوله وركض خارج الغرفه يجيب مويا يصحيه فيها ، كبها على راسها وهو يشوفه قايم مفزوع ؛ احسن ياخي لي ساعه اناديك وانت مثل التيس نايم .
ضربه بالمخده على راسه وبسخريه ؛ حيوان انت فهمني بس وشوله اقوم اقابل شركاتك ولا اقابل وجهك ياخي اذلف وسكر الباب وراك ولأشوفك فاهم .
قام متجاهل عصبية فهد عليه وركض يقفل المكيف ويفتح الستاير يخلي شمس الرياض تتسلل للغرفه ، صرخ بكل قوته ؛ اميرررررررررررررررررررررررر
وقام من سريره وهو يدخل الحمام ياخذ له شاور ينعشه لعل يبدا يومه بنشاط وطلع وهو يشوف امير جالس على الارض وبيده لابتوبه ؛ مقومني وفي الاخير جالس هنا ، شتسوي ؟
رفع راسه وهو يناظر فهد ؛ ابد والله ، تعال اجلس بقولك موضوع .
ناظره بغضب ؛ الحين انت مقومني وبدال ما تجيب لي اكل زي الناس تقولي بكلمك في موضوع .
رمى نفسه على الكنبه واردف ؛ خل موضوعك بعدين كلمها تجيب لي فطور جوعان .
ناظره بقل حيله هذا هو فهد طول عمره يعيش حياته على كيفه ما يفكر باحد ولا يهتم باحد غير امير وبس ، قام يكلم ليزلي خدامتهم تجيب لفهد فطوره ورجع يجلس على لابتوبه هو مقتنع من الشي الي بيسويه سواءً قال لفهد او لا لانه بنظره مراح يفرق معه اذا فهد وافق او لا لانه بيقدر يعيش هو فهد بسلام من الشي الي بيسويه ، جات ليزلي وهي تنزل اكل فهد على طاوله ؛ ? Do you want another thing sir
ناظرها فهد وهو يتلذذ بالاكل ؛ No, thanks
خرجت من عنده والتفت لامير الجالس ؛ وشو موضوعك ؟
ناظره امير وبلع ريقه من ردة فعل فهد لو عرف لكنه مب مهتم ابدا لانه يشوف الشي الي جالس يسويه صح بحقه وحق فهد ويقدر يعيش هو فهد بدون ذل اهلهم في النهايه ؛ اسمعني بدون عصبيه طيب ، افكر اني اتوظف علشان نقدر نرتاح من ذل اهلنا لنا .
قام من مكانه وهو فاهم تماما من المكان الي بيتوظف فيه امير ماعنده اعتراض ابداً انه يشوف امير موظف ومعتمد على نفسه لكن المشكله معدل امير الدراسي ما يسمح لامير يشتغل في مكان كويس وبراتب زين ناظره بغضب ؛ اسمعني امير ما عندي مشكله انك تشتغل في اي زفت لكن شركات اهلنا لأشوفك فيها فاااهم ؟
ناظره امير وهو مقدر وفاهم سبب عصبيته ؛ بس فترة م راح اعشعش عندهم بس لين اطلع راس مال وبعدها نبدأ بمشروعنا ، فهد مراح نعيش طول عمرنا تحت جناح عمي نايف وابوي ، شوف زين حالنا كيف ابوي يعطينا كل شهر ألف ريال مصروف ومين يسدد فواتيرنا ابوك ومين يعطي راتب الخدامه ابوك ، طيب لين متى يعني كلها فتره فهد وبعدها استقيل ونجلس انا وانت نخطط لمشروعنا .
ناظره فهد وهو مقدر عيشتهم وفاهم وضعهم زين بس لكن يعز على نفسه وعلى امير انهم يكونون تحت اوامر اهلهم وهو يعرف زين كيف اهلهم يبون يذلونهم صح ، ناظره امير وهو لو يقول فهد لا مراح يغير شي بقرار فهد لكنه يحبه يحترمه ما وده يكمل في ذا الطريق وفهد مب راضي عنه وهو يشوفه الوحيد من اهله سنده بذا الحياه ؛ هاه وش قلت ؟
ناظره بتنهيدة ممزوجه بغضب خفيف ؛ بس فترة امير بس فترة بعدها تفصل من عندهم ، فاهم ؟
تنهد براحه من كلام فهد واشر على خشمه ؛ على ذا الخشم من لي في الدنيا غيرك ، فترة ونفصل ابشر .
