هل سيصدقنا احفادنا ؟ حين نقول لهم لقد رأينا الموت بلحمه وشحمه ؟ رأيناه وهو يهتف معنا وكيف يعتصم ويصرخ وكيف يموت ؟
لحظة .... هل سنرى احفادناً يوماً !؟؟
٢٨ اكتــــــــوبــــــــر
بلشنا يومنا بصلاة ، اليوم ثنين ، اليوم مو بس احنا نتظاهر، نزلوا ويانا آلاف الطلاب من بغداد البصرة والديوانية والناصرية وبابل ، اليوم قررت الطلاب توگف بصفنا لمدة ٤ ايّام مثل ما ضيعنا سنة من عمرنا لخاطر الوطن ، عادي اخسر شهادة ولا اخسر وطن
ومنو يدري يجوز مو بس سنة تضيع يجوز يضيع كل عمرنا لخاطر الوطن !
اليوم وگفنا وگفة وحدة اليوم مو بس شباب نزلنا ، نزلت ويانا خواتنا الطالبات اللي لبسن الغيرة ورفعن الراية ، لازم نغير النظرة على البنات ، هذني خواتنا والعراق بيتهم مثل ما هو بيتنا هذني صوتهن مو عورة ، صوتهن مفتاح الثورة ، بنات العراق وبيهن البركة ، هاي ساحة التحرير مدينتنا الصغيرة نرسم على حيطانها ، وننظف شوارعها ونترك بيها آثارنا
ياما كتبت على كل حايط من حيطانها شعر ، ناوي اجي اقراه لمن تنتصر الثورة وأتذكر اللحظة اللي كتبته بيها
يگلك اليوم يريدون يسوولنا حظر تجوال لا بربكم ما تدرون صرنا نحب التحرير اكثر من بيتنا ؟ لا ومو بس هيچ
تدرون شنو الشعور الإيجابي اللي صار عدنا لمن شفنا الطلاب من كل المدارس والجامعات اليوم طالعة ويانا ؟
تدرون صار عدنا مفارز طبية وحلاقين ومطاعم متنقلة وأمهات يطبخولنا والدعم اللوجستي مستمر ؟ تدرون دنجمع قنابل المسيل حتى نكتب بيها " عاش العراق "
لك اليوم غير عن كل الايام لك يگلك حتى الروضة سوت إضراب والأطفال طلعوا يگولون " ماكو وطن ماكو دوام " !
الشغب اللي ما عدهم شرف طوقوا جامعة دجلة والفراهيدي وغيرها ومستعملين قنابل صوتية على الطلاب لك غير عديمين شرف ! لا ومو بس هيچ بدال ما الكل يوگف ويانا هواية مدارس منعوا طلابهم يطلعون وتجاوزوا على البنات وحتى ضربوهم ، البارحة ضاربين طالبات مدارس من حي البنوك بالعصي بس لان طلعوا يريدون وطن !
قوات أمنية تضرب بنية عراقية بالعصي !!! وين وصلنا يربي لا ومو بس هيچ ضربوا حتى الشباب اللي دافعولهن
معقوله اختي واختك وعرضي وعرضك هيج صار حالهن !!
هاي تالي البنية العراقية هيچ يصير بيها ، لك بعد اللي صار شلون واحد يگدر يگعد ببيته ويسكت لك اذا هسة ما اهتزت غيرتك شوكت تهتز ما تگلي !
