ما هذا الجيل يا الله ، يجابهون الرصاص الحي بصدور عارية ويهتفون بالروح بالدم نفديك يا عراق !
طبعاً يوم الثلاثاء اليوم الاول من شهر العاشر ما رحت لشغلي وظليت نايم لحد الظهر افكر اروح للتحرير لو ماروح اروح لو ماروح بعدين گلت تشجع سعد وروح ليش لا ما راح تخسر شي اطلع لأول مرة بحياتك مظاهرة علمود وطنك اطلع بكامل إرادتك يجوز هالمرة تكون غير ومو مثل ما گالت امي خلي عندك امل ، طبعاً تشجعت وطلعت من البيت وگلت لامي رايح ساعة وراجعلچ ما اطول طبعاً اكيد رفضت بالبداية وما عجبها الموضوع بس بعدين اقتنعت وگالت شرط ساعة وترجعلي ، اذكر زين صعدت كية ورحت لباب الشرجي واني ٥ آلاف بجيبي بس ، رحت اشتريت تيشيرت مكتوب عليه نازل اخذ حقي ب٤ آلاف وبقت الي الف بس ونص الشباب اللي وياي هم هيچ ، رحت وانا مستغرب شوية اشوف الشباب متلهفة ورايحة شايلة علمها وتركض ، واصلت الطريق وياهم وبلشت اقترب من الساحة شوية شوية ، شفت هوسة صايرة وصوت رمي وقنابل مسيلة للدموع ، اريد أوصل للتحرير اريد اكمل طريقي واشوف شنو گاعد يصير ليش هالرمي ليش هالشباب گاعد تنضرب شنو اللي سووه !؟ ، وانا امشي وگع ولد مسافة قريبة علية طاح وسال دمه گدام عيني مثل الشلال والكل تصيح استشهد وركضوا عليه شالوه ، شنو گاعد يصير يالكعبة انا صافن معرفت اسوي شي لگيت نفسي لا إرادياً شلت العلم اللي چان بيده ولفيته على صدري وهو مليان دم ، هنا بلشت افهم الگاعد يصير شباب جاي تموت لان تريد حقها شباب سباع طلعوا عالحرامية ، هسة انا لاف على صدري العلم اللي بيه دم شهيد يعني شي طاهر ؟ يعني لازم اسوي شي يستاهل الف بيه هذا العلم ! ، بلش الرمي اكثر وأكثر لگيت نفسي اركض والناس كلها تركض وياي تصيح " بالروح بالدم نفديك يا عراق " والرمي مستمر
وسط هالصيحات هاي والشباب اللي رايحة تركض عالموت تهتف بأسم العراق عرفت انو انا اليوم انولدت اليوم اللي لازم اثبت بيه وجودي اثبت انو اگدر اسوي شي للعراق ولو شي بسيط اليوم يلا عشت وگلت هاليوم چنت نفس صاعد نازل
