تبقى وليف القلب ولو صار ماصار وتبقى نظير العين ولو ما اشوفك

الجزء الخامس 🩶

-
-

( جناح عذبي )
للتوه طالع من دورة المياه " يكرم القارئ " وهو يجفف شعره بمنشفه صغيره ولابس شورت اسود وتيشترت حفر اسود وسمع طق الباب وسمح له بالدخول وهو يطلع لصالة الجناح ويشوف العامله تحط الصينيه على الطاوله وبتطلع وقفها وهو يسألها لجل يتأكد
عذبي بنبره مبحوحه : من اللي سوا العصير لالي
لالي بعربيه مكسره : مدام نجد سويه
عذبي والابتسامه تعلو شفاهه : قولي لها عذبي يقول لك شكراً يابنت عمه
لالي هزت راسها وطلعت من جناحه وهو قعد يتأمل العصير اللي سوته لجله هو شي عادي وعابر من الكل ولكن لانه من نجد " بقلبه ماهو عابر "
وشربه دفعه وحده لانه دافي اساساً وطفى لمبات الجناح ودخل غرفته يخلي المكيف اعلى شي ونام

تحت بمجلس الحريم
جالسين كلهم عند بعض ويسولفون بمواضيع مختلفه بعد ما بلغتهم نجد باللي قاله عذبي
وتطمنت ام تركي على زوجها والبنات على ابوهم وقطع عليهم السوالف دخول لالي تنادي نجد
لفت نجد عليها وهي مستغربه : هلا
لالي : مستر عذبي يقول حق انتي شوكراً يابنت عم هو
نجد وجهها احمر من الخجل وقدام الكل صار هالشي والحين اكيد بيسألونها ليه يشكرها عذبي
وطلعت لالي من عندهم والعيون توجهت لنجد اللي نقطه وتبكي بسبب الاحراج اللي سببه لها عذبي وتتوعد فيه بقلبها !
ام تميم بإستغراب تناظر بنتها : ليش يشكرج عذبي ؟
نجد بهمس مسموع : قلت للعامله تسوي له عصير ليمون لجل صوته مختفي !
واردفت بتبرير : كان صوته تعبان وشبه مختفي قلت للعامله تسوي له عصير ليمون دافي ، عشان ماينام وصوته كذا ويقعد مختفي بالكامل ! وبوزت نهاية كلامها وهي تسمع ضحك بنات عمها على وهقتها
ام تركي بأبتسامه تهديها : تمام يامي ماصار شي سويتي اللي انا كنت بسويه لو اني طالعه له
ولفت على ام تميم اللي نظراتها على بنتها للان : ماسوت شي البنت كل خير يانورة كل خير
ولفت ام تميم عليها وهي تبتسم : ايه والله كل خير بحسبة اخوها عذبي
شردت نجد بكلمة امها " بحسبة اخوها " صح هو بحسبة اخوي ومايصير الا جذي اعقلي نجد اعقلي ولا تفكرين واشغلت وقتها مع مرت عمها وبناته وامها لجل ماتفكر بالي صار ابداً

المستشفى " المغرب " ( جناح ابو تركي )
طالع من دورة المياه " يكرم القارئ " بعد ماتوضى لصلاة المغرب وقرب من عمه لجل يصحيه للصلاة
سعود وهو يناديه بصوت مسموع : عمي متعب عمي متعب
ابو تركي فتح عيونه بتعب ورجع قفلها
سعود قرب منه لجل ينبهه : عمي متعب صلاة المغرب آذن
ابو تركي كان بيقوم ولكن ماقدر وسنده سعود لجل يقومه و وصله لدورة المياه " يكرم القارئ " و وقف برا ينتظره ماطول وطلع وسنده سعود للسرير لجل يصلي
سعود وهو يجلس عمه على السرير : عمي انا بنزل لمصلى الرجال تحت ماطول على ماتصلي وتقرا اذكارك
ابو تركي بصوت تعبان : روح يابوك روح حق الله اكبر
سعود قبل راسه ومشى طالع من الجناح ونزل لمصلى الرجال صلى ودعاء لعايلته وعمه و للغايب اللي مايدرون وينه ولكن استودعه الله وسلم وقراء اذكاره وطلع راجع لفوق جناح عمه
دخل وهو يشوف الدكتور يفحص عمه ويشوف تقاريره و وقف جنبه ويسمعه
الدكتور اياد بأبتسامه : ماشاء الله لا اليوم النفسيه عال العال وباذن الله بكرا نسجل لك خروج
ابو تركي بضيق من المستشفى : يابوك مايصير اطلع اليوم مافيني الا العافيه
الدكتور اياد بإقناع : ياعم ليله وحده ماتضر ونتطمن عليك اكثر اذا بتطلع اليوم ترا بترجع لنا بكرا واللي بعده ولكن اذا نمت هالليله بتطلع تحاليلك كامله وما بترجع هنا الا موعدك الجاي
ابو تركي وهو شبه اقتنع : طيب يابوي طيب
لف سعود على الدكتور وهو مبتسم : ايه يادكتور واقنعت عقيدنا بسلاسه
الدكتور اياد بضحكه : من قدي والله ! وتغيرت نبرته للجديه : تجي معي لمكتبي لجل تاخذ وصفة الادويه وتصرفهم لعمك وبكرا على العصر بسجل له خروج وسلامته يارب
سعود وهو يمشي معاه للباب : يعطيك العافيه ماتقصر
وطلعو من الجناح وغفى متعب لعالم الاحلام