باچر ترد العصافير على عشها وتنترس كل الحدايق من وردنا
باچر نغني بحزنة ، احنا ابونا العراق وساحة التحرير امنا !
اليوم التاريخ هو ٢٥/١٠/٢٠١٩ اريدكم تحفظون هذا التاريخ زين إنتوا وابنائكم وأحفادكم ، لان هذا مو بس يوم ورح يمشي مثله مثل اَي يوم هذا اليوم رح ينكتب بصفحات التاريخ العراقي ، احنا رح نتخلد وهمة رح يروحون لمزبلة التاريخ ، وكلنا نعرف زين انو التاريخ ما يرحم احد !
١٦ سنة تحكمنا عمامة فاسدة ! شنو ؟
اليوم طالعين نغير كلشي اَي اَي اليوم لا تتعجب اليوم هو اليوم الموعود اليوم " قيامة وطن " اليوم هو اخر فرصة للشعب العراقي حتى نغير وضعنا ، هاي الثورة عفت كلشي علمودها ، شغلي ، دراستي ، رزق عائلتي ، وحتى روحي فدوة الها تروح
بلشنا مظاهراتنا من الصبح ، چنا نمشي ونصرخ بعالي الصوت هتافاتنا " گالوا عنا ارهابية چي نتظاهر يومية " و " الشعب يريد إسقاط النظام " هالمرة چنت احس العلم اللي بين أيدي قطعة متكاملة وية جسمي ماگدر اكمل طريقي بدونه
بلشت علينا الدخانيات وسمومها يضربون بينا عامي شامي ، وطلق نار حي ، لا يالكعبة بعدها الساعة ٨ الصبح وهذا الجريح السادس يطيح بصفي لك التكتك ما جاي تلحگ تشيل المصابين صدگ يحچون ذولة !؟
احنا مستمرين نتقدم هالمرة صرخاتنا جاي تعلى وية كل جريح ينصاب وية كل شهيد جاي يطيح ، ثورتنا ما تنهيها قنابلكم ولا طلقاتكم ثورتنا ما يكسرها غير سيف العباس !
اقتربنا اكثر ، الدخانيات صارت اكثر ، ديرمون عشوائي !
هتافاتنا زادت ، دنصرخ بصوت عالي ، احس حنجرتي راح تنشال !
