كانت شهد جالسة يبدو عليها الاكتئاب والوهن في غرفتها وعيناها محمرة من شدة البكاء فأقبلت عليها بان وأمسكت يدها وطبطبت عليها برقة واخذت تنظر اليها بعطف
شهد : اني تعودت كل مرة تدخلين تضربيني راجدي شنو اللي استجد هالمرة !
بان : انتي بنتي حبيبتي واذا ضربتج مو قسوة إنما حباً وحرصاً عليچ
شهد : مامة يا حباً بية انتي گلبچ انطاچ تشوفين بابا يضربني وما سويتي شي ، يا خوفاً وانتي تريدين تبطليني من الكلية واني باقيلي سنة على التخرج كل هذا لان وافقت على واحد تقدملي ، ماما ترة انتي وبابا تضربون ركع وتحچون بالدين وگدامكم اية صريحة مدتطبقوها ، رب العالمين يگول بالقران {يَا أَيُّهَا الَّذِينَ آمَنُوا لَا تُحَرِّمُوا طَيِّبَاتِ مَا أَحَلَّ اللَّهُ لَكُمْ وَلَا تَعْتَدُوا إِنَّ اللَّهَ لَا يُحِبُّ الْمُعْتَدِين} وين تنفيذكم لسنن الرسول لو الدين عندكم بس قشرة ، ماما ترة والله دااريدة على سنة الله ورسوله وماريد اتزوج الا برضاكم ومباركتكم الي
بان : واني امچ وأدرى بمصلحتچ يا گلبي يا نور عيوني انتي ترة اني ما عندي أغلى منج بهالدنيا وگلبي ما ينطيني لا اني ولا ابوج انو نشمرچ بالشارع ترة زواجچ من سعد هو بمثابة نتبرئ منچ ، شوفي هذا الولد ما عنده مستقبل ولا فلوس انتي يمكن تحبيه خلينا نحچي بصراحة بس انتي صايرة مثل العمية صدكيني وثقي بالله بس بالبداية تتفاهمون بعدين تبلش المشاكل ، اولاً مستواهم الاجتماعي مو مناسب النا وثانياً همة شيعة واحنا سنة ، هواية افكار ومعتقدات مختلفة بيناتنا بنتي ابسط شي تتزوجين اطفالچ مو نفس مذهبچ انظري للمستقبل البعيد ترة تصير أشياء انتي مو مستعدة الها واني اعرفچ شلون تحبين دينچ ومتمسكة بيه واحنا مو من النوع اللي نتأقلم بسرعة ونتعود على عادات الشخص المقابل
شهد : بس سعد مارح يجبرني على شي واني رح اسوي اللي أريده وأربي أطفالي بالمستقبل مثل ما ربيتيني وعلى نفس المبادئ اذا على الفلوس اني اعرف ادبر حالي واذا شغلة دين ترة رح أبقى سنية لآخر نفس بحياتي !
بان : انتي تحچين هسة شي بس بعدين الحچي يختلف يا بنتي گلتلچ انظري للمستقبل البعيد ، ولهذا جيت احچيلج بشي احسن
شهد : وشنو الشي الاحسن !؟
بان : اليوم اجة واحد وطلب ايدچ من ابوچ
توسّعت عيناها، وبدأ الدم يتجمع في عروق وجهها وهي تنظر إلى وجه امها !
شهد : منو هذا الواحد !!
