ဘလိုင်းဒိတ်အတွက် ပါတနာကောင်မလေးက အသက်နှစ်ဆယ်ပြည့်ကာစဖြစ်ပြီး လက်ရှိတွင် ရှန်ဟိုင်း၌ တက္ကသိုလ်လာတက်နေသူ။
အသက်နှစ်ဆယ်ပဲရှိသေးသည့် ကောင်မလေးကို သူ့မိဘတွေက အတင်းဘလိုင်းဒိတ်ခိုင်းနေသည့် အကြောင်းရင်းကို ရှောင်ပိုင် လုံးဝ နားမလည်နိုင်ပါချေ။ သေချာပေါက် သူ့မာမားပြောတဲ့စကားကတော့ သူငယ်ချင်းရှာယုံပါတဲ့။
ကောင်မလေးက ကျစ်ဆံမြီးကျစ်ထားပြီး အဖြူရောင်နှင်းကာသားအနွေးထည်နှင့် အဖြူပန်းရောင်စပ် အတွန့်အတွန့်တွေပါသည့် ကျောင်းဝတ်စုံပုံစံစကတ်ကို ဝတ်ထားသည်။ ဒီအဝတ်အစားတွေက ကျန်းရုန် Crossdressလုပ်သည့် Livestreamတုန်းက ပုံစံမျိုးတွေမှန်း ရှောင်ပိုင် သတိရလိုက်၏။
ကောင်မလေးကလည်း သူ့ကို အထက်အောက်စုံဆန်ကြည့်လာသည်။
သူက ဓါတ်ပုံထဲကနှင့် ဘာမှမကွာသလို အပြင်မှာ ပိုပိန်သည်။ အမှန်အတိုင်းပြောရရင် ရှောင်ပိုင့်ခန္ဓါကိုယ်က ဝသည်ဟုဆိုလို့မရ။ သူ့မျက်နှာက နည်းနည်း ပြည့်နေရုံသာဖြစ်ပြီး အသားအရည်ကလည်း ဖြူဖွေးနေသူမို့ ‘ပြည့်ဖောင်း’နေသလို အထင်အမြင်ကို ခံစားရစေရုံသာ။
ရှောင်ပိုင်က စက္ကန့်အတော်ကြာ ကောင်မလေး၏ခြေထောက်ကို ငုံ့ကြည့်နေသည်။ ကောင်မလေးဘက်က ရှက်လာပြီး လက်ချောင်းတွေကိုပါ လိမ်နေမိတော့မှ သူက ခေါင်းပြန်မော့လာပြီး ပြောလာသည်။ “ကောင်မလေး ဒီနေ့ ရှန်ဟိုင်းမှာ ၅ဒီဂရီပဲရှိတာနော်။ ခြေထောက်တွေဖော်ထားတာ မအေးဘူးလား?”
ကောင်မလေးမှာ ခဏလောက် ရပ်တန့်သွား၏။ “အသားကပ်ဘောင်းဘီဝတ်ထားပါတယ်။ အသားရောင်မို့ ညဘက်မမြင်ရတာ”
ရှောင်ပိုင်က သဘောပေါက်သွားပြီး “အမိုက်စားပါလား”
ကောင်မလေး : “….”
ရှောင်ပိုင်က ထိုကောင်မလေးကို သူ့ကျောင်းနှင့်လည်းနီး သူတို့အသင်းလည်း မကြာခဏ သွားစားဖြစ်သည့် ဘာဘီကျူးဆိုင်ကို ခေါ်သွားလိုက်သည်။
ကောင်မလေးမှာ မိတ်ကပ်ပြင်ဖို့ ၂နာရီလောက် အချိန်ယူခဲ့ရပြီး Lip glossကိုပင် ပေါ့ပေါ့တန်တန် ဆိုးထားသည်မဟုတ်။ အခုချိန်မှာတော့ သူမရှေ့မှ တုတ်ထိုးအသားချောင်းတွေကိုသာ ထိုင်ကြည့်နေမိတော့သည်။ “….”
ရှောင်ပိုင်က တစ်ချောင်းကိုကောက်ကိုင်လိုက်ပြီးမှ သူ့ရှေ့မှတစ်ယောက်က လုံးလုံးမလှုပ်သေးကြောင်း မြင်လိုက်ရသည်။ “မစားတော့ဘူးလား?”
“ညီမ…ဗိုက်သိပ်မဆာလို့” ကောင်မလေးက ပြော၏။ “အစ်ကို့လေ့ကျင့်ရေးကို နှောင့်ယှက်မိသေးလား?”
“ဒီနေ့ လေ့ကျင့်ရေးမရှိဘူး”
ရှောင်ပိုင်က ဝတ်ကျေတမ်းကျေ ပြန်ဖြေပေးသည်။ အတွေးထဲမှာတော့ ဂျပန်အစားအစာတွေအပြည့်နဲ့ စားပွဲကြီးကို မေ့မရဖြစ်နေဆဲ…ပြီးတော့ သူ့ခေါင်းစွပ်ကို လှမ်းဆွဲတုန်းက Pineရဲ့အကြည့်ကိုရောပဲ။
မဆီမဆိုင်ပါဘဲ ရှောင်ပိုင်မှာ TTCကိုရောက်ရောက်ချင်း အထက်စီးဆန်လှပါချည်ရဲ့ဆိုသည့် သူတို့Mid Lanerထက် ပိုတောင် မာနခေါင်ခိုက်သေးသည့် Pineအကြောင်းကို အမှတ်ရသွားသည်။ ကောင်းကောင်းဆိုးဆိုး ကျန်းရုန်ကမှ အခြားသူတွေကို အရေးတယူရှိသေးသည်။ အများစုက ဆဲဖို့ဖြဲဖို့ ဆိုပေမယ့်လည်းပေါ့။
Pineကတော့ လူတိုင်းကို သူ့ကမ္ဘာဆီကနေ အဆက်အသွယ်ဖြတ်ထားသူပင်။
တစ်ယောက်တည်းစား ၊ တစ်ယောက်တည်းကစား ၊ တစ်ယောက်တည်း အပြင်သွားသည်။ အတူတူ လေ့ကျင့်ရမည့်အချိန်ကလွဲ သူစကားပြောသည်မှာ ရှားလှသည်။
ကျွမ်းရိပိုင်လို မွေးကတည်းက တက်ကြွသည့်ကြက်ဖမှာ သူ့လိုလူစားမျိုးကို ဘယ်လိုမှ နားမလည်နိုင်ခဲ့။
ထို့နောက်မှာတော့ သူနားလည်နိုင်အောင် ကြိုးစားယူတော့သည်။
အောက်လမ်းသွားနှစ်ယောက်တွဲအနေဖြင့် အသင်းထဲတွင် အများဆုံး ပူးပေါင်းဆောင်ရွက်ရမည်က သူတို့နှစ်ယောက်သာ။ သို့ဖြစ်ရာ နီးကပ်ရန်လိုနေသည့် သူတို့နှစ်ယောက်အတွက် သူကပဲခြေလှမ်းစကာ Pine၏ကမ္ဘာထဲ အတင်းကာရော ဝင်ရောက်ပစ်ခဲ့သည်။
“ကောကော? ညီမပြောတာကြားလား?”
ရှောင်ပိုင် အတွေးထဲမျောနေရာမှ ပြန်ရုန်းထွက်လာတော့ တစ်ဖက်ကကောင်မလေးက သူ့ကို ခေါင်းစောင်းကာ ကြည့်နေမှန်း သဘောပေါက်လိုက်သည်။ “အားနာလိုက်တာ ဘာပြောလိုက်တာလဲ?”
ကောင်မလေးက နောက်ထပ်တစ်ခေါက် ပြန်ပြောပေး၏။ “လေ့ကျင့်ရေးမရှိတဲ့အချိန် ပုံမှန်ဆို ဘာတွေလုပ်တတ်လဲ?”
ရှောင်ပိုင် : “LoLကစားတယ်”
ကောင်မလေး : “…အဲ့တာကလည်း လေ့ကျင့်တာပဲမဟုတ်ဘူးလား?”
“ကွဲတယ်လေ။ လေ့ကျင့်နေရတဲ့အချိန်ဆို Tierအမြင့်တွေမှာပဲ ကစားရတယ် ဒါမှမဟုတ် လေ့ကျင့်ရေးပွဲတွေပေါ့ အခြားRoleကို ကစားလို့မရဘူး။ ဒါပေမယ့် လေ့ကျင့်နေတာမဟုတ်ဘူးဆိုရင် ကိုယ်ကြိုက်တာကစားလို့ရတယ်။ အစ်ကိုဆို Rankနိမ့်တဲ့သူတွေကို သွားနှိပ်စက်နေကျလေ P…အစ်ကို့အသင်းဖော်နဲ့အတူ။ ဆိုလိုတာက Tierအနိမ့်တွေမှာ သွားကစားလို့လည်းရတယ်။ Roleတွေ အပျော်လဲကစားလည်း ဘယ်သူမှမဆူဘူး”
ကောင်မလေးက နားမလည်ရှာ။ “ဒီလိုဆိုလည်း ဂိမ်းကစားတာက ဂိမ်းကစားတာပဲမလား? မပျင်းကြဘူးလား?”
ရှောင်ပိုင်သည်လည်း သူ့အတွေးအခေါ်ကို နားမလည်ရှာ။ “ဘာလို့ပျင်းရမှာလဲ?”
သူပြောပြီးပြီးချင်းမှာပဲ အိတ်ကပ်ထဲရှိ သူ့ဖုန်းက ရုတ်တရက် အသံထမြည်လာသည်။
သူ့Livestreamတွင် Modလုပ်ခဲ့ဖူးသည့် အစ်မတစ်ယောက်က စာလှမ်းပို့ခြင်း။ ထိုအစ်မက သူ့အတွက် ၂နှစ်ကျော် Modလုပ်ပေးခဲ့ပြီး ဒီနှစ်၏ပထမနှစ်ဝက်မှာ ရာထူးတိုးသွားခြင်းဆိုပေမယ့် သူတို့နှစ်ယောက်က သူငယ်ချင်းအဖြစ် ခင်မင်နေကြဆဲ။
[Modမမ : ပိုင်!!!!]
[Modမမ : အခုဘာလုပ်နေလဲ?!]
[Modမမ : ဟေ့]
သူမပုံစံကြောင့် ကျွမ်းရိပိုင်မှာ သူ့Livestreamကြီး ၉၉၉နှစ်လောက် Banခံလိုက်ရပြီလားဟု သံသယဝင်မိသွားသည်။
[Pပေါင်ရဲ့Supportလေး : ဒီမှာ]
[Pပေါင်ရဲ့Supportလေး : အပြင်မှာ ဘာဘီကျူးထွက်စားနေတာ ဘာဖြစ်လို့လဲ? ကျွန်တော့Livestreamကြီး ပြဿနာတက်နေလို့လား?!]
[Modမမ : မဟုတ်ဘူး]
ရှောင်ပိုင်ခမျာ ခုမှသက်ပြင်းချနိုင်သည်။
[Modမမ : အဲ့တာထက် အဆတစ်သောင်းလောက် ပိုအရေးကြီးတယ် ဟုတ်ပြီလား?! ကျန်းယွီစုန့် ဖောက်ပြန်နေတယ်လို့!!! ဒါတောင် နင်က ဘာဘီကျူးထွက်စားနေနိုင်သေးတယ်!!!!]
အခုလေးတင် ထွက်သွားသည့်လေတွေကို သူပြန်ရှုသွင်းမိ၏။
[Pပေါင်ရဲ့Supportလေး : ဘာပြောတာလဲ?]
[Modမမ : Pပေါင်က ဂိမ်းကစားရင်း Streamနေတယ်]
[Pပေါင်ရဲ့Supportလေး : သြော် သူStreamနေတာလား? ကျွန်တော့်တောင်မပြောဘူး]
[Modမမ : အင်း]
[Modမမ : ဘယ်ပြောမလဲ သူက တွဲကစားဖော်ကောင်မလေးတစ်ယောက်နဲ့ အတူကစားနေတာလေ]
ရှောင်ပိုင်က ခဏလောက် ကြောင်အမ်းသွားပေမယ့် ချက်ချင်း နှာမှုတ်လိုက်သည်။
Pineလိုလူရဲ့ သူများနဲ့တွဲကစားနိုင်ချေက ချင်းဟွာနဲ့ပီကင်းတက္ကသိုလ်ဝင်ခွင့်ထက်တောင် ပိုနည်းသေးတယ်ဆိုတဲ့ အချက်ကြောင့်သာမဟုတ်ရင် သူယုံမိတော့မလို့။
တွဲကစားတာကိုထားဦး။ ဂိမ်းထဲမှာ သူငယ်ချင်းAddတာကတောင် မရှိသလောက်ရှားတယ်။ ရှင်းလင်းတင်ဆက်သူA သူနဲ့သူငယ်ချင်းဖြစ်ချင်တုန်းကဆို တစ်ပတ်လောက် စာတွေဆက်တိုက်ပို့လိုက်ရတယ်။ တွဲကစားဖော်ကို စိတ်ပါလက်ပါ သွားရှာတာကြီးက ပိုတောင်မဖြစ်နိုင်သေး…….
“ဘော့စ်က ဘယ်လိုADCမျိုးနဲ့ ကစားရတာကြိုက်လဲ?
“ဘော့စ် တို့အသံတအားကျယ်နေလား?
“ဘော့စ် Yuumiကိုင်လို့ရလား?”
နာမည်ကြီးတွဲကစားဖော်က စတင်လှုပ်ရှားလာတော့မှ သူက “အင်း”ဟုသာ ပြန်ဖြေလာသည်။ သို့ပေမယ့် ထိုအသံတစ်ခုတည်းနှင့်ပင် သူ့သရုပ်မှန်ကို ခန့်မှန်းရန် မခက်ခဲပါချေ။ သေချာပေါက် Pineအစစ်အမှန်ကြီး။
“ဟုတ် ဘော့စ် ဒါဆိုရွေးပြီနော်!”
ရှောင်ပိုင် သူ့ဖုန်းထဲမှStarTV appကို ငုံ့ကြည့်နေမိသည်။ သူ့မျက်နှာကတော့ အရိုက်ခံရလို့ ရောင်ကိုင်းနေချေပြီ။
Pineက Streamနေတာလည်းမှန်သလို မိန်းကလေးတွဲကစားဖော်တစ်ယောက်နဲ့ အတူကစားနေတာကလည်း အစစ်အမှန်။
ထိုကောင်မလေးက ဂိမ်းထဲမှာ Rankတော်တော်မြင့်တော့ Pine၏ Grandmasterအကောင့်နှင့် တွဲကစားနိုင်နေသည်။ သူမ၏အသံက အထာနပ်နေသည့်ပုံစံမျိုးဖြစ်ပြီး သူမပြောသမျှက ကလူသလိုမြှူသလို။
ဘလိုင်းဒိတ်မှ ကောင်မလေးသည်လည်း သူမအသံကိုကြားသွားပြီး မျက်နှာပျက်သွားသည်။
ဒီလိုအနေအထားမျိုးမှာ Livestreamကြည့်နေဖို့ မသင့်တော်ဘူးဆိုတာ ရှောင်ပိုင်လည်း သဘောပေါက်သည့်အတွက် လက်ချောင်းကိုရွှေ့ကာ အသံကိုတိုးလိုက်သည်။
Pineက ကင်မရာမဖွင့်ထားဘဲ ပုံမှန်ထက် ငြိမ်သက်နေသည်။ အချိန်အများစုမှာ ဒိုင်ခံစကားပြောနေတာက တွဲကစားဖော်မိန်းကလေးသာ။
သူမက ကျွမ်းကျင်လှသည်။ ဒီလိုဘော့စ်မျိုးနှင့်ပင် အခြေအနေကို နေရမခက်စေရန် သူမဘာသာ ထိန်းကျောင်းသွား၏။ အကြာကြီးနေမှ တစ်ခါလောက် Pineက တစ်ခုခုပြောတတ်ပေမယ့် သူပြောသမျှက ‘ရှေ့တက်’ မဟုတ်ရင် ‘ပြန်ဆုတ်’ နှစ်ခုထဲမှတစ်ခုသာ။
ရှောင်ပိုင်က သူ့အကောင့်တုနှင့် ဝင်ကြည့်နေခြင်း။ Barrageထဲတွင် ပြည့်ကျပ်နေသည့် ကွန်မန့်တွေက ဒီလိုပုံစံတွေပင်—
[အားလုံးကို အနှစ်တစ်ရာမှာ တစ်ခါတောင် ကြုံတွေ့ဖို့မလွယ်တဲ့ မြင်ကွင်းကနေ ကြိုဆိုလိုက်ပါတယ်]
[သစ္စာဖောက် ဘာလို့ကင်မရာမဖွင့်တာလဲ?]
[ပိုင်ဘယ်မှာလဲ ပိုင်ရော ပိုင်ရောလို့? အနောက်ကနေလည်း သူ့အသံကို မကြားရဘူးနော်]
[စိတ်လျှော့ကြပါဦး အိုခေ? ဒါက Pineရဲ့Stream။ ဟိုကောင်မလေးလည်း မျက်နှာသာပေးကြပါဦး။ စတာနောက်တာလည်း တော်ရုံပေါ့]
ESTÁS LEYENDO
||Complete|| I Can Do It [MM Translation]
Romanceတစ်ကြောင်းတည်းဖြင့်မိတ်ဆက်ခြင်း : ထရိုးကောင်လေးတွေမှာလည်း အချစ်တွေရှိတယ်~ ထရိုးကောင်လေးတွေမှာလည်း ခံစားချက်တွေရှိတယ်~