قدري الاسود

الحلقة(44)

الحلقة(44) من قصة الحقيقيه #قدري_الاسود بقلمي
#الكاتبة_شهناز_الخزعلي

فحبك عاصفة لا خيار
وأهزم باسمك كل جراحي
فأغنيتي في هواك انتصار
ومن قال إني تركت دياري
ما دام قلبك في العمر دار
أحبك لا شأن لي باختياري
فحبك عاصفة لا خيار
وأهزم باسمك كل جراحي
فأغنيتي في هواك انتصار

غادة/تمر ايامنا يوم حلو ويوم مر بس ايامي تمر علكم امر من القبلها
مر على فقداني لابني خمس سنوات  .. يعني هسه عمر امير خمس سنوات  .. خمس سنوات ماشايفته بس كل دقيقه تمر يتصورلي ملامحه شلون كبر وشلون لعب وشلون تكون ...
خمس سنوات مرت عليه بلياليها ونهارها حزن وقهر
طول خمس سنوات مانشفت دمعتي .. مرات استغرب عيوني شكد شايلات دموع وبيهن هيج حيل للدمع
عفيه على كلبي شكد يتحمل وشكد بعد بي يتحمل
مرات نطلب من رب العالمين  اشياء احنا مانعرف نهايتها ولاتبعاتها بس نطلبها بقوة والحاح ومن يتأخر علينا الاستجابه نجزع  مانعرف انو هذا التأخير بي صالح النا والاستجابه بي مضره النا وذلك قول الله تعالى "
بسم الله الرحمن الرحيم  (عسى أن تكرهو شيئا وهو خير لكم وعسى أن تحبو شيئا وهو شرا لكم)

صدق الله العظيم .

شكد طلبت يرجعلي ابني مامر عليه يوم ماطلبته مامرت دقيقه
بس من عرفت وايقنت انو فراقه نعمه من الله حمدت الله عليها ......................
بعد خمس سنوات 
صدفه اجتني بنيه تخيط البنيه غريبه مو من المنطقه وماشايفتها طويله ورفيعه عيونها بيها لون جوزي بس ممرتبه لالبس ولاشكل يعني مبينه متعوبه  دكت الباب ودخلت حتى اخيطلها فستان مناسبه اخذت قياساتها وكملت شغل سألتها "

غادة:منين حظرتج ماشايفتج؟

_ اني خطار هنا يم حماتي وصفتج بالخياط المرتب كلت اجربج حتى بعد اجي اخيط هنا كله يمج  .. .

.....عادي دائما تصير ......

بعد اسبوع اجت البنيه تستلم الفستان بس الغريب ماقبلت تدخل وصاحتني للباب طلعت الها انطيتها العلاكه وماقبلت حتى تدخل للبيت
كالت"

_ مستعجله ولازم ارجع.

طلعت للباب ومديت ايدي صارت كبالي سيارة بيها شخص اسمراني رأسا رجعت ورا الباب  كتلها"

غادة: داده تعالي ادخلي او ارجعي بغير وقت من تكونين ماعندج شي مااكدر اوكف بالباب منا ناس وشارع ومو من طبعي اوكف بالباب .

اخذت العلاكه وراحت بعد مااعتذرت
بعد شهرين ونص ضبط .. اجت البنيه نفسها
سلمت جنها تعرفني من زمان
جان بوقتها وفاة السيدة معصومه اخت الامام الرضا سلام الله عليها .وعدنا مجلس عزاء لروحها الطاهره .....

بعد المجلس كعدت البنيه ومبينه مرتبكه حيل ومتوترة  بس مابيدها شي يعني ماكو قماش جايبته حتى تخيط لعد شعدها جنه بوقتها اني وسارة يمها كاعدين  اشوفها تفرك بأيدها....