تبقى وليف القلب ولو صار ماصار وتبقى نظير العين ولو ما اشوفك

الجزء التاسع 🩶

-
-

شد تركي على حضن ابوه وهو يحس بجسد ابوه ثقل
ابو تركي بصوت مخنوق : الحمد لله يابوك الحمد لله اللي رجعك لنا ماني مصدق ياتركي مان ! وماكمل كلامه وطاح
جمد وجه تركي وهو يمسك ابوه ويسمع بكي امه واخته وعلى صرختهم وعى وهو يمشي به يمدده على الكنب ركضت ود تجيب مويه وعلاج ابوها من مكتبه وام تركي واقفه على راس زوجها وتركي قاعد عند الكنبه اللي مدد عليها ابوه يحاول يصحيه
جت ود ومدت علاج ابوها والمويه لتركي وهي ترجف
تركي وهو يسمح وجه ابوه بمويه لجل يفيق وفاق ابو تركي وعيونه ثقيله ومايحس بجسده و عطاه تركي علاجه والمويه لجل يصحصح

فيلا ابو تميم " بنفس التوقيت "
دخلت نجد الفيلا وهي تسمع صوت امها وابوها بالصاله دخلت عليهم سلمت وجلست وهي تسمعهم يتناقشون لجل موضوع استقرار ليلى وتميم بقطر
ابو تركي يهديها : يا نورة اهم شي راحتهم ماودي اجبرهم على شي مايبونه ثم اندم
ام تركي بحده : اجبرهم سعود اجبرهم انا ابي اعيش مع عيالي كلهم مو متشتتين ! انا سكت عن تميم من قبل لكن ليلى وبنتها كفايه عليهم ثلاث سنوات
ابو تركي بثبات هادي : ادري صعب عليك فراقهم وبعيدين عنك قايل لك انا متى ماتبين نروح نشوفهم
ام تركي بضيق : مو نفس لما يكونون بنفس البيت اشوف نومتهم وصحوتهم اتطمن عليهم بالطلعه والدخله ! وسكتت تصد عنهم تبكي بصوت مسموع
تنهدت نجد وهي متضايقه من نفس الموضوع ولكن ساكته ولا تكلمت لجل ماتضايق ابوها وامها وقامت دون تتكلم وصعدت لجناحها تقفله وتنام

عوده لقصر ابو تركي
جالس بين امه واخته ويحس بتأمل ابوه له من وقت صحى للان ماتكلم ماسأل فقط يتأمله وتنهد يلفت نظر امه واخته اللي سكتو عن الكلام و نظراتهم توجهت له وتكلم ابوه وهو يناظره
ابو تركي بصوت تعبان : وين كنت ؟
تركي سكت وهو ماوده يجاوبه لطالما كانت علاقة تركي وابوه علاقة اصحاب اكثر ما انهم ابو و ولده لكن السنوات تغيرت وتركي كله تغير من ابتعد عنهم ود تكلمت وهي تغير الموضوع لانها شافت اخوها كأنها ماوده يجاوب
ود بتغير للموضوع : ماقلت لك تركي صح قلت لي قبل اني امشي ورا احلامي والتخصص اللي ابيه ادخله حتى لو ماله مستقبل وظيفي ؟
هز راسه تركي بإيجاب و شبه ابتسامه ارتسمت على شفاهه وهو يتذكر حديثه مع اخته بهالموضوع
وابتسمت ود تكمل : تخصصت تصوير فوتغرافي وحالياً انا بأخر سنه دراسيه تدريب واتخرج
ابتسم لها تركي يحضنها من كتوفها له ويقبل راسها كتعبير على كلامها وهو يدري بانه ابوه بيكلمه عن موضوع غيابه ولكن بيأجل قد مايقدر لين يلاقي اللي غاب لجل مايفقدها وينتقم من اللي فرقه عن اهله

قصر ابو سعود " العصر " ( جناح وهج )
جالسه على كرسي مكتبها وتكلم اختها فيديو بسناب وتسمع سوالفها عن قطر وضحكت لما سمعت حلطمتها على السواق اللي تأخر عليها
وهج بضحكه : فيّ تكفين اسكتي شوي بس شوي
فيّ بكشره وبوزت : عيب عليك وهج اختك في مأزق وانتي تضحكين علي ؟ تعالت ضحكات وهج من تعبير فيّ بالكلام ومبالغتها
وهج بضحكه وتعديل : مو مأزق ! تأخير ياحبيبتي تأخير ليه كل هالاوفر عندك ؟
فيّ عدلت ملامحها وبشهقه : حراام عليك انا اوفر ؟
وهج تنرفزها : ايه اوفر وتبالغين بكل شي
فيّ بتطنيش وتقهرها وهي تشوف سيارة السواق تقرب منها : يلا يلا ماني فاضيه تعرفين يعني مسافره وماعندي اختبارات وفوضى !
وهج بتجاهل وبرود : ماراح تقهريني يلا يا المشغوله كملي الشوبنق تبعك وانا بسكر
فيّ بضحكه : وانا مالقيت غيرك اقهره بتخصصه مع السلامه يادكتورة !
وسكرت منها تقول للسواق يوديها للمكان المقصود