تبقى وليف القلب ولو صار ماصار وتبقى نظير العين ولو ما اشوفك

الجزء العاشر 🩶

-
-

قصر ابو تركي ( الصاله الداخلية )
دخل عليهم عذبي وجلس جنب تركي وهو يهمس بأذنه ثم ابتعد تنهد تركي بصوت مسموع وهز راسه بأيه لف عذبي على ابوه
عذبي بهدوء : جدي عند عمي حسين جاء الرياض اليوم لجل الشركه وكلمت عمي حسين بلغته عن تركي وقال لي تعالوا عندنا لجل يتطمن جدي
متعب بتعب : ماتمسك لسانك عذبي ؟
عذبي بتبرير : سعود وهقني قلت له ومارد علي وبعدها سمعت صوت عمي حسين وماعرفت ارد الا اني اقوله
تركي بهدوء نبرته : صار خير يبه مردهم بيعرفون ! ولف لامه وخواته وكمل : تجهزوا لجل نمشي
وقاموا يتجهزون لجل يتوجهون لبيت حسين

قصر ابو سعود ( مجلس الرجال الخارجي )
جالس جنب ابوه ينتظر ابو تميم لجل يعلمون ابوه ومايرتفع ضغطه ويطيح عليهم وعيونه على ولده اللي جالس قدامه وهادي ولا يوضح عليه شي تنهد على دخول اخوه ابو تميم وهو يقرب من ابوه يقبل راسه ويده ويتقدم يسلم عليه ويهمس بإذنه
ابو تميم بهمس مايسمعه الا اخوه : قلت له ؟
ابو سعود بهمس مماثل : لا انتظرك !
ثم ابعد عنه وسلم سعود على عمه ابو تميم وجلس جنب ابوه الثاني وتوجس الجد عبدالعزيز من جية ولده سعود
وشاف عياله يناظرون بعض وكأنه فيه شي
الجد عبدالعزيز بحده : سعود حسين !
لفو عليه وهم مُدركين انه حاس فيه شي لكن ينتظرهم يقولون
الجد عبدالعزيز ناظرهم بحده : انطقوا ايش صاير ؟
لف حسين لسعود يستنجد فيه والثاني نفس الشي ولكن قاطعهم دخول ابو تركي وبجانبه اليمين تركي سانده وجانبه اليسار عذبي !
ولف الجد عبدالعزيز لصوت الباب
لكن سرعان ما قام بقوه وعكازه ارتطم بالارض بصوت هز المجلس وهو يناظر دخول رابع عياله
وبصوت نبرته مرتجفه
" تـــركــي "

قصر ابو سعود  ( مجلس الحريم )
جالسين ومستغربين سبب الجمعه المفاجئه ببيتهم ولكن ام تميم ونجد عارفين السبب ولكن ماحبو يتكلمون لين تجي ام تركي وتبلغهم ومابين احاديثهم و سوالف وهج ونجد عن الدوام والجامعه قاطعهم دخول ام تركي وبناتها وقامت ام تميم وهي تحضن ام تركي وبكت ام تركي وهي تردد الشكر والحمد
وخافت عليهم ام سعود وهي تقرب منهم تتسأل
ام سعود بخوف : ايش فيكم ياجماعه !
بعدت ام تركي من حضن ام تميم وهي مبتسمه وتحضن ام سعود
ام تركي براحه وفرح وصوت عالي : رجع تركي يا ام سعود رجع وفرح قلوبنا !
حضنتها ام سعود وهي تبكي بفرح والمجلس صار كله بكى لكنه بكى فرح من زمان مازار بيوتهم

( مجلس الرجال الخارجي )
ترك تركي ابوه مستند على عذبي وركض لجده يسنده ويصير هو عكازه وسنده من الدنيا ومافيها وجلس جده على الكنب وهو مستند عليه ويتأمله ويشوف حفيده و ولده كيف تغير شكله وهيئته صارت اقسى من قبل وكأنه حفيده اختفى واحتل مكانه رجل جديد وقام تركي يقبل راس جده وكتفه ومسكه عبدالعزيز يشده يحضنه ولو تشوفون قلب تركي تعرفون انه من الاشخاص القله اللي اشتاق لهم جداً ماهو قصور بامه وابوه والباقي لكن تركي تربى بين ابوه وجده وكان جهد جده عليه اكثر من ابوه
الجد عبدالعزيز ودموعه نزلت وشد على كتف تركي وبهمس مايسمعه غيرهم : كسرت ظهري غيبتك ياتركي كسرته ايه والله  مسح تركي دموع جده وهو يقبل جبينه ويده
تركي بهدوء : رجعت يا عبدالعزيز رجعت وبكون ظهرك وسندك  كان بيقوم لكن رجعه جده بيده
الجد عبدالعزيز بحده : يميني مكانك ياتركي !
ثم ناظره وعيونه تفيض حنان : قرت عيونا برجعتك يابوك ايه والله قرت !
وطبطب على كتفه لجل يصدق انه قدامه وعنده وماهو غايب
تركي بهدوء : ماني غايب ياعبدالعزيز بقوم اسلم على عمامي
وابعد عنه ينحني على عمه حسين يقبل راسه وكتفه ثم عمه سعود اللي خذاه لحضنه واه من قلب تركي فـ اللحظه هذي عمه وابو حبيبته وام بنته شد على حضن عمه سعود ثم ابعد عنه لجل يسلم على سعود
ورجع جلس يمين جده ولف من سمع اللي قاله الجد
الجد عبدالعزيز بفرح يلف على سعود ولده : سعود دق على جماعتنا وبلغ الكل بكرا عندنا عشاء بمناسبة رجوع تركي ! ثم لف لحسين يكمل : وانت تدق على ابو عامر يجيب من الديره الحلال لجل عين تركي ثم لف لعذبي وسعود : وانتوا مع حسين تساعدونه ثم لف لمتعب : وانت يامتعب تبلغ ابو وليد وقطاع تركي كلهم برجعته لجل يشطبون اسمه من قائمة المفقودين وتعزمهم هنا وكانت الردود مابين ابشر وتم لف لتركي
تركي بهدوء : يبه بعد اذنك فيه شخص بعزمه
الجد عبدالعزيز بحده : عيب عليك يابوك العزيمه لك تعزم اللي تبي ضيفك ضيفنا كلنا !